Read Toraja-Sa'dan SURA’ KATOMINAAN 17 Bible Online

SURA’ KATOMINAAN 17 - Toraja-Sa'dan bible

SURA’ KATOMINAAN 17

¹Ma’kadami tu PUANG lako Musa Nakua:

²Ma’kadako lako Harun sia anakna sia lako mintu’ to Israel, ammu pokadanni kumua: Inde sia tu apa Napepasanan PUANG Nakua:

³Minda-minda tu to Israel tu urrere’ sapi ba’tu domba ba’tu bembe’ birang la lan to’ tenda la salianna to’ tenda,

⁴anna tae’ nabaai lako to’ ba’ba Tenda Kasitammuan, kumua napennoloan napopemala’ lako PUANG dio tingayo kemaNa PUANG — manassa iatu rara iato la dipatanggungi tu tau iato, belanna umpatibollo rara; iatu tau iato la disabu’i lan mai bangsana.

⁵Dikua anna pennoloanni to Israel lako PUANG tu pemala’na, tu biasa natunu dio lu padang, iamotu lako to’ ba’ba Tenda Kasitammuan, lako to minaa, anna pemalaranni lako PUANG dipopemala’ kasalamaran.

⁶Iatu rarana la napa’pi’pikan to minaa inan pemalaranNa PUANG, tu dio ba’ba Tenda Kasitammuan, na iatu lompo la natunu la dadi bau busarungngu’ lako PUANG.

⁷Sia damo napemalaranni tu pemala’na lako ampu padang tu napengkaolai ma’gau’ sala. Iamote tu la dadi atoran matontongan lako tau iato mai la nasiosso’i.

⁸La mupokada lako tau iato mai kumua: Minda-mindai tu to Israel ba’tu to sae, tu torro dio lu kalemi, ke umpemalaranni misa’ pemala’ ditunu pu’pu’ ba’tu pemala’ pangrere’,

⁹anna tae’ nabaai lako to’ ba’ba Tenda Kasitammuan, kumua anna pemalaranni lako PUANG, tau iato la disabu’i lan mai bangsana.

¹⁰Minda-mindai tu to Israel sia iatu to sae tu nasisolan torro, ke ungkandei rara sala umbanna — manassa la Kupapatui lindoKu la ullaoi tu to mangkamo ungkande rara iato, angKu sabu’i dio mai bangsana.

¹¹Belanna iatu penaa duku’ lan rarana sia mangkamokomi Kuben dao inan pemalaran la umpadenan kadiseroian kasalan penaammi, belanna iatu rara umpaden kadiseroian kasalan tete dio penaanna.

¹²Iamotu mangkamo Kupokadan lako te mintu’ to Israel, kumua: Da miden misa’ ungkande rara sia moi misa’ to sae, tu torro misisolan da nakande rara.

¹³Minda-minda tu mintu’ to Israel sia to sae, tu torro misisolan untingkan misa’ olo’-olo’ marira ba’tu misa’ manuk-manuk ke malei moasu ma’din dikande, la napatibollo tu rarana sia nasamboi losso’.

¹⁴Belanna diona penaanna mintu’ duku’ — iatu rarana iamo penaanna; iamoto Kupokadanni to Israel, kumua moi misa’ rupanna duku’ da mikandei tu rarana, belanna iatu penaanna mintu’ duku’, iamotu rarana: minda-minda ungkandei la disabu’i.

¹⁵Minda-minda la pa’tondokan to Israel, ba’tu to sae, tu ungkande olo’-olo’ masala ba’tu olo’-olo’ tisapek, la umbusukki pakeanna sia la mendio’, sia tontong maruttak sae lako makaroen, namane masero.

¹⁶Apa iake tae’i nabusukki tu pakeanna sia tae’ nabasei kalena manassa la napassan tu kakadakeanna.