Read Toraja-Sa'dan SURA’ KATOMINAAN 19 Bible Online

SURA’ KATOMINAAN 19 - Toraja-Sa'dan bible

SURA’ KATOMINAAN 19

¹Ma’kadami tu PUANG lako Musa Nakua:

²Ma’kadako lako mintu’ kasirampunan to Israel sia kuanni kumua: La maserokomi, belanna maseroNa’, te Aku PUANG, Kapenombammi.

³Pantankomi la ungkasiri’ indo’mi sia ambe’mi sia la ungkaritutui tu allo katorroangKu: Akumo tu PUANG, Kapenombammi.

⁴Da mipennoloi deata sia da migaraga rapang-rapang dipodeata dipati’no’: Akumo tu PUANG, Kapenombammi.

⁵Iake umpemalarangkomi pemala’ kasalamaran, la mipemalaran susito naalanna penaanNa PUANG.

⁶Iato allo la minii umpemalaranni sia iake masiangi dio mai la mikandemo to, apa iatu apa torronapa sae lako allo ma’pentallunna, la ditunu mampu’.

⁷Iake ma’tallung bongimi, mikande bangpi, iamo misa’ apa megi’giran sia tae’ naalai penaanNa PUANG.

⁸Minda-minda ungkandei, iamo la umpassanni tu kadakena, belanna umpamatuna kamaseroanNa PUANG; tau iato la disabu’i dio mai bangsana.

⁹Iake unnalakomi bura padangmi, da mipurai tu randanna, sia da mirurukki tu misalanna.

¹⁰Da duka mimebua anggoro’ sipenduan sia iatu bua rondonna damo mirurukki, sangadinna la mieloran anna potaai to bongko sia to sae. Akumo PUANG, Kapenombammi.

¹¹Da miboko, da mima’kada tang tongan sia da misipakena len.

¹²Da mipalao sumpa tang tongan ussa’bu’ sangangKu, belanna iake susito umpamatunakomi sanganNa Kapenombammi. Akumo tu PUANG.

¹³Da mupandasa padammu ma’rupa tau sia da murampa barang apanna; sia sarona to sumaromu da mupopa’bongii sae lako masiangna.

¹⁴Da mutampakki ropu tu to taru sia da mupadioi tingayona to buta tu apa la natodo, sangadi la mataku’ko lako Kapenombammu. Akumo tu PUANG.

¹⁵Da mibimbang ma’paolai salu; da mikaturu-turui to baitti’ ba’tu umpelindo to kapua, sangadinna la musanda tonganni tu kara-karana padammu ma’rupa tau.

¹⁶Da mumale ma’pakadake lele dio lu bangsamu; sia da mudaka’ lalan la umpatibollo rarana padammu ma’rupa tau. Akumo tu PUANG.

¹⁷Da mukabiri’ siulu’mu lan penaammu, sangadinna la mupakanaan ke unnada’ko sangtondokmu, kumua da’mo natete dio tau iato ammu passan kasalan.

¹⁸Da mupalan penaai tu la umpabala’i kadake ba’tu untambukan essun sangbangsamu, sangadinna la mukamasei tu padammu ma’rupa tau susi batang kalemu: Akumo tu PUANG.

¹⁹La mikaritutui tu aluk Kupondok, da mupasisolai tu patuoammu, ke sisengaranni, da muambo’i banne duang rupa tu pa’lakmu, sia da mupake sampin duang rupa.

²⁰Iake denni misa’ tau sangampa’ misa’ baine, iamotu mai kaunan diben misa’ muane la napogundi’, apa tae’pa nadila’bak ba’tu ditomakakai, la dipakannai ukungan; apa tae’ na la dipatei, belanna tae’pa naditomakakai.

²¹La napennoloan lako PUANG tu kadiseroian kasalan dio to’ ba’ba Tenda Kasitammuan, iamotu misa’ domba laki la diposuru’ pangakuan sala.

²²Sia to minaa la umpadenanni kadiseroian kasalan tete dio domba laki tu diposuru’ pangakuan sala dio oloNa PUANG, napobua’ kasalan napogau’, anna iatu kasalan napogau’ la dipagarri’.

²³Iake tamamokomi tondok iato, ammi tanan ma’rupa-rupa garonto’ bua-bua, iatu bua bunga’na la mipa’pemalii; tallung taun la pemali lako kalemi sia tae’ na la dikande.

²⁴Lan taun ma’penna’pa’ iatu mintu’ buanna la dipamaindan, anna dipopemala’ umpudi-pudi PUANG.

²⁵Apa iake taun ma’pellima, ma’dinmo mikande tu buanna, anna rangnganangkomi buanna. Akumo tu PUANG, Kapenombammi.

²⁶Da mikandei tu apa kerarapa; da midaka’ to pakita-kita sia to umpogau’ balik mata.

²⁷Da mima’ku’ku’ ma’soppo kurin sia da miku’ku’i tu randan danggo’mi.

²⁸Da mitori-tori’i tu kalemi belanna kamatean sia da mitoboi passura’ tu kalemi: Akumo tu PUANG.

²⁹Da mupamatunai tu anakmu baine ke mupopa’elo’na bangi lako gau’ sala kumua da nama’gau’ sala tu to ma’tondok sia da naponnoi gau’ mesirisan tu tondok.

³⁰La mikaritutui tu allo katorroan tu mangka Kupondok sia la mikasiri’ tu inan maindanKu, Akumo tu PUANG.

³¹Da mima’palulako bombo to mate, ba’tu lako to sola-sola bombo; da midaka’i tu tau iato mai la urruttakki kalemi: Akumo tu PUANG, Kapenombammi.

³²La ke’de’ko dio tingayona to keuban sia kasiri’i tu to matua sia kataku’i tu Kapenombammu: Akumo tu PUANG.

³³Iake denni to sae musisolan lan tondok, da mupandasai.

³⁴Iatu to sae misisolan la mipapada bangsiato ma’tondok dio lu kamu; la mukamasei susi batang kalemu, belanna mangkamokomi to sae lan tondok Mesir; Akumo tu PUANG, Kapenombammi.

³⁵Da mibimbangan tau ke ma’paolai salukomi, ke massuka’komi sia ke ma’timbangkomi sia ke ma’kararoikomi.

³⁶La mipake tu timbangan tongan sia batu petimbang tongan sia epa[5] tongan sia hin[6] tongan: Akumo tu PUANG, Kapenombammi, tu mangkamo ussolangkomi lan mai tondok Mesir.

³⁷Susimoto la mikaritutui tongan tu mintu’ aluk Kupondok sia mintu’ atorangKu: Akumo tu PUANG.