Read Toraja-Sa'dan SURA’ KATOMINAAN 21 Bible Online

SURA’ KATOMINAAN 21 - Toraja-Sa'dan bible

SURA’ KATOMINAAN 21

¹Ma’kadami tu PUANG lako Musa Nakua: Ma’kadako lako mintu’ to minaa, anakna Harun kumua: Moi misa’ to minaa da naruttakki kalena dio lu to mate sangbangsana,

²sangadinna sangdadian marengke’na iamotu indo’na, ambe’na, anakna muane, anakna baine sia siulu’na muane,

³sia anak daranna, tu tae’pa nakemuane sia marengke’ lako kalena, tu tang napobainepa tau — bannang iamoto nanii urruttakki kalena.

⁴Iatu to minaa, tu mendapo’mo da naruttakki kalena dio lu sangbangsana tete dio bainena, napourungi umpadadi kalena tang masero.

⁵Da nagalettungi tu ulunna sia da naku’ku’i tu randan danggo’na ba’tu da natori’-tori’i tu kalena.

⁶La masero tu tau iato mai dio oloNa Kapenombanna sia da napamatunai tu sanganNa Kapenombanna, belanna tau iato mai umpennoloan pemala’ pantunu, dipemalaran lako PUANG, iamotu kinandeNa Kapenombanna; iamoto sipatu la masero tu tau iato mai.

⁷Da napobaine misa’ baine kadake gau’, ba’tu baine mangkamo lao siri’na, ba’tu baine natantang muanena, belanna iatu to minaa masero dio oloNa Kapenombanna.

⁸La mubilang masero, belanna umpemalaran kinandeNa Kapenombammu; iamoto sipatu la mupamasero, belanna maseroNa’, Aku tu PUANG umpamaserokomi.

⁹Iamoto, iake denni misa’ anakna baine to minaa ma’gau’ sala, tete iato nanii umpamatuna ambe’na; manassa la ditunu mampu’ tu baine iato.

¹⁰Na iatu to minaa mandu kapua dio lu siulu’na, dibolloi minna’ pa’tokkoan tu ulunna sia ditokko belanna dipapakei pakean masero, iatu tau iato tae’ nama’din mangrundun ba’tu usserek-serek pakeanna.

¹¹Moi misa’ to mate da nareke’i moi diona ambe’na ba’tu indo’na da naruttakki kalena.

¹²Da natampei tu inan maindan, kumua da napamatunai tu inan maindanNa Kapenombanna, belanna kaditokkoanna minna’ pa’tokkoanNa Kapenombanna dao ulunna: Akumo tu PUANG.

¹³Sia iapi tu anak dara la napobaine.

¹⁴Da napobainei tu to balu ba’tu baine ditantang, ba’tu baine mangka lao siri’na ba’tu baine kadake gau’na, iatu mintu’na te da napobainei, sangadinna misa’ anak dara dio mai sangbangsana tu la napobaine,

¹⁵kumua da napamatunai tu bati’na dio lu sangbangsana, belanna Akumo tu PUANG, tu umpamaseroi.

¹⁶Ma’kadami tu PUANG lako Musa Nakua:

¹⁷Kuako lako Harun, kumua: Minda-minda tu bati’ siosso’mu tu tattan kalena tae’ nama’din mareke’ la umpemalaran kinandeNa Kapenombanna.

¹⁸Belanna iatu mintu’ to tattan moi misa’ da namareke’, iamotu mai to buta, to kupi’, to karobe ba’tu to kalandong limanna ba’tu lentekna,

¹⁹ba’tu to le’to lentekna ba’tu limanna,

²⁰ba’tu to bukku’, ba’tu to marangke kale ba’tu to ma’mata gara’, ba’tu to karresan, ba’tu to masaki kuli’, ba’tu to sanggang kamuaneanna.

²¹Iatu mintu’ bati’na Harun, to minaa, minda-minda tu tattan kalena, tae’ nama’din mareke’ la umpennoloan pemala’ pantunu, dipemalaran lako PUANG; den tattanna, iamoto natae’ nama’din mareke’ umpennoloan kinandeNa Kapenombanna la umpemalaranni.

²²Iatu kinandeNa Kapenombanna, dio mai tu tarru’ maindanna sia dio mai maindanna, ma’din nakande.

²³Apa tae’ nama’din sae lako to’ kulambu sia tae’ nama’din urreke’ inan pemalaran belanna tattan tu kalena, kumua da napamatunai tu mintu’ inan maindanKu, belanna Akumo tu PUANG, tu umpamaindanni.

²⁴Susimoto tu Musa umparampoi tu mintu’ kada iate lako Harun sia lako anakna sia lako mintu’ to Israel.