Read Toraja-Sa'dan SURA’ KATOMINAAN 26 Bible Online

SURA’ KATOMINAAN 26 - Toraja-Sa'dan bible

SURA’ KATOMINAAN 26

¹Da migaragan kalemi rapang-rapang dipodeata; iamotu mai rapang-rapang dipodeata dipa’, ba’tu batu dipodeata da mipabendananni kalemi; susi duka tu batu dia’ga rapang-rapang da mipabendanni lan tondokmi, ammi tukku umpenombai, belanna Akumo tu PUANG, Kapenombammi.

²La mikaritutui tu allo katorroangKu sia mikasiri’ tu inan maindanKu, Akumo tu PUANG.

³Iake mituru’i tu mintu’ aluk Kupondok sia mikaritutui tongan tu pepasanKu,

⁴la Kupasaeangkomi uran, ke attunnai, anna pakendek burana tu padang sia la membua tu kayu lan pa’lak.

⁵Iatu panglulluran la sae lako peanggorosan sia iatu peanggorosan la sae lako pangamboran; la mikande tu kandemi sadia’mi sia la marampa’komi lan tondokmi.

⁶La Kupaden tu kamarampasan lan tondok, ammi mamma’ tang dipatiramban len; la Kumangsanni tu olo’-olo’ masuru lan mai tondok, sia iatu pa’dang tang la umpandasa tondokmi.

⁷La miula’ tu ualimmi, anna tibambang dio tingayomi nakande pa’dang tu tau iato mai;

⁸limakomi la unnula’i tu to saratu’, sia saratu’komi la unnula’i tu to sangpulo sa’bu, anna iatu ualimmi la tibambang dio tingayomi nakande pa’dang.

⁹Sia la messaileMo’ lako kalemi, angKu popemba’ka’komi sia umpabudakomi sia la Kupabantangmo tu basseta.

¹⁰Sia la mikande tu bura padang taun dolo, tu la’binnapa sia la mialai tu bura padang taun dolo, belanna denomo tu ba’runna.

¹¹Sia la Kupabendan tu kemaKu lan lu tangngami sia tae’ Kula ungkalilukomi,

¹²apa la Kusalongikomi sia la dadiNa’ Kapenombammi, angKu potaukomi.

¹³Akumo tu PUANG, Kapenombammi, tu mangkamo ussolangkomi tassu’ lan mai tondok Mesir, kumua damo napokaunankomi tau iato sia Kutessemo tu kayu ayokami, ammi lumingka malolo.

¹⁴Apa iake tae’i miperangiiNa’ sia tae’ mituru’i tu mintu’ pepasan iate,

¹⁵Iake mipamatunai tu aluk Kupondok sia mikalilui tu atorangKu, ammi tang unturu’i tu pepasangKu, moi misa’ duka sia mipokamo tu basseKu,

¹⁶iamoto la Kupogau’ dukamo susito lako kalemi sia la Kuparampoimokomi te katirambanan iate, iamotu saki rangke sia lalla’ tu umpamalo’ko’ mata sia umpalangga’ sumanga’; attu iato tae’ gai’mi unnambo’ bannemi, belanna la pura nakande ualimmi.

¹⁷La messaileMo’ unneakomi, miurungan natalo ualimmi sia mintu’ tu to ungkabiri’komi iamo la umparentakomi, sia la mallaikomi, moi natae’ misa’ tau unnula’komi.

¹⁸Moi narampoimokomi susito, ke tae’i miperangiiNa’, manassa la Kutompoipa sae lako pempitu, diona kasalammi.

¹⁹Sia iatu kuasa mala’bi’mi la Kuputtai sia la Kupadadi susito bassi tu langi’mi sia susito tambaga tu padangmi.

²⁰Anna iatu kamabukuammi mipake sala, belanna iatu padangmi tang la membura sia iatu kayu lan pa’lak tang la membua.

²¹Iake la mieaNa’ sia tae’ miperangiiNa’, manassa la Kupa’dikkikomi pempitu pole’pa makarra’, sitinaya kasalammi.

²²La Kurampanan tu olo’-olo’ masuru lako kalemi, anna pasisayurangkomi anak sia la napisanni tu mai patuoammi sia la napososso’ lu rokko tu bilangammi, anna iatu mintu’ lalanmi makarorrong.

²³Moi natete dio te kadipandasammi, ke tae’pi mimengkatoba’ sule sia tontongkomi unneaNa’,

²⁴manassa la Kulaoikomi sia la Kupa’dikki dukakomi pempitu diona kasalammi,

²⁵sia la Kuparampoikomi pa’dang, anna pabala’i tu basse mipoka; iammi sirampunmo lan kotami, manassa la Kupasaeangkomi ropu, ammi disorong lako ualimmi.

²⁶Iake Kuparoto’i tu roti mipopamuntu, la sangpulo baine untunui tu rotimmi lan misa’ dapo’ sia ditimbang tu rotimmi, ke dipasulei, ammi kandei, apa tae’ ammi dia’.

²⁷Moi nasusimoto, ke tae’i miperangiiNa’ sia la tontongkomi unneaNa’,

²⁸manassa la Kulaoikomi sia la Kuparampoikomi kare’dekan ara’Ku, ondongpi la Kupa’dikkikomi pempitu diona kasalammi.

²⁹Ammi kandei tu duku’na anakmi muane sia duku’na anakmi baine.

³⁰Sia la Kusanggang tu inan madao sia la Kusabu’i tu inan pemalaran pantunuan dupammi sia la Kupembuangan tu batang rabukmi dao batang rabukna deatammi sia la Kukalilukomi.

³¹Iatu mai kotami la Kupadaun lauanmo sia la Kusanggang tu inan maindanmi sia manokaMo’ unnudukki tu bau busarungngu’na tu apa la mitunuanNa’.

³²Aku kalena la ussanggangi tu tondok naurunganni iatu ualimmi tu untorroi, magiang untiroi.

³³Apa iatu kamu, la Kupasisarak-sarakkomi dio lu mintu’ bangsa sia la Kunonok tu pa’dang dio boko’mi sia la mempadang lo’bang tu tondokmi sia iatu kotami la daun lauan.

³⁴Iatu padang disondai taun katorroanna, lan mintu’ allo nanii talo sia la minii torro lan tondokna ualimmi, attu iamoto namelayo tu padang sia disondai taun katorroanna.

³⁵Lan mintu’ attu nanii talo tu padang, la melayo, iamotu kapelayoan tae’pa naappa’i lan to taun katorroammi, tommi torro lan.

³⁶Sia la Kupaden tu kamatakuran lan penaammi tu mintu’komi tu torronapa lan tondokna ualinna, naurungan moi daun kayu rondon unnula’ tau iato, anna mallai, susito naula’ pa’dang, anna tibambang tang naula’ tau.

³⁷Sia pantan la tilende’ tu tau iato mai anna siboton-boton susito undi naula’ pa’dang, anna tae’ tau undi unnula’i, sia tang la miatta bendan dio tingngayona ualimmi.

³⁸Susimokomito la sanggang dio lu mintu’ bangsa sia la mangsankomi dio lu tondok ualimmi.

³⁹Sia minda-mindakomi tu torronapa, la marangke tu kalena lan tondokna ualinna natumang kakelokanna sia diona duka kakelokanna nene’ to dolona, anna marangke tu kalena, susitu nene’ to dolona.

⁴⁰Apa iake naakui tu kakelokanna sia iatu kakelokanna nene’ to dolona, belanna katangmarurusanna, nanii umpogau’ tang maruru’ lako Kaleku sia ia duka tu naeaNa’ —

⁴¹iamoto angKu ea dukai tu tau iato mai sia Kusolan tama tondokna ualinna — , sia iake umpamadiongi kalena tu tang disunna’ penaanna sia mangkamo umpassan pakkan kakelokanna,

⁴²attu iato la Kukilalai tu basseKu sola Yakub, sia iatu basseKu sola Ishak sia iatu basseKu sola Abraham la Kukilalai, sia la Kukilalai duka tu tondok.

⁴³Apa iatu padang iato la natampe tau iato mai sia la disondai taun katorroanna, ke talomi tang napa’tondokki tau iato, sia la umpassan pakkan kakelokanna tu tau iato mai, ondongpi, belanna napamatuna tu atorangKu sia iatu penaanna ungkasorro mintu’ aluk Kupondok.

⁴⁴Apa moi torro lan tondokna ualinna, tae’ duka Kula umpamatunai sia tae’ Kukasorroi, Kuurungan ussabu’i sia Kupoka tu basseta, belanna Akumo tu PUANG, Kapenombanna.

⁴⁵Sangadinna napomelona tau iato mai, la Kukilalai tu basseKu sola nene’ to dolona, tu Kusolan tassu’ lan mai tondok Mesir, dio pentirona mintu’ bangsa, kumua Akumo dadi Kapenombanna, Akumo tu PUANG.

⁴⁶Iamote tu mintu’ aluk dipondok sia atoran sia sukaran aluk, tu Napamanassa PUANG lan alla’Na anna mintu’ to Israel dao buntu Sinai tu nalopian Musa.