Read Toraja-Sa'dan SURA’ KATOMINAAN 2 Bible Online

SURA’ KATOMINAAN 2 - Toraja-Sa'dan bible

SURA’ KATOMINAAN 2

¹Iake denni misa’ tau umpemalaranni lako PUANG tu misa’ pemala’, iamotu kande dipemalaran, iatu la napemalaran iamo ta’pung manisak nabolloi minna’ sia napasisola dupa.

²Anna baai lako anakna Harun, to minaa; ke mangkai naalai to minaa sangka’pan tu ta’pung manisak iato sia minna’ sisola tu dupa, natunui tu pemala’ iato dao inan pemalaran iamo pemala’ kapengkilalan la dipopemala’ pantunu, la dipobau busarungngu’ dio oloNa PUANG.

³Iatu torronapa tu kande dipemalaran napotaa Harun sola mintu’ anakna, iamotu tarru’ maindanna mintu’ pemala’ pantunu, tu dipemalaran lako PUANG.

⁴Iake la umpemalarangko kande dipemalaran, iamotu apa ditunu lan dapo’, ta’pung manisak la digaragai, iamotu pa’ranggina tang diragii dipasigerok minna’, sia roti manipi’ tang diragii dipasapui minna’.

⁵Iatu pemala’mu ke kande dipemalaran diba’te lan pamuntu, iatu iannato ta’pung manisak digaragai tu tang diragii, tu dipasigeroknamo minna’.

⁶Tepu-tepui ammi bolloi minna’; iamoto tu kande dipemalaran.

⁷Iatu pemala’mu ke kande dipemalaran, tu dipadio panti, ta’pung manisak sola minna’ la digaragai.

⁸Iatu kande dipemalaran, tu mangkannamo dikarang susito, la dipemalaran lako PUANG; iatu iannato la diparampo lako to minaa, tu la umbaai lako inan pemalaran.

⁹To minaa la unnangka’i tu pemala’ kapengkilalan dio mai kande dipemalaran anna tunui dao inan pemalaran, iamotu pemala’ pantunu, la dipobau busarungngu’ dio oloNa PUANG.

¹⁰Iatu torronapa tu kande dipemalaran napotaa Harun sola mintu’ anakna, iamotu tarru’ maindanna mintu’ pemala’ pantunu dipemalaran lako PUANG.

¹¹Iatu kande dipemalaran, tu mipennoloan lako PUANG, da nadimessu’i, belanna la iatu ragi la iatu uai tani’ enoan da mitunui dipopemala’ pantunu, tu dipemalaran lako PUANG.

¹²La mipemalaran tu iannato lako PUANG, la dipopemala’ bua bunga’, apa tae’ nama’din ditunu dao inan pemalaran, la dipobau busarungngu’.

¹³Iatu mintu’ pemala’ dio mai kande dipemalaran la musiai; da mupasalai sia basseNa Kapenombammu tu kande pemalarammu; iatu mintu’ pemala’mu la musiai.

¹⁴Iake mupennoloanni lako PUANG tu kande dipemalaran dio mai bua bunga’, iatu burena dinanang dio to’ api sia lise’ gandung diridi’ la mupennoloan, dipokande dipemalaran dio mai bua bunga’.

¹⁵La mubolloi minna’ sia muparokkoi dupa; iamoto tu kande dipemalaran.

¹⁶Iatu pemala’ kapengkilalan dio mai lise’ gandung diridi’ sia dio mai minna’ sola dupa la natunu to minaa, iamotu pemala’ pantunu, dipemalaran lako PUANG.