Read Toraja-Sa'dan YEREMIA 11 Bible Online

YEREMIA 11 - Toraja-Sa'dan bible

YEREMIA 11

¹Inde sia tu kada dio mai PUANG lako Yeremia, nakua:

²Perangii te kada basse iate sia ma’kadako lako mintu’ to Yehuda sia to lan Yerusalem,

³sia pokadanni tau iato mai, kumua: Inde sia tu kadanNa PUANG, Kapenombanna to Israel, Nakua: Tampak ropu lako tu tau tae’ naperangii tu kada basse iate,

⁴tu Kupepasanan lako nene’ to dolomi to allo Kunii umpatassu’i lan mai tondok Mesir, lan mai dapo’ bassi, Kukua: Perangii tu gamarangKu sia pogau’i tu mintu’ apa tu Kupepasanan lako kalemi, ammi dadi taungKu anna Aku dadi Kapenombammi,

⁵angKu parampo randannai tu apa Kupalaoammo sumpa unnallu’i lako nene’ to dolomi, la ungkamaseanni misa’ padang, tu sebo pangandu’ sia tani’ enoan, susitu naappa’ allo totemo. Mebalimo’ angku ma’kada kukua: Amin, o Puang.

⁶Ma’kadami PUANG lako kaleku, Nakua: Pa’peissananni te mintu’ kada iate lan lu mintu’ kota Yehuda sia dio lu mintu’ batatta Yerusalem, kumua: Perangii te mintu’ kada basse iate sia palaloi.

⁷Belanna Kutonganni tongan unnada’i tu nene’ to dolomi allo iato tongKu patassu’i tu tau iato mai lan mai tondok Mesir sae lako allo iate, ke makale’ sia ke karoen kumua: Perangii tu gamarangKu.

⁸Apa tae’ naperangii tu tau iato mai sia tae’ natananni talinga, sangadinna pada lolang unturu’ kamakarrasan penaa kadakena: iamoto angKu parampoanni tu kada basse iate, tu Kupepasanan ungkaritutui, apa tae’ nakaritutui.

⁹Sia Nakuapa PUANG lako kaleku: Diapparammo tu kasipakulu-kuluan dio lu to Yehuda sia to lan tondok Yerusalem.

¹⁰Tibalikmo tu tau iato mai lako kakadakeanna nene’ to dolona, tu mengkailing umperangii kadangKu, sia menturu’ lako tu deata la umpenombai; iatu to Israel sia to Yehuda umpokamo basseKu, tu Kutanan Kusibassei nene’ to dolona.

¹¹Iamoto, nakua kadanNa PUANG: Manassa la Kuparampoi kasanggangan tu tau iato mai, natae’ nama’din tu tau iato mai lessu’ dio mai; iake meongli’i tu tau iato mai lako Kaleku, tae’ angKu la umperangii.

¹²Da’ito nameongli’ tu mintu’ kota Yehuda sia mintu’ to lan Yerusalem lako deata, tu nanii umpennoloan pemala’ ditunu; apa tae naia la urrampananni tu tau iato mai, ke narampoimi kasanggangan.

¹³Belanna pada bilanganna tu mintu’ tondokmu, pada dukato tu mupa’deatainna, e to Yehuda, sia pada bilanganna tu mintu’ lalan lan Yerusalem, pada dukato tu inan pemalaran tu mipabendanan deata dipotattan, iamotu inan pemalaran tu minii umpennoloan pemala’ ditunu lako Baal.

¹⁴Iato iko, da mupassambayanganni te bangsa iate sia da mupangandoanni ba’tu umpengkamoyanni, belanna tae’ Kuperangii, ke metambai lako Kaleku diona kamaparrisanna.

¹⁵Apa todara natungkanan pa’kaboro’Ku lan banuangKu? La umpalaloraka tangnga’ kadakena? Ma’dinraka tu gau’ sia duku’ maindan umpalendu’i dio mai kalemu tu kasanggangan urrampoiko? Iake susito, la unnarrak-arrakko!

¹⁶Nasangaimoko PUANG garonto’ saitun maluna sia maelo diona bua malapu’na; iatonna kandei api tu daunna sikanetekan sia napissanni api tu tangkena.

¹⁷Belanna PUANGna mintu’ ma’dandan maritik tu untananko, mangkamo umpokada misa’ kasanggangan la urrampoiko, napobua’ kakadakean napogau’ to Israel sia to Yehuda la umpa’dikki penaangKu tete dio kaumpennoloanna pemala’ ditunu lako Baal.

¹⁸PUANG umpaissannina’ tu iannato, iamoto angku issanni; attu iato Mipaombo’i lako kaleku tu penggauranna tau iato mai.

¹⁹Iatu aku susina’ anak domba tang paissan, tu direnden la ditunu sia tae’ kutandai tu kasipakulu-kuluanna tau iato mai la unneana’, tu ma’kada nakua: Maikomi tasanggangi tu kayu iato sola buanna, melo ke tasabu’i lan mai tondok to tuo, damo nakilalai tau tu sanganna.

²⁰Apa o PUANGna mintu’ ma’dandan maritik, Tomangra’ta’ malambu’ sia tu untoba ba’teng sia penaa, inang la kutiro tu pa’bala’Mi lako tau iato mai, belanna lako Kalemi kunii ussorongi tu kara-karaku.

²¹Iamoto nakua kadanNa PUANG diona tu to Anatot, tu la ungka’tu sunga’mu sia tu ma’kada nakua: Da muma’nubua’ tete dio sanganNa PUANG, da mumate kipatei —

²²iamoto nakua kadanNa PUANGna mintu’ ma’dandan maritik: Manassa la Kuukung tu tau iato mai; iatu mintu’ to mangura la mate nakande pa’dang sia iatu mintu’ pia muane sia pia baine la mate karorian,

²³sia moi misa’ tae’mo la torro tu tau iato mai; belanna iake taun kadiukungannamo, Aku la umparampoi kasanggangan tu to Anatot iato.