Read Toraja-Sa'dan SURA’ KATOMINAAN 6 Bible Online

SURA’ KATOMINAAN 6 - Toraja-Sa'dan bible

SURA’ KATOMINAAN 6

¹Ma’kadami tu PUANG lako Musa Nakua:

²Iake denni misa’ tau umpogau’ kasalan sia tang maruru’ lako PUANG sia messakka’ lako sangtondokna tu diona apa dipopenanna, ba’tu apa dipa’pentoean lako kalena, ba’tu apa narampa, ba’tu untoro’ apanna sangtondokna,

³ba’tu urruru apa pa’de, anna messakka’ sia umpalao sumpa tang tongan diona apa-apa, tu napogau’ tau, tu nanii umpogau’ kasalan,

⁴iake umpogau’i kasalan susito, sia iake denni sala, la napasule tu apa narampa, ba’tu apa natoro’, ba’tu iatu apa dipopenanna lako kalena, ba’tu iatu apa pa’de anna rurui,

⁵ba’tu apa-apa tu nanii umpalao sumpa tang tongan. La napasulean ganna’ tu sondana sia la narangngannipa pissan taa pellimanna; anna pasulei lako puangna, iamotu allo nanii umpemalaranni tu pemala’na belanna kasalan.

⁶La napemalaran lako PUANG tu misa’ domba laki tang tattan dio mai domba sia bembe’, dibutunganni angga’na, naposuru’ pangakuan sala tu la dibaa lako to minaa diposuru’ pangakuan kasalan.

⁷Napadenanni kadiseroian kasalan to minaa dio oloNa PUANG, namane dipagarri’ tu diona mintu’ apa naposala.

⁸Ma’kadami tu PUANG lako Musa Nakua:

⁹Pasanni tu Harun sia anakna kumua: Inde sia tu atoranna pemala’ ditunu pu’pu’. Iatu pemala’ ditunu pu’pu’ la torro dao dapo’ api daona lu inan pemalaran situ’turan bongi sae lako melambi’na, sia api dao inan pemalaran iato la tontong dukku.

¹⁰Iatu to minaa ma’bayu lenang lanna lu sia masseppa lenang nasamboan kalena; anna angka’i tu au pemala’ ditunu pu’pu’, to ke purami nakande pu’pu’ api, dao inan pemalaran, anna bolloanni dio sa’de inan pemalaran.

¹¹Mangkato la nalendokan tu pakeanna, anna ma’pakean senga’, anna baai tassu’ tu au iato lan mai to’ tenda lako misa’ inan masero.

¹²Na iatu api dao inan pemalaran iato la tontong dikampai, da napa’de; melambi’oi la natutungoi to minaa tu kayu dao, anna dao kayu iato la nanii umpasirundunanni tu pemala’ ditunu pu’pu’ sia dao pemala’ ditunu pu’pu’ la nanii untunui tu mintu’ lompo pemala’ kasalamaran.

¹³Dao inan pemalaran iato la tontong dikampai tu api, tae’ nama’din pa’de.

¹⁴Inde sia tu atoranna kande dipemalaran. La napemalaran anakna Harun dio oloNa PUANG dio tingayo inan pemalaran.

¹⁵Na misa’ to minaa la unnala ta’pung manisak sangka’pan dio mai kande dipemalaran sia dio mai minnakna, sia dio mai mintu’ dupa, tu dao kande dipemalaran, anna tunu nasangi dao inan pemalaran, la dipobau busarungngu’ sia la dipopemala’ pengkilalan dipemalaran lako PUANG.

¹⁶Iatu torronapa la nakande Harun sola anakna: la dikande butung pa’ranggina tang diragii dio inan maindan, dio tarampak Tenda Kasitammuan la nanii tau iato mai ungkandei.

¹⁷La ditunu tang diragii; iamo taana tau iato mai tu Kubenni dio mai tu mintu’ pemala’ pantunu lako Kaleku; iamoto tu tarru’ maindan, susitu suru’ pengkalossoran sia iatu suru’ pangakuan sala.

¹⁸Mintu’ anakna Harun tu muane ma’din ungkandei; iamote tu misa’ apa matontongan dipondokangkomi la misiosso’i tu diona pemala’ pantunu dipemalaran lako PUANG: minda-minda ungkaka’i la maindan.

¹⁹Ma’kadami tu PUANG lako Musa Nakua:

²⁰Inde sia tu pemala’, tu sipatu napemalaran Harun sola mintu’ anakna lako PUANG to allo dinii untokkoi, iamotu pissan taa sangpulona epa ta’pung manisak dipokande dipemalaran, sangsese ke melambi’, sangsese ke makaroen.

²¹La dikarang diong pamuntu sola minna’, la mupennoloan, ke mangkami dipasigerok, dipokande dipemalaran sia la mupemalaran ditepu-tepu la dipobau busarungngu’ lako PUANG.

²²Iatu to minaa, tu la ditokko dio mai mintu’ anakna la ussondai la umpogau’i tu iannate; iamote tu misa’ apa dipondok matontongan; la ditunu pu’pu’ dipemalaran lako PUANG.

²³Iatu mintu’ kande dipemalaran napopemala’ to minaa la ditunu pu’pu’, tae’ nala dikande to.

²⁴Ma’kadami tu PUANG lako Musa Nakua:

²⁵Pokadai lako Harun sia lako mintu’ anakna kumua: inde sia tu atoran suru’ pengkalossoran: dio inan dinii untunu pemala’ ditunu pu’pu’, inde dukato la dinii untunui tu suru’ pengkalossoran dio oloNa PUANG, iamoto tu tarru’ maindan.

²⁶Iatu to minaa umpemalaran suru’ pengkalossoran la nakande: la nakande dio inan maindan, iamotu dio tarampak Tenda Kasitammuan.

²⁷Iatu mintu’ apa ke naruai duku’ iato, la maindan, sia iake den rarana untibura’i pakean, la dibusukki dio to’inan maindan.

²⁸Iatu kurin mangka dipantollo’i duku’ iato, la ditesse, apa iake ditollo’ lanni kurin tambaga, la disussui sia la dibasei lan to’ uai.

²⁹Mintu’ to minaa tu muane la ungkandei tu pemala’ iato, iamoto tu tarru’ maindan.

³⁰Apa iatu mintu’ suru’ pengkalossoran tu dibaa rarana tama Tenda Kasitammuan la umpaden pengkalossoran lan bilik maindan, tae’ nama’din dikande to; la ditunu pu’pu’ iato.