Read Toraja-Sa'dan YEREMIA 15 Bible Online

YEREMIA 15 - Toraja-Sa'dan bible

YEREMIA 15

¹Apa Nakua PUANG lako kaleku: Moi anna Musa sola Samuel bendan dio oloKu, tae’ duka nala unnalai penaangKu te bangsa iate; papallai tu tau iato mai dio mai oloKu, suai male.

²Sia iake mekutanai tu tau iato mai lako kalemu kumua: Umba la kiola? la mukua lako: Inde sia tu kadanna PUANG, Nakua: Minda tu dipamanassa la mate, la mate, minda tu dipamanassa nakande pa’dang, la nakande pa’dang, minda tu dipamanassa la karorian, la karorian sia minda tu dipamanassa la dipali’, iamo la dipali’.

³Tonganna Aku la umparampoi patang rupa kasanggangan tu tau iato mai, kadanNa PUANG: iamotu pa’dang la umpatei sia asu la urriu’-riu’i sia manuk-manuk dao langi’ sola olo’-olo’ dao kuli’na padang la umpetarii nakande sia ussepak-sepakki.

⁴Sia la Kupadadi misa’ apa metakuran tu tau iato mai lako mintu’ kadatuan lan lino, belanna Manasye, anakna Hizkia, datu Yehuda tu diona apa mangka napogau’ lan Yerusalem.

⁵Belanna mindapara tu la ungkamaseiko, e Yerusalem, sia mindapara la umpokariangangko, ba’tu mindapara la lempang umpekutanangko.

⁶MangkaMo’ mutampe, kadanNa PUANG, sia memboko’moko, iamoto angKu unnangka’ limangKu unneako sia ussanggangko, belanna mata’ka’ bangMo’ menassan.

⁷Tonganna Aku unta’pii barang tu tau iato mai lan mintu’ babangan tondok; Aku umpasisayuranni anak, sia ummangsanni tu taungKu. Apa tae’ duka natibalik tu tau iato mai dio mai lalanna.

⁸Iatu bilanganna mintu’ baine balunna tau iato mai la Kupabuda anna bungin dio biring tasik; la Kupasaean misa’ to ma’kasanggang, ke tangngai allo, tu tau iato mai, iamotu indo’ sia to mangura. Ta’pa la Kuparampoi kamatakuran sia ma’patirambanna tu tau iato mai.

⁹Iatu baine pempitumo kianak bonnongmo nasa’ding sia ma’ipu; lambunmo tu allona tonna masiang siapa, kasirisammo sia ka’tu rannunna. Ondongpi iatu torronapa, Kusorong la nakande pa’dang dio pentirona mintu’ ualinna, kadanNa PUANG.

¹⁰Upu’ alloku, o indo’ku, belanna midadiammo’, misa’ to te’geran, misa’ to passipakkan lako mintu’ pa’tondokan; tae’ kuma’peindan sia tae’ kukaindanan, apa pa’gantanna manna tau lako kaleku.

¹¹Ma’kadami PUANG Nakua: Manassa la Kurampanangko ammu pomeloi. Iake attu kamandasan sia kapussakan manassa la Kupasae tu to unneako umpalaku pa’tunduan lako kalemu.

¹²La tesseraka tu bassi, iamotu bassi lu daa mai sia tambaga?

¹³Mintu’ barang apammu sia mintu’ iananmu la Kupa’bengan butung pangrampa, tu tang dialli, napobua’ mintu’ kasalammu lan mintu’ lili’na tondokmu.

¹⁴Sia la Kupopengkaunanko lako ualimmu lan misa’ padang tu tae’ mutandai belanna dukkumo misa’ api tete dio kare’dekangKu, la umballakomi.

¹⁵O PUANG, Kamu unnissanni, kilalaina’ dikka’, pokarianganna’ sia pembalaranna’ lako mintu’ to unnula’na’! Da Misabu’ina’ tete dio pesuka’ kalandoMi; tandai, kumua untanggungna’ kaditattan belanna Kamu.

¹⁶Umba-umba kunii unnapparan kadamMi, kukande sia iatu kadamMi kuporannu sia naposende penaangku; belanna iatu sangamMi disa’buranna’, o PUANG Kapenombanna mintu’ ma’dandan maritik.

¹⁷Tae’ lenpa kuunno’ko’ lan kasirampunanna to sipetaa-taan la umpasende kaleku; natoemo’ limamMi, iamoto angku misa-misa unno’ko’, belanna Mipatutu’imo’ kasengkean.

¹⁸Ma’apai anna tae’ upu’na tu pa’di’ku sia tae’ namondo tu bangkeku sia tae’ nasikemun? Iatu Kamu tonganna butung to salu’-salu’ marangke lako kaleku, susito uai ka’to’.

¹⁹Iamoto, nakua kadanNa PUANG; iake mengkatoba’ko, manassa Aku unnangka’ko sule, ammu bendan dio oloKu; sia iake mupokadai tu kebattuananna sia tang ma’kada matampo, manassa la Kuposumbung pudukko. Melo ke tibalikki tu tau iato mai lako kalemu, apa da na iko tibalik lako kalena.

²⁰Iake susito la Kupadadiko rinding tambaga untingoi te bangsa iate tu tang dikulle ussanggangi moi anna la ullaoiko tu tau iato mai, apa tae’ nataloko, belanna Aku la urrondongko sia la untunduiko sia la urrampanangko, kadanNa PUANG.

²¹Sia la Kurampanangko lan mai limanna to kadake sia la Kulendokangko lan mai pa’takungkungna to masa’ga’.