Read Toraja-Sa'dan SURA’ KATOMINAAN 23 Bible Online

SURA’ KATOMINAAN 23 - Toraja-Sa'dan bible

SURA’ KATOMINAAN 23

¹Ma’kadami tu PUANG lako Musa nakua:

²Ma’kadako lako to Israel sia kuanni lako kumua: Iatu mintu’ attu pa’gauran dipamadatuan PUANG, tu mipetamban butung pa’kombongan masero, iamotu attu pa’gauran dipamadatuanNa’.

³Annan allona la nanii tau mengkarang, apa allo ma’pempitu iamo sipatu allo katorroan madatu tongan, iamotu misa’ pa’kombongan masero; moi misa’ pengkarangan da mikarangi, belanna iamo misa’ allo katorroan dipamadatuan PUANG lan mintu’ inan minii torro.

⁴Inde sia tu mintu’ attu pa’gauran dipamadatuan PUANG, iamotu pa’kombongan masero, tu la minii umpetambanni lan attu dipamanassa.

⁵Lan bulan bunga’na, allo ma’pessangpulo a’pa’na bulan iato, ke makaroenni, iamo pa’pasa, dipamadatuan PUANG.

⁶Lan allo ma’pessangpulo lima bulan iato den tu attu pa’gauran roti tang diragii dipamadatuan PUANG; la mikande tu roti tang diragii lan pitung allo.

⁷Lan allo bunga’na la den tu pa’kombongan maseromi; allo iato da mikarangi tu dakaran kandemi.

⁸Pitung allo la minii umpemalaranni tu pemala’ pantunu lako PUANG; iake allo ma’pempitu la den pa’kombongan masero; da mikarangi tu dakaran kandemi.

⁹Ma’kadami tu PUANG lako Musa Nakua:

¹⁰Ma’kadako lako to Israel, mukuanni kumua: Iake tamakomi tondok tu la Kukamaseangkomi ammi alai tu burana, iatu bunga’ pealammi sanguyun la dibaa lako to minaa,

¹¹anna sorongi natarima sule tu sanguyun bura padang iato dio oloNa PUANG, kumua Napopaimankomi Puang; masiangna allo katorroan to la nasorong natarima sule to minaa.

¹²Iato allo minii ussorong untarima sulei tu sanguyun bura padang iato, la mipasakka’ tu misa’ domba sangtaunmo tu tae’ tattanna, la dipemalaran ditunu pu’pu’ lako PUANG,

¹³sisola kande dipemalaran, iamotu ta’pung manisak duang taan sangpulona dipasigerok minna’, la dipopemala’ pantunu, la Napobau busarungngu’ PUANG, situang uai anggoro’ taa penna’pa’na misa’ hin[7] dipopemala’ pantedok.

¹⁴Da mikande roti ba’tu sara’buk ba’tu lise’ gandung sae lako mipemalaranna tu pemala’ lako Kapenombammi; iamote tu aluk dipondok matontongan lako bati’mi lan mintu’ inan minii torro.

¹⁵Randuk dio mai allo sidampi’na allo katorroan, iamotu allo minii umpennoloan sanguyun bura padang la dipopemala’ disorong ditarima sule, la miia’ ganna’ pitung minggu;

¹⁶sae lako allo sidampi’na allo katorroan ma’pempitu, la miia’ limangpulo allona; allo iato la minii umpennoloan kande dipemalaran tu ba’runna lako PUANG.

¹⁷La umbaakomi da’dua roti pemala’ disorong ditarima sule; roti iato ta’pung manisak digaraga, diala duang taan sangpulona epa, diragii anna ditunu, iamotu bunga’ pealammi, la dipennoloan lako PUANG.

¹⁸Sisola tu roti iato la mipemalaran tu pitu domba sisangtaunmo tu tae’ tattanna sia misa’ sapi laki mangura sia da’dua domba laki; mintu’nato la dipopemala’, ditunu pu’pu’ lako PUANG sola kande dipemalaran sia pemala’ pantedok, la dadi pemala’ pantunu Napobau busarungngu’ PUANG.

¹⁹Sia la umpasakka’komi misa’ bembe’ laki la diposuru’ pengkalossoran sia da’dua domba sisangtaunmo la dipopemala’ kasalamaran.

²⁰Sia la nasorong sia natarima sule to minaa sisola tu roti bunga’ pealanna tau, dipopemala’ disorong ditarima sule dio oloNa PUANG sola tu da’dua domba; iatu iannato la dipamaindan lako PUANG, anna potaai to minaa.

²¹Allo ia dukato la metambakomi ammi pogau’ pa’kombongan masero, sia da mikarang dakaran kandemi; iamote tu aluk dipondok matontongan lako bati’mi lan mintu’ inan minii torro.

