Read Toraja-Sa'dan YEREMIA 16 Bible Online

YEREMIA 16 - Toraja-Sa'dan bible

YEREMIA 16

¹Saemi kadanNa PUANG lako kaleku, Nakua:

²Da mukebaine sia da naden anakmu muane sia baine lan inan iate.

³Belanna nakua kadanNa PUANG tu diona mintu’ pia muane sia baine, tu dadi lan inan iate sia diona mintu’ indo’na tu ungkianakanni sia diona mintu’ ambe’na tu undadianni lan padang iate:

⁴Iatu tau iato mai la mate napobua’ ra’ba biang, anna tae’ nadibatingi sia tae’ nadilamun anna dadi pangangku’ dio lu padang sia la karorian anna iatu batang rabukna la napopendurukan manuk-manuk dao lu langi’ sia olo’-olo’ dao kuli’na padang.

⁵Belanna nakua kadanNa PUANG: Da mutama banuanna to mario-rio sia da mumale umbatingi sia da’mutongkonni tu tau iato mai, belanna Kulendokammo dio mai tau iato mai tu kasalamaran Kupataranakanni sia kamaturu-turuan sia kamamasean, kadanNa PUANG.

⁶La to kapua la to bitti’ la mate lan tondok iate sia tae’ nadilamun tu tau iato mai sia tae’ nala umbatingi tau, sia moi misa’ tau tae’ untori-torianni kalena ba’tu unggalettunganni ulunna.

⁷Sia tae’ tau sae unti’pek-ti’pek roti tanda maindunna la umpakatana to kamatean, sia la umbenni pangiru’ pa’pakatana, moi anna ambe’na ba’tu indo’na.

⁸Sia da mutama banua pa’maruasan la unno’ko’ kumande sia mangiru’ sola tu tau iato mai.

⁹Belanna nakua kadanNa PUANGna mintu’ ma’dandan maritik, Kapenombanna to Israel, kumua: Tonganna la Kupa’dei tu arrak kaparannuan sia kamaruasan sia gamara to ma’rampanan kapa’ dio pentiromi sia iato ke linomipi.

¹⁰Iake muparampoi te mintu’ kada lako bangsa iate, sia ma’kada lako kalemu kumua: Ma’apai Napokadai PUANG te kasanggangan kapua iate la urrampoikan sia apara kakadakeangki sia kasalangki tu kipogau’ lako PUANG, Kapenombangki? —

¹¹La mupokada lako tau iato mai, kumua: Belanna natampeMo’ nene’ to dolomi, kadanNa PUANG, sia unturu’mo kapenomban senga’ sia umpengkaolai sia tukku umpenombai sia natampeMo’ sia tae’mo nakaritutui tu Sukaran alukKu.

¹²Sia belanna kamu te umpogau’ kakadakean losong anna nene’ to dolomi, iamotu pada unturu’mokomi kamakarrasan penaa kadakemi sia manoka umperangiiNa’,

¹³iamoto la Kutibekomi lan mai tondok iate lako misa’ tondok tang mitandai, la kamu la nene’ to dolomi na inde to dio nanii mengkaola lako kapenomban senga’ ke allo sia ke bongi, belanna tae’mo Kula ungkaturu-turuikomi.

¹⁴Iamoto, manassa la sae tu allona, kadanNa PUANG, ke tae’mi nakuai tau: La lelukraka tuoNa PUANG, tu ussolan to Israel lan mai tondok Mesir.

¹⁵Sangadinna la lelukraka tuoNa PUANG tu ussolan to Israel lan mai tondok daa ulunna salu sia lan mai mintu’ tondok, tu dinii mangka unnula’i male; manassa Aku la ussolanni sule tu tau iato mai lako padang tu mangka Kukamasean nene’ to dolona.

¹⁶La ussuaNa’ to mebale buda, kadanNa PUANG, anna ia untingkanni tu tau iato mai susi bale, undinnato la ussuaNa’ buda to moasu, la unnula’i dao mai mintu’ buntu sia mintu’ tanete, sia lan mai mintu’ kalo’tok batu.

¹⁷Belanna matangKu umpenunui tu mintu’ tengkana tau iato mai, sia tae’ nakabunian dio oloKu sia iatu kakadakeanna tae’ nakarerungan dio pentiroKu.

¹⁸Iamoto la dolo Kupabala’i penduan tu kakadakeanna sia kasalanna tau iato mai, belanna naruttakkimo batang rabuk megallianna sia megi’giranna tu tondokKu sia napasitutu’i apa iato tu mana’Ku.

¹⁹O PUANG, Kamumo kamatotorangku sia tambakukungku sia pentirerungangku ke allo kapussakan! Lakomo Kalemi la nanii sae tu mintu’ bangsa dio mintu’ randan langi’ sia ma’kada nakua: Kabuttokan manna tu mana’na nene’ to doloki sia apa tae’ gai’na, tu moi misa’ tae’ apa kebattuan napaden.

²⁰Ma’apai tu tolino anna garagan kapenomban kalena? Apa tangia kapenomban!

²¹Iamoto te attu iate la Kupaissanan tau iato mai, la Kupaissanan tu kamatotoranna limangKu sia kuasangKu, anna tandai kumua PUANG iamo sangangKu to.