Read Toraja-Sa'dan SURA’ KATOMINAAN 18 Bible Online

SURA’ KATOMINAAN 18 - Toraja-Sa'dan bible

SURA’ KATOMINAAN 18

¹Ma’kadami tu PUANG lako Musa Nakua:

²Ma’kadako lako to Israel sia kuanni kumua: Akumo tu PUANG, Kapenombammi.

³Da mipogau’i tu aluk napogau’ tau lan tondok Mesir, tu mangka minii torro; da mipogau’i tu aluk napogau’ tau lan tondok Kanaan, tu inan Kunii ussolangkomi; da mituru’i tu aluk napondok tau iato mai.

⁴Sangadinna la mipogau’ tu mintu’ atorangKu sia mikaritutui tu aluk Kupondok, ammi turu’i: Akumo tu PUANG, Kapenombammi.

⁵Manassa la mikaritutui tu aluk Kupondok sia mintu’ atorangKu; minda-minda umpogau’i la napotuo: Akumo tu PUANG.

⁶Moi misa’ tau da nareke’ sangdadian marengke’na la sangampa’ sola: Akumo tu PUANG.

⁷Da mukillang kasirisanna ambe’mu, iamotu da musangampa’ indo’mu; belanna iamoto tu indo’mu, da musangampa’ sola.

⁸Da musangampa’ sola tu baine napobaine ambe’mu; belanna ungkillangko kasirisanna ambe’mu.

⁹Iatu siulu’mu baine dio ambe’mu, ba’tu dio indo’, tu dadi lan banuanna ambe’mu, ba’tu salianna, da musangampa’ sola.

¹⁰Iatu ampomu baine dio anakmu muane ba’tu dio anakmu baine, da musangampa’ sola, belanna iko umposiri’i tu iannato.

¹¹Da musangampa’ sola tu baine nadadian bainena ambe’mu, tu napadadian ambe’mu, belanna iamo anak darammu — da musangampa’ sola.

¹²Da musangampa’ sola pa’indorammu dio ambe’, belanna sangrara sangbuku ambe’mu.

¹³Da musangampa’ sola pa’indorammu dio indo’, belanna sangrara sangbuku indo’mu.

¹⁴Da mukillang kasirisanna pa’amberammu dio ambe’; da mureke’i tu bainena, belanna iamo pa’indorammu.

¹⁵Da musangampa’ manintummu baine, belanna napobaine anakmu, da musangampa’ sola.

¹⁶Da musangampa’ sola bainena siulu’mu, belanna mangkamo sangampa’ siulu’mu.

¹⁷Da musangampa’ sola misa’ baine sia iatu anakna baine; da mualai tu ampona baine iato dio anakna muane ba’tu dio anakna baine, la musangamparan, belanna sangrara sangbukuko; sala belanna to sikande rara bangpa.

¹⁸Da mupobaine misa’ baine mupa’da’duai siulu’na, ammu pasisondai musisangamparan, ke tuopi bainemu.

¹⁹Da musangampa’ misa’ baine, ke nalambi’i bulanna.

²⁰Da musangampa’ bainena padammu ma’rupa tau, miurunganni pada maruttak.

²¹Da musorongi moi misa’ tu anakmu la dipennoloan lako Molokh, anna da mupamatunai tu sanganNa Kapenombammu: Akumo tu PUANG.

²²Da musangampa’ padammu muane, susi baine, belanna iamoto tu misa’ apa megallian.

²³Sia da muruttakki kalemu ungkaromok olo’-olo’; sia misa’ baine da nabendan sipatu misa’ olo’-olo’ la sikaromok sola, belanna iamo gau’ sala megi’giran tongan to.

²⁴Da miruttakki kalemi napobua’ tu mintu’na te, belanna tete dio tu mintu’na te naruttakki kalena tu mintu’ bangsa, Kurambai dio mai tingayomi.

²⁵Iatu tondok iato diruttakki sia Kupabala’i tu kakadakeanna, iamoto naluai padang tu mintu’ to umpa’tondokki.

²⁶Sangadinna la mikaritutui tu mintu’ aluk Kupondok sia mintu’ atorangKu, sia moi misa’ tu apa megallian da mipogau’i, la to Israel dadi lan tondok la to sae tu misisolan.

²⁷Belanna mintu’ te apa megallian tu napogau’ tau lan tondok, tu dolo na kamu lan tondok iate, naurungan maruttak te tondok —

²⁸dikua anna da naluakomi tu tondok iate, ke miruttakki, susi tu bangsa dolo na kamu mangka nalua.

²⁹Belanna minda-minda umpogau’i te apa megallian iate, iamo la disabu’i dio mai bangsana.

³⁰Iamoto la mikaritutui tu atoran Kubenkomi, kumua da mipogau’i tu aluk dipondok megallian, tu napogau’ tau dolo na kamu, kumua da miruttakki tu kalemi tete dio apa iato. Akumo tu PUANG, Kapenombammi.