Read Toraja-Sa'dan SURA’ KATOMINAAN 20 Bible Online

SURA’ KATOMINAAN 20 - Toraja-Sa'dan bible

SURA’ KATOMINAAN 20

¹Ma’kadami tu PUANG lako Musa Nakua:

²Pokadapi lako mintu’ to Israel mukua: Minda-minda tu mintu’ to Israel sia mintu’ to sae dio lu to Israel, tu umpa’bengan misa’ anakna lako Molokh, manassa la dipatei; iatu mintu’ tau lan tondok ussileba’i batu.

³La Kupapatui lindoKu umpandasai tu tau iato sia ussabu’i dio mai bangsana, belanna mangkamo umpa’bengan misa’ anakna lako Molokh, la urruttakki inan maindanKu sia umpamatuna sanga madatungKu.

⁴Iake natampunanni mata pa’tondokan tu diona to umpa’bengan misa’ anakna lako Molokh, anna tae’ napatei,

⁵manassa la Kupapatui lindoKu umpamandasai tu tau iato sola pa’rapuanna sia la Kusabu’i dio mai bangsana tu tau iato sola mintu’ to unturu’i umpengkaolai Molokh anna ma’gau’ sala.

⁶Sia iake den tau lu lako bombo to mate ba’tu to sola-sola bombo umpengkara’pai tu iannato, anna ma’gau’ sala — manassa la Kupapatui lindoKu umpandasai tu tau iato sia la Kusabu’i dio mai bangsana.

⁷Iamoto pemaseroi tu kalemi, ammi masero, belanna Akumo tu PUANG, Kapenombammi.

⁸Karitutui tonganni tu mintu’ aluk Kupondok; manassa Akumo tu PUANG, tu umpamaserokomi.

⁹Iake denni misa’ tau, tu unggatai ambe’na ba’tu indo’na, manassa tau iato la dipatei, belanna unggatai ambe’na ba’tu indo’na, iamoto anna passan kalenai tu rarana.

¹⁰Iake denni misa’ muane ussandak salu rampanan kapa’na bainena tau, iamotu ussandak salu rampanan kapa’na bainena to nasisolan, manassa la dipatei, la iatu muane pasandak salu lako rampanan kapa’ la iatu baine.

¹¹Iake denni misa’ tau sangampa’ bainena ambe’na, iamo ungkillang kasirisanna ambe’na, manassa la dipatei sola duai, anna passan kalenai tu rarana.

¹²Iake denni misa’ tau sangampa’ manintunna baine — manassa la dipatei sola duai, belanna ma’gau’ sala megi’giran, anna passan kalenai tu rarana.

¹³Iake denni misa’ muane sangampa’ padanna muane susi baine — umpogau’ duai apa megallian, manassa la dipatei, anna passan kalenai tu rarana.

¹⁴Iake denni misa’ tau umpobaine misa’ baine situang indo’na — sala — , belanna to sikande rara bangpa — manassa la ditunu tu muane iato sia iatu baine sola duai, dikua da naden sala belanna to sikande rara bangpa dio lu kalemi.

¹⁵Iake den misa’ tau ungkaromok olo’-olo’, manassa la dipatei; iatu olo’-olo’ dilonga’ samatena.

¹⁶Iake den baine lao umpentireke’i olo’-olo’ la sikaromok, la mipatei tu baine sola tu olo’-olo’ iato; manassa la dipatei, anna passan kalenai tu rarana.

¹⁷Iake denni tau umpobaine anak daranna, la anak dio ambe’na la anak dio indo’na, anna killang kasirisanna anak daranna — iamo gau’ mesirisan maro’; iamoto anna disabu’i dio pentirona bangsana, belanna ungkillang kasirisanna anak daranna, iamoto anna passan kalenai tu kakadakeanna.

¹⁸Iake denni tau sangampa’ baine nalambi’ bulanna sia ungkillang kasirisanna — ia ungkillang kanalambiranna bulanna sia ia duka tu baine ungkillang kanalambiranna bulanna; la disabu’i sola duai dio mai bangsana.

¹⁹Da musangampa’ siulu’na baine indo’mu ba’tu anak daranna ambe’mu, belanna iammu pogau’i susito ungkillangko kasirisanna sangrara sangbukummu; anna pada umpassan kalenai tu kakadakeanna sola duai.

²⁰Iake denni tau sangampa’ pa’indoranna, iamo ungkillang kasirisanna pa’amberanna; la pada napassan kalena sola duai tu kasalanna, sia la mate tang kianak.

²¹Iake denni tau unnala bainena siulu’na — iamo sala belanna to sikande rara bangpa; iamo ungkillang kasirisanna siulu’na, anna tang kianak.

²²Iamoto karitutui tonganni tu mintu’ aluk Kupondok sia mintu’ atorangKu, da naluakomi tondok, tu Kunii ussolangkomi lako, ammi torro lan.

²³Da mipeolai tu aluk napondok bangsa iato tu la Kurambai dio mai tingayomi, belanna tau iato mai umpogau’ mintu’ apa iate, Kuurunganni ungkagi’gi’i.

²⁴Apa lako kalemi Kunii ma’kada Kukua: Alai tu tondokna ammi pomana’i, belanna Kukamaseangkomi la mipomana’, iamotu misa’ tondok sebo pangandu’ sia tani’ enoan; Akumo tu PUANG, Kapenombammi, tu umpamarimbangankomi dio mai mintu’ bangsa senga’.

²⁵Iamoto la mipasisengaran tu patuoan tang maruttak sia maruttak, sia manuk-manuk maruttak sia tang maruttak, da mipadadi megirianni tu kalemi natumang patuoan sia manuk-manuk sia mintu’ olo’-olo’ mendonglo’ dao kuli’na padang, tu Kupatoyang dio mai kalemi, belanna Kupamanassa kumua maruttak.

²⁶La maserokomi dio oloKu, belanna Akumote tu PUANG masero, iamoto Kupamarimbangankomi dio mai mintu’ bangsa, kumua ammi dadi taungKu.

²⁷Iake denni misa’ muane ba’tu baine natamai bombo to mate anna ma’kada ba’tu unnampui penaa pakita-kita, manassa tau iato la dipatei; sia nasileba’i batu tau, anna passan kalenai tu rarana.