²²Iake unnalakomi bura padangmi, da mupurai tu randanna muala sia da mururukki tu musalanna, sangadinna la mutampean bang to kalala’ sia to sae: Akumo tu PUANG, Kapenombammi.

²³Ma’kadami tu PUANG lako Musa Nakua:

²⁴Ma’kadako lako to Israel kumua: Lan bulan ma’pempitu lan bunga’na bulan iato la den tu allo katorroammi; la dipannoni tu tarompe’ pua umpaissanni tau tu iannato, iamotu pa’kombongan masero.

²⁵Da mikarang dakaran kandemi, sangadinna la umpemalarangkomi pemala’ pantunu lako PUANG.

²⁶Ma’kadami tu PUANG lako Musa Nakua:

²⁷Apa iake allo ma’pessangpulona bulan ma’pempitu iamoto tu allo kadiseroian kasalan: la den tu pa’kombongan maseromi, ammi pamadiongan penaammi sia umpemalaran pemala’ pantunu lako PUANG.

²⁸Allo iato da mimengkarang; belanna allo iato allo kadiseroian kasalan, la dipadenangkomi kadiseroian kasalan dio oloNa PUANG, Kapenombammi.

²⁹Iamoto minda-minda tu tae’ napamadiongan penaanna allo iato, la kusabu’i dio mai bangsana.

³⁰Minda-minda ungkarang moi ba’tu pengkarangan apa allo iato, la Kumangsanni dio mai bangsana.

³¹Moi misa’ pengkarangan da mikarangi; iamote tu aluk dipondok matontongan lako bati’mi lan mintu’ inan minii torro.

³²Iatu allo iato allo katorroan madatu tongan lako kalemi, sia la umpamadiongangkomi penaammi. Lan to allo ma’pengkasera bulan iato, ke makaroenni, randuk dio mai makaroen sae lako makaroen, la mipakaraya tu allo katorroammi.

³³Ma’kadami tu PUANG lako Musa Nakua:

³⁴Ma’kadako lako to Israel kumua: Iake allo ma’pessangpulo limanna bulan ma’pempitu randukmi tu pa’gauran pekalumban dipamadatuan PUANG lan pitung allo.

³⁵Iatu allo bunga’na la den pa’kombongan masero, da mikarang dakaran kandemi lan allo iato.

³⁶Lan pitung allo la minii umpemalaran pemala’ pantunu lako PUANG; sia iake allo ma’pengkarua la den tu pa’kombongan maseromi sia la mipemalaran tu pemala’ pantunu lako PUANG; iamote tu allo dipamadatu, allo iato da mikarang dakaran kandemi.

³⁷Iamote tu mintu’ attu pa’gauran Napamanassa PUANG, tu minii umpetamban pa’kombongan masero la umpemalaran pemala’ pantunu lako PUANG, iamotu pemala’ ditunu pu’pu’, kande dipemalaran, pemala’ pangrere’, sia pemala’ pantedok, pantan unturu’ atoranna, ke nalambi’oi allona,

³⁸senga’pi tu allo katorroanNa PUANG sia senga’pi tu pamengan sia mintu’ pemala’ belanna pangallonanna sia mintu’ pemala’ tanning inaa, tu la miben PUANG.

³⁹Apa iake allo ma’pessangpulo lima lan to bulan ma’pempitu, ke urrampunmokomi mintu’ bura padangmi, la umpakarayakomi pa’gauran Napamanassa PUANG lan pitung allo; iake allo bunga’na la den katorroan sia iake allo ma’pengkaruanna la den duka katorroan.

⁴⁰Ianna allo bunga’na la miala tu buanna kayu melo, sia palapa koroma sia takke’-takke’ kayu umbalumbun sia takke’-takke’ araba nahala,[8] ammi parannu-rannu dio oloNa PUANG, Kapenombammi lan pitung allo.

⁴¹Iatu pa’gauran iato la mipakaraya mipamadatuan PUANG pitung allo lan sangtaun, iamotu aluk dipondok matontongan lako bati’mi; lan bulan ma’pempitu la minii umpakarayai tu iannato.

⁴²Pitung allo la minii torro lan lantang pekalumban; iatu mintu’ to Israel tongan la torro lan lantang pekalumban iato,

⁴³anna issanni mintu’ bati’mi, kumua Kusua tu to Israel torro lan lantang, tongKu solanni tu tau iato mai tassu’ lan mai tondok Mesir: Akumo tu PUANG, Kapenombammi.

⁴⁴Susimoto tu Musa umpa’peissananni lako to Israel tu attu pa’gauran Napamanassa Puang.