Read Toraja-Sa'dan SURA’ KATOMINAAN 22 Bible Online

SURA’ KATOMINAAN 22 - Toraja-Sa'dan bible

SURA’ KATOMINAAN 22

¹Ma’kadami tu PUANG lako Musa Nakua:

²Ma’kadako lako Harun sia lako anakna, kumua nakanandai tonganni tu pamengan masero, tu napamaseroanNa’ to Israel, da napamatunai tu sanga madatungKu: Akumo tu PUANG.

³Pokadai lako tau iato mai kumua: Minda-minda tu mintu’ bati’ siosso’mi tu sae urreke’ pamengan masero tu napamaseroan PUANG to Israel, anna den bangsiapa ruttakna dio kalena, tau iato la disabu’i dio mai oloKu: Akumo tu PUANG.

⁴Mintu’ bati’na Harun, iamotu to golenan ba’tu to nakasunni bang nana, da nakandei tu pamengan masero, ke tae’pi nadipamasero; susi dukato tu tau ungkaka’ apa maruttak tete dio to mate, ba’tu to kasunan rangke bang,

⁵ba’tu to ungkaka’ misa’ olo’-olo’ mendonglo’, tu umpamaruttakki ba’tu tau, tu umpamaruttakki, belanna den tu sala umbanna kamaruttakan dio kalena.

⁶Minda-minda ungkaka’i tu susinnato, la maruttak sae lako makaroen, da nakandei tu pamengan masero, ke tae’pi namendio’.

⁷Ianna lambunmo tu allo, maneri masero, namane ma’din ungkandei tu pamengan masero, belanna iamoto tu kandena.

⁸Iatu olo’-olo’ mate punala bang ba’tu tiserek da nakandei, kumua da naruttakki kalena: Akumo tu PUANG.

⁹Sipatu nakaritutui tu atorangKu, kumua da nabannang iato nanii tau untanggung kasalan sia iamo napomate, belanna napamatuna tu iannato: Akumo tu PUANG, umpamaseroi tu tau iato.

¹⁰Iatu to tang sipatu da nakandei tu mai apa masero, la to tama sae tu naruranni to minaa ba’tu to sumaro da nakandei tu mai apa masero.

¹¹Apa iatu to naalli to minaa, ma’din la ungkandei susi dukato tu to dadi lan banuanna ma’din ungkandei tu kandena.

¹²Iatu anakna baine to minaa, ke napobainei to tang to minaa, tae’ nama’din ungkandei tu pa’duruk dio mai pamengan masero.

¹³Apa iatu anakna baine to minaa, ke balui ba’tu ditantangmi sia tae’ nakianak, anna sule lako banuanna ambe’na, susi tonna mangurapa, ma’din ungkandei tu kandena ambe’na, apa iatu to tang sipatu, tae’ nama’din ungkandei.

¹⁴Iake den tau ungkandei tu apa masero anna tae’ naangga’i, la nasondai lako to minaa tu apa masero iato, narangnganni pole’i sangtaa lima.

¹⁵Tae’ na la umpamatunai tau iato mai tu pamengan masero, tu naduruk to Israel lako PUANG,

¹⁶belanna napapassanni kasalan tu to Israel, ke nakandei to tang sipatu tu pamengan maserona, belanna Akumo tu PUANG, tu umpamaseroi tu tau iato.

¹⁷Ma’kadami tu PUANG lako Musa Nakua:

¹⁸Ma’kadako lako Harun sia lako anakna sia lako mintu’ to Israel sia kuanni kumua: Minda-minda tu mintu’ to Israel ba’tu to sae dio lu to Israel, tu umpennoloan pemala’na unturu’ mintu’ pangallonan sia mintu’ pemala’ tanning inaa, tu la napemalaran lako PUANG dipopemala’ ditunu pu’pu’,

¹⁹kumua na iatu pemala’ iato sipatu tang la tattan, tu sapi laki sia domba laki, sia bembe’ laki, ke la Napopaimankomi Puang.

²⁰Mintu’ tu apa den tattanna da mipemalaranni, belanna tae’ napadenangkomi kapaimanan tu iannato.

²¹Iake den tau la umpemalaran pemala’ kasalamaran lako PUANG la umpangallonan misa’ pangallonan ba’tu pemala’ tanning inaa, tu diala dio mai sapi ba’tu domba sia bembe’, sipatu tae’ tattanna Anna popaimanni PUANG: tae’ nama’din den tattanna.

²²Iatu olo’-olo’ buta ba’tu le’toi ba’tu bangkei, bundanganni, karresanni ba’tu masaki kuli’i, tae’ nama’din mipemalaran lako PUANG sia da mipennoloanni lako PUANG la dipopemala’ pantunu dao inan pemalaran.

²³Iatu sapi ba’tu domba kalandong ba’tu ko’dik tangkena ma’din mupasakka’ dipopemala’ tanning inaa, apa iake unturu’i pangallonan tae’ Napopaimanni PUANG tu iannato.

²⁴Iatu olo’-olo’ disanggang belanna dirimpi’ ba’tu ditumbuk, ba’tu disepak ba’tu diira’, da mipemalaranni lako PUANG; da mipogau’i to lan tondokmi.

²⁵Dio duka mai limanna to sae da mipemalaranni tu susinna te lako Kapenombammi la Napokinande, belanna apa sanggang sia den tattanna; tae’ napadenangkomi kapaimanan tu iannato.

²⁶Ma’kadami tu PUANG lako Musa Nakua:

²⁷Iake dadii tu anak sapi, ba’tu anak domba, ba’tu anak bembe’, la sisola bangpa indo’na pitung allo, apa randuk dio mai allo ma’pengkarua sia lendu’pa to, la Napopaiman PUANG dipopemala’ pantunu.

²⁸Da mipasangbara’i anakna mirere’ tu sapi ba’tu domba sia bembe’ lan sangallo.

²⁹Iake umpemalarangkomi pemala’ pa’pudian lako PUANG, la mipemalaran susito, ammi kabu’tui kapaimanan.

³⁰Lan allo ia dukato la minii ungkandei, da minannai tu sesanna sae lako masiang: Akumo tu PUANG.

³¹Iamoto karitutui tonganni tu pepasanKu: Akumo tu PUANG.

³²Da mipamatunai tu sanga madatungKu, angKu dipamadatu dio lu to Israel: Akumo tu PUANG, tu umpamaserokomi,

³³sia ussolangkomi tassu’ lan mai tondok Mesir; kumua angKu dadi Kapenombammi: Akumo tu PUANG.