Read Toraja-Sa'dan SURA’ KATOMINAAN 3 Bible Online

SURA’ KATOMINAAN 3 - Toraja-Sa'dan bible

SURA’ KATOMINAAN 3

¹Iatu pemala’na ke pemala’ kasalamaran, sia iake sapi napemalaran, la napennoloan lako PUANG tu misa’ sapi laki ba’tu birang tu tae’ tattanna.

²La naremme’ tu ulu pemala’na sia la natunu dio to’ ba’ba Tenda Kasitammuan, sia iatu rarana la napa’pi’pikan to minaa, iamotu mai anakna Harun, tiku lao dao inan pemalaran.

³Iatu pemala’ kasalamaran tu dipopemala’ pantunu la napennoloan lako PUANG tu kampipi’na sia mintu’ lompo dio lu tambuk barinni’ iato,

⁴sia bale’ke’na da’dua sola lompona dio, sia iatu lompo aakna sia tampak atena; la naalai sola bale’ke’na.

⁵Mintu’na to la natunu anakna Harun dao inan pemalaran, iamotu dao pemala’ ditunu pu’pu’, dao kayu, tu ditamben dao api, la dipopemala’ pantunu dipobau busarungngu’ dio oloNa PUANG.

⁶Iatu pemala’na, ke misa’ domba ba’tu bembe’ napopemala’ kasalamaran lako PUANG, la napennoloan tu misa’ patuoan tae’ tattanna, iamotu lakinna ba’tu birangna.

⁷Iake domba tu la napemalaran, la napennoloan dio oloNa PUANG,

⁸sia la naremme’ tu ulu pemala’na, anna tunui dio to’ ba’ba Tenda Kasitammuan, sia iatu rarana la napa’pi’pikan anakna Harun tiku lao dao inan pemalaran.

⁹Iatu pemala’ kasalamaran la napennoloan tu lompona dipopemala’ pantunu lako PUANG, iamotu mintu’ ikko’ malompona, tu sipatu nata’takki sikandappi’ buku boko’na, sia iatu kampipi’na sia iatu lompo dio lu tambuk barinni’ iato.

¹⁰Ia duka tu bale’ke’na da’dua sola lompona dio, sia iatu lompo aakna sia balaan atena; la naalai sola bale’ke’na.

¹¹Mintu’nate la natunu to minaa dao inan pemalaran, la dadi kande dipopemala’ pantunu lako PUANG.

¹²Iatu pemala’na ke misa’i bembe’ birang, la napennoloan dio oloNa PUANG;

¹³la naremme’ tu ulunna, anna tunui dio to’ ba’ba Tenda Kasitammuan, sia iatu rarana la napa’pi’pikan anakna Harun tiku lao dao inan pemalaran.

¹⁴Iatu iannato la napennoloan tu pemala’na, dipopemala’ pantunu lako PUANG, iamotu kampipi’na sia iatu lompo dio lu mintu’ tambuk barinni’ iato;

¹⁵ia duka tu bale’ke’na da’dua sola tu lompona dio sia iatu lompo aakna sia balaan atena; la naalai sola bale’ke’na.

¹⁶Mintu’nate la natunu to minaa dao inan pemalaran, la dadi kande dipopemala’ pantunu, la dadi bau busarungngu’; mintu’na tu lompo iamo dipapatuan PUANG.

¹⁷Iamote tu misa’ apa dipondok matontongan la misiosso’i dio lu mintu’ inan minii torro, kumua da mikandei tu lompo sia iatu rara.