Read Toraja-Sa'dan YEREMIA 2 Bible Online

YEREMIA 2 - Toraja-Sa'dan bible

YEREMIA 2

¹Saemi tu kadanNa PUANG lako kaleku, Nakua:

²Maleko umpokadai anna rangii mintu’ tau lan Yerusalem, kumua: Nakua kadanNa PUANG: Kukilalaipa tu kamamalirammu tommu mangura sia pa’kaboro’mu tommu ma’rampanan kapa’, tommu turu’Na’ lan padang pangallaran, iamotu dio lu padang tang dipantananni.

³Attu iato iatu Israel Napamarimbangan PUANG, sia iamo bunga’ bura padangna; minda-minda la ungkandei la dipasala sia la narampoi kamandasan, kadanNa PUANG.

⁴Perangii tu kadanNa PUANG, e mintu’ bati’na Yakub sia mintu’ pa’rapuanna Israel!

⁵Nakua kadanNa PUANG: Kakelokan apara tu naapparan nene’ to dolomi dio Kaleku, anna toyang mambela dio mai Kaleku sia unturu’ apa tae’ gai’na naurunganni tae’mo patunna?

⁶Sia tae’ nama’kada tu tau iato mai kumua: Umbara Nanii tu PUANG, tu mangka ussolangkanni tassu’ lan mai tondok Mesir sia unnanta’kan unnolai padang aak sia kalo’tokan, misa’ padang rangke sia nabayo-bayoi kamatean, misa’ padang tu tae’ lenpa nalendu’i sia natorroi tau?

⁷Kusolammokomi tama misa’ padang malompo, ammi kandei tu mintu’ buanna sia bura maelona, apa iatommi rampomo tama, mipamaruttakmo tu padangKu sia iatu mana’Ku mipopendadi apa megallian.

⁸Iatu mintu’ to minaa tae’ nama’kada kumua: Umbara Nanii tu PUANG sia mintu’ tu to sikambi’ sukaran aluk tae’ namorai untandaiNa’ sia mintu’ to mangkambi’ memboko’ dio mai Kaleku sia mintu’ nabi ma’nubua’ nalopian Baal sia unturu’ kapenomban tae’ gai’na.

⁹Iamoto la Kupaolaipokomi salu, kadanNa PUANG, ondongpi iatu ampo bati’mi la Kupaolai duka salu.

¹⁰La lambankomi lako biring tasik tondok to Kitim, tiroi dio; ba’tu suai tu tau lako Kedar sia kamantang tonganni sia tiroi dio, ke la den lenni nadadi tu a’gan susito.

¹¹Denmoraka misa’ bangsa untuka’i tu deatanna, moi anna tangia kapenomban? Apa taungKu napasituka’mo Kadipakala’biranna tu apa tae’ gai’na.

¹²La tirambankomi, e mintu’ langi’ tu diona to, ma’parondokomi sia la ka’ba’ bulummi, kadanNa PUANG.

¹³Belanna napogau’mo taungKu tu da’dua penggauran kadake: Iatu Aku, kalimbuang boba, tu natampemo tau iato mai, anna paran bubun batu kalena, iamotu bubun batu rutu’, tu tang nanii sampe uai.

¹⁴To sandangraka tu to Israel? Kaunan garonto’raka? Ma’apai anna dadimo kandena singa mangura,

¹⁵tu nasokoi sia naurrungi? Nasanggang tu padang anna lo’bang, sia naballa tu tondokna, naurunganni tae’mo tau torro lan.

¹⁶Sia iatu kararo ulunna naku’ku’i nasangmo to Memfis sia to Tahpanhes.

¹⁷Tang iko kalenaraka umpadenanni kalemu te, belanna mutampemo tu PUANG, Kapenombammu, tonNa solangko dio lu lalan?

¹⁸Ma’apari ammu male lako Mesir unniru’ uai salu Nil? Sia ma’apari ammu male lako Asyur unniru’ uai Efrat?

¹⁹Melo iatu kakadakeammu unnada’ko sia kamembokorammu dio mai Puang la umpa’dikkiko, ammu issanni sia mutandai, kumua kadake sia mapai’ tu untampe PUANG, Kapenombammu sia ke tae’i tu kamatakurammu lako Kaleku, kadanNa PUANG, PUANGna mintu’ ma’dandan maritik.

²⁰Belanna tempon diopa mai ammu tessei tu ayokamu sia muka’tuan tu peporimmu ammu ma’kada kumua: Manokamo’ la dipokaunan. Apa dio lu mintu’ tanete malangka’ sia diong lu garonto’ kayu maluna munii mamma’ ma’gau’ sala.

²¹Tang mangkarokoka Kutanan susi garonto’ anggoro’ pa’tonno’, susi banne tang karauan; ma’patumbai ammu dadi tangke tang membuanna garonto’ anggoro’ pangala’ lako Kaleku!

²²Moi mubasei soda tu kalemu sia moi mupemasabunni tongan, manassa la kanaan duka tu kakadakeammu butung ruttak dio pentiroKu, kadanNa Puangta PUANG.

²³Umba mukua la ma’kada kumua: Tae’ aku kuruttakki kaleku, tae’ aku kuturu’i tu mai Baal? Tiromi tu lalanmu diong lombok, sia la muissan tu apa mangka napogau’, e unta mangura tu ma’dondo lu lako lu dio mai.

²⁴E keledai pangala’ tu biasa dio lu padang pangallaran, ussurru’ angin natarru’ kamoraianna; mindara ma’din la undampai tu kakurasanna? Mintu’ tu undaka’i damo namasussa, belanna naapparan ke bulan kakurasannai.

²⁵La mukanandai tu lette’mu, da nasanggang tu putu’ lette’mu sia iatu gora-goramu da namarangke; apa mukua: tae’, tae’mo gai’na, belanna kukamali’ tu to sae.

²⁶Susi misa’ to boko kasirisan, ke diapparanni, susi dukamoto tu to Israel natoding siri’; iamotu tau iato mai sia mintu’ datunna sia arungna sia to minaanna sia nabinna,

²⁷tu ma’kada lako sanglongki’ kayu, nakua: Kamumo tu ambe’ku, na lako misa’ batu, nakua: Kamumo tu undadianna’. Belanna natanananNa’ sokkongna tu tau iato mai, tangia lindona, apa iatonna kamaparrisanna, ma’kadami nakua: Ke’de’Komi o Puang, amMi rampanangkanni!

²⁸Umba nasangmira nanii attu iato tu mintu’ rapang-rapang mupodeata tu mangka mugaraga? Melo ke bendanni tu tau iato mai, nakulle sia manii urrampanangko, ke allo kamaparrisammu; belanna pada bilanganna mintu’ tondokmu, pada dukato, tu mintu’ deatammu, e to Yehuda.

²⁹Ma’apai ammi la ussite’geranNa’? anna kamu sola nasang tu memboko’ dio mai Kaleku, kadanNa PUANG.

³⁰Tae’ gai’na Kubamba tu anakmi, inang tae’ namorai untarima peada’; iatu pa’dangmi ungkandemo mintu’ nabimmi susi singa ma’sa’mak.

³¹E kamu to dadi totemo, perangii tu kadanNa PUANG: Denraka Kususi to padang aak lako to Israel, ba’tu susito padang mapattang? Ma’apai anna ma’kada tu taungKu, nakua: Mallaimokanni, tae’mo kila sae lako Kalemi?

³²Denraka misa’ baine mangura tang ungkilalai belona, ba’tu misa’ baine diparampo tang ungkilalai pepori aakna? Apa taungKu masai allomo tang ungkilalaiNa’.

³³Lendu’ manarangmu undaka’ lalan melo la massulo bongi! Ia dukamoto ammu popa’biasai tu lalanmu lako kakadakean.

³⁴Ondongpi iatu rara to makaasi-asi tu tae’ nakasalan kaanan dio biring dodomu tu tae’ lenpa muapparanni ungkakei banua.

³⁵Ondong polepi baranipoko ma’kada, kumua: Tae’ kukasalan, sia inang toyangmo tu kasengkeanNa dio mai kaleku. Tonganna la Kuukungko, belanna mukua: Tae’ kupogau’ kasalan.

³⁶Lendu’ ia pembudammumo ussondai lalanmu! La natodingko siri’ belanna umposande’ Mesir, susitu kanatodingammu siri’, belanna umposande’ Asyur.

³⁷Dio duka mai la munii tassu’ undudung limammu, belanna Natibemo PUANG tu tau iato