Read Toraja-Sa'dan SURA’ KATOMINAAN 7 Bible Online

SURA’ KATOMINAAN 7 - Toraja-Sa'dan bible

SURA’ KATOMINAAN 7

¹Inde sia tu atoranna suru’ pangakuan sala, iamoto tu tarru’ maindan.

²Dio inan dinii untunui tu pemala’ ditunu pu’pu’, iamo la dinii untunui tu suru’ pangakuan sala; sia iatu rarana la dipa’pi’pikan tiku lao dao inan pemalaran.

³Iatu mintu’ lompona la dipemalaran sia iatu ikko’ malompona sia iatu kampipi’na.

⁴Ia duka tu bale’ke’na da’dua sia iatu lompona dio, sia iatu lompo aakna, sia balaan atena; la naalai sola bale’ke’na.

⁵Mintu’na to la natunu to minaa dao inan pemalaran, dipopemala’ pantunu dipemalaran lako PUANG: iamoto tu suru’ pangakuan sala.

⁶Mintu’ to minaa tu muane la ungkandei tu pemala’ iato, iamoto tu tarru’ maindan.

⁷Susitu diona suru’ pengkalossoran susi dukamoto tu diona suru’ pangakuan sala; iatu atoranna pada bangsia; iatu iannato napotaa to minaa, tu umpadenanni kadiseroian kasalan tete dio suru’ iato.

⁸Na iatu to minaa, tu umpemalaran pemala’ ditunu pu’pu’na tau — iatu kuli’na pemala’ ditunu pu’pu’ napemalaran la napotaa to minaa iato.

⁹Mintu’ tu kande dipemalaran tu ditunu lan dapo’ sia mintu’ apa diba’te lan panti sia diong pamuntu la napotaa to minaa umpemalaranni, iamoto tu taana.

¹⁰Iatu mintu’ kande dipemalaran, tu dipasigerok minna’ ba’tu iatu marangkena, la napotaa mintu’ anakna Harun, pantan la den taana.

¹¹Inde sia tu atoranna pemala’ kasalamaran tu la napemalaran tau lako PUANG.

¹²Iake den tau umpemalaranni tu iannato napopemala’ pa’pudian, la napemalaran situang pemala’ pa’pudian ba’tu pira-pira pa’ranggina tang diragii dipasigerok minna’, sia pa’ranggina manipi’ tang diragii dipasapui minna’, sia ta’pung manisak, tu dipasiraunnamo minna’, iamotu pa’ranggina dipasigerok minna’.

¹³La napennoloan tu pemala’na sisola ba’tu pira-pira pa’ranggina ta’pung diragii digaragai, situang tu pemala’ pa’pudian dipopemala’ kasalamaranna.

¹⁴Na iatu pemala’ iato pantan tama la napennoloan misa’; la dipamarimbanganan PUANG: iamoto tu la napotaa to minaa tu umpa’pi’pikan rara pemala’ kasalamaran.

¹⁵Na iatu duku’ pemala’ pa’pudian dipopemala’ kasalamaranna la dikande to allo nanii umpemalaranni; moi misa’ apa tae’ la dipatorro sae lako masiangna.

¹⁶Iake iatu pemala’ direre’ tu napopemala’, misa’ pemala’ pangallonan, ba’tu misa’ pemala’ tanning inaa, la dikande bangsiamo lan to allo nanii umpemalaranni tu pemala’ direre’, sia iatu torronapa ma’dinmo dikande, ke masiangmi.

¹⁷Apa ianna denpa torro tu duku’ pemala’ direre’, ke masiangmi, la ditunu mampu’, ke allo ma’pentallunna.

¹⁸Apa ianna dikande tu duku’ pemala’ kasalamaranna, ke allo ma’pentallunna, iatu tau umpemalaranni tae’ naalai penaanNa PUANG, tang direken tu napomelona; apa megi’giran tu iannato, sia minda-minda ungkandei iamo ia umpassanni tu kakadakeanna.

¹⁹Sia iatu duku’ pemala’ narua apa maruttak tae’ nama’din dikande sangadinna la ditunu mampu’; apa iatu duku’ pemala’ minda-minda masero, ma’din nakande.

²⁰Apa minda-minda ungkandei tu duku’ pemala’ kasalamaran tu apanNa PUANG, anna den maruttakna dio kalena, tau iato la disabu’i dio mai sangtondokna.

²¹Susi dukato, minda-minda ungkaka’i tu apa maruttak ba’tu maruttakna tau ba’tu olo’-olo’ maruttak ba’tu misa’ olo’-olo’ mendonglo’ maruttak, anna kandei tu duku’ pemala’ kasalamaran, tu apanNa PUANG, tau iato la disabu’i dio mai sangtondokna.

²²Ma’kadami tu PUANG lako Musa Nakua:

²³Pokadanni to Israel kumua: Da mikandei tu lompo sapi, ba’tu lompo domba, ba’tu lompo bembe’.

²⁴Iatu lompo olo’-olo’ mate, ba’tu lompo olo’-olo’ dibesse-besse ma’din sia dipake dio lu ma’rupa-rupa pengkarangan, apa da len mikandei.

²⁵Belanna minda-minda ungkandei tu lompo patuoan, tu dinii unnalai pira dipemalaran pemala’ pantunu lako PUANG — iatu to ungkandei to, la disabu’i dio mai sangtondokna.

²⁶Susi dukato lan lu mintu’ inan minii torro da mikande rara, la rara manuk-manuk, la rara patuoan.

²⁷Minda-minda ungkande rara moi rara apa, tau iato la disabu’i dio mai sangtondokna.

²⁸Ma’kadami tu PUANG lako Musa Nakua:

²⁹Pokadai lako to Israel kumua: Minda-minda umpemalaran pemala’ kasalamaran lako PUANG, la napennoloan sangtaan pemala’ kasalamaranna lako PUANG la dipopemala’.

³⁰Limanna kalena la umpennoloanni tu pemala’ pantunu tu dipemalaran lako PUANG; la napennoloan tu lompona sola dadanna; na iatu dadanna la disorong ditarima sule dio oloNa PUANG dipopemala’ disorong ditarima sule.

³¹La natunu to minaa tu lompona dao inan pemalaran, apa iatu dadanna la napotaa Harun sola mintu’ anakna.

³²Na iatu pesese kananna la miben to minaa dipamarimbangan dio mai pemala’ kasalamarammi.

³³Minda-mindai tu mai anakna Harun, tu umpemalaran rara pemala’ kasalamaran sia lompona, iamo la umpotaai tu pesese kananna.

³⁴Belanna iatu dada disorong ditarima sule sia iatu pesese dipamarimbangan Kuala dio mai to Israel, iamotu dio mai pemala’ kasalamaranna, Angku benni Harun, to minaa, sia lako mintu’ anakna; iamotu misa’ apa dipondok matontongan lako mintu’ to Israel.

³⁵Iamote tu taa maserona Harun sia mintu’ anakna dio mai tu mintu’ pemala’ pantunu, dipemalaran lako PUANG, lan allo Nanii umpopengkareke’i tu tau iato la untoe pentoean to minaa ungkamayai PUANG.

³⁶Iatu iannato Napepasanan PUANG la diben tau iato mai pamenganna to Israel lan tu allo Nanii untokkoi, iamoto tu misa’ apa dipondok matontongan nasiosso’i.

³⁷Iamote tu atoran pemala’ ditunu pu’pu’, tu kande dipemalaran, tu suru’ pengkalossoran, tu suru’ pangakuan sala, tu pemala’ pa’tokkoan sia tu pemala’ kasalamaran,

³⁸tu Napepasanan PUANG lako Musa dao buntu Sinai, lan to allo Nanii ussua to Israel umpemalaran pemala’na lako PUANG lan padang pangallaran Sinai.