Read Toraja-Sa'dan YEREMIA 10 Bible Online

YEREMIA 10 - Toraja-Sa'dan bible

YEREMIA 10

¹Perangiimi tu kada tu Napokada PUANG lako kalemi, e bati’na Israel!

²Inde sia tu kadanNa PUANG, Nakua: Da mipeolai tu lalanna mintu’ bangsa sia da mipotirambanni tu mintu’ tanda dao langi’, belanna napotiramban mintu’ bangsa.

³Belanna iatu pekaalukanna mintu’ bangsa tae’ gai’na: belanna iatu apa iato susito kayu sanglongki’ lan mai pangala’, iamo panggaraga to pande tu diuasei;

⁴nabeloi salaka sia bulaan; namanda’i ba’tu pira-pira paku sia napa’tong pepa’tong, kumua da natigoyang.

⁵Iatu rapang-rapang dipodeata iato susi payo-payo lan pa’lak katimun tang naissan ma’kada-kada; dibulle bangpi, belanna tang naissan lumingka. Da mikataku’i, belanna tae’ napogau’ kadake, sia umpogau’ kameloan tae’ duka dio kalena.

⁶Moi misa’ tau tae’ tu padamMi, o PUANG! PasareonganKomi sia pasareongan tu sangamMi umpapayan kamatotoran.

⁷Mindara tu la tang ungkataku’Komi, o Datunna mintu’ bangsa? Manassa Kamu tu sipatu dikataku’! Belanna dio lu to matarru’na mintu’ bangsa sia mintu’ datunna tau iato mai tae’ tu padamMi.

⁸Iatu tau iato mai baga sia bebe’, belanna tae’ naangga’i tu pangadaran iato, kayu bangsia ia to.

⁹Iatu salaka dibabak dibaa dio mai Tarsis, na iatu bulaan dio mai Ufas, panggaraga to manarang sia pa’tampa pande bulaan la dikalasaranni sia iatu pakeanna lango-lango sia lango-lango makaseda; mintu’nato pengkarangan to pande.

¹⁰Apa PUANG, Iamo Kapenomban tongan, Iamo Kapenomban tuo sia Datu matontongan; tete dio kare’dekanNa anna tigega’ tu lino sia iate mai bangsa tae’ untananni tu kasengkeanNa.

¹¹— La susi kadammi lako tau iato mai, kumua: Iatu mintu’ deata, tu tae’ napadadi langi’ sola lino, la pa’de dao mai kuli’na padang sia lan mai nasambo langi’, —

¹²Iamo Puang tu mangka umpadadi lino tete dio kamatotoranNa sia tu umpatepu lipu daenan tete dio kakinaanNa sia umballa’ langi’ tete dio tangnga’ kinaanNa.

¹³Iake umpatassu’i kadanNa, mongngo’ tu uai dao langi’ sia umpakendek salebu’ dio mai randan langi’; Ia umpadadi kila’ naturu’ uran, sia umpatassu’ angin lan mai pa’palumpunanNa.

¹⁴Attu iato iatu mintu’ tolino baga sia tang paissan; iatu mintu’ pande bulaan natoding siri’ diona rapang-rapang dipodeata, belanna iatu mintu’ pa’pati’no’na tae’ natongan, sia tae’ penaa lan.

¹⁵Mintu’nato tae’ gai’na sia misa’ panggaraga pa’popetaa; iake narampoi ukungan, sabu’mi.

¹⁶Apa tae’ nasusito tu taana Yakub; Iamo Tokumombong sanda mairi’ sia garonto’ mana’Na to Israel: tu digente’ PUANGna mintu’, ma’dandan maritik.

¹⁷Angka’i tu pa’bungku’mu diong mai padang, e iko tu dipatama limbu.

¹⁸Belanna inde sia tu kadanNa PUANG Nakua: Tonganna, iate attu iate la Kutua’ tu pa’tondokan iato sia la Kupakapussakan tu tau iato mai, anna kabu’tui.

¹⁹A’a dikka’ tu aku belanna balalaku! Tumbai mapa’di’na tu bangkeku. Manassa la ma’kadana’ kukua: Io, sipatu la kuperasai te pa’di’ iate.

²⁰Sanggangmo tu tendaku, sia mintu’ ulangna ka’tumo; natampemo’ mintu’ anakku sia pa’demo tu tau iato mai; moi misa’ tae’mo umballa’i tu tendaku sia untoke’i tu kulambunna.

²¹Belanna mintu’ to mangkambi’ baga sia tae’ nadaka’i tu PUANG, iamoto anna tae’ napaissan sia sisarak-sarak tu mintu’ patuoanna.

²²Perangii tu misa’ kareba! Tonganna saemo tu misa’ kamarekoan kapua daa mai ulunna salu la umpopempadang lo’bangi tu mintu’ kota Yehuda napoinanni serigala.

²³Kuissan, o PUANG, kumua iatu lalanna tolino, tae’ napangeloranna kalena sia tae’ nakuasa male umpapatui tangkena.

²⁴Pa’di’na’, o PUANG, apa pasitinayai kamalamburan, da nabannang dio kasengkeamMi, da Miparatona’.

²⁵Barrakanni tu kare’dekamMi lako mintu’ bangsa, tu tae’ natandaiKomi, sia lako mintu’ pa’rapuan tu tang metamba ussa’bu’ sangamMi; belanna naampello’mo tau iato mai tu Yakub, ondongpi naampello’ sia nasappii sia napopempadang lo’bang tu tondok natorroi.