Read Toraja-Sa'dan SURA’ KATOMINAAN 9 Bible Online

SURA’ KATOMINAAN 9 - Toraja-Sa'dan bible

SURA’ KATOMINAAN 9

¹Iatonna allo ma’pengkaruamo natambaimi Musa tu Harun sola tu mai anakna sia mintu’ pekaamberan to Israel sirampun.

²Ma’kadami lako Harun nakua: Alangko kalemu misa’ anak sapi iamotu misa’ sapi mangura, la diposuru’ pengkalossoran, sia misa’ domba laki la dipopemala’ ditunu pu’pu’, tu tae’ tattanna, ammu pennoloanni lako PUANG.

³Sia la mupokada lako mintu’ to Israel kumua: Alakomi misa’ bembe’ laki diposuru’ pengkalossoran, sia misa’ anak sapi sia misa’ domba tu sangtaunmo sia tae’ tattanna la dipopemala’ ditunu pu’pu’.

⁴Sia misa’ sapi sia misa’ domba la dipopemala’ kasalamaran, la dipemalaran dio oloNa PUANG, sola misa’ kande dipemalaran dipasigerok minna’, belanna allo iamote Nala sombo tu PUANG lako kalemi.

⁵Nabaami tau iato mai tu mintu’ apa napepasanan Musa sae lako to’ Tenda Kasitammuan, anna sae mengkareke’ tu mintu’ kasirampunan iato, sia bendan dio oloNa PUANG.

⁶Ma’kadami tu Musa nakua: Inde sia tu apa Napepasanan PUANG lako kalemi ammi pogau’i, kumua anna sombo tu kamala’biranNa PUANG lako kalemi.

⁷Ma’kadami tu Musa lako Harun nakua: Mengkareke’ko lako inan pemalaran sia parandanmi tu suru’ pengkalossorammu sia pemala’ ditunu pu’pu’mu sia padenanni kadiseroian kasalan tu kalemu sia bangsa iato; mangkato mumane umparandanni tu pemala’na bangsa iato, ammu padenanni kadiseroian kasalan susitu Napepasanan PUANG.

⁸Mengkareke’mi tu Harun lako to’ inan pemalaran, anna tunui tu anak sapi la naposuru’ pengkalossoran kalena.

⁹Nabaami anakna Harun tu rara iato lako anna otonni tu rakka’na tama to’ rara iato nararanni tu tanduk inan pemalaran; na iatu rara torronapa nabolloan lako to’ lette’ inan pemalaran.

¹⁰Apa iatu lompona sia iatu bale’ke’na sia iatu balaan atena suru’ pengkalossoran natunu dao inan pemalaran susitu Napepasanan PUANG lako Musa.

¹¹Apa iatu duku’na sia balulangna natunu mampu’ dio lu salianna to’ tenda.

¹²Mangkato natunumi tu pemala’ ditunu pu’pu’, anna tadoanni anakna Harun tu rarana lako ambe’na, anna pi’pikki tu inan pemalaran tiku lao.

¹³Natadoan duka tu pemala’ ditunu pu’pu’, tu dita’tak-ta’tak sisola tu ulunna, anna tunu nasangi dao inan pemalaran.

¹⁴Nabaseimi tu tambuk barinni’na sola tu gariginna, anna tunui dao pemala’ ditunu pu’pu’ daona lu inan pemalaran.

¹⁵Mangkato napemalarammi tu pemala’na bangsa iato; naalai tu bembe’ laki la diposuru’ pengkalossoranna bangsa iato, anna tunui sia naparandanmo diposuru’ pengkalossoran, susito bunga’na dipogau’.

¹⁶Napemalarammi tu pemala’ ditunu pu’pu’, anna karangi situru’ tu atoranna.

¹⁷Mangkato mesuami umbaai tu kande dipemalaran, anna alai sangka’pan, anna tunui dao inan pemalaran napasituru’ tu pemala’ ditunu pu’pu’ melambi’.

¹⁸Natunu dukami tu sapi sia iatu domba laki la dipopemala’ kasalamaranna bangsa iato, anna anakna Harun untadoanni tu rara iato, anna pi’pikanni inan pemalaran tiku lao.

¹⁹Apa iatu mintu’ lompo sapi sia ikko’ malompona domba laki, sola tu kampipi’na sia iatu bale’ke’na sia iatu balaan atena,

²⁰mintu’ te lompo tiira’mo napatoppo’ dao dada dita’tak-ta’tak, anna tunui tu mintu’ lompo iato dao inan pemalaran.

²¹Iatu dada dita’tak-ta’tak sia iatu pesese kanan nasorongi sia natarimai sule Harun dipopemala’ disorong ditarima sule dio oloNa PUANG, susitu mangka napepasanan Musa.

²²Naangka’mi Harun tu limanna daona lu bangsa iato anna passakkei; mangkato mengkalaomi, tonna mangka umpemalaranni tu suru’ pengkalossoran, sia iatu pemala’ ditunu pu’pu’ sia pemala’ kasalamaran.

²³Malemi tama Tenda Kasitammuan tu Musa sola Harun, anna tassu’ sule umpassakkei tu bangsa iato, anna sombo tu kamala’biranNa PUANG lako bangsa iato.

²⁴Tassu’mi tu api dio mai oloNa PUANG ungkandei tu pemala’ ditunu pu’pu’ sia iatu mintu’ lompo tiira’na dao inan pemalaran; iatonna tiromi bangsa iato tu iannato, siarrakammi anna tukku sae rokko padang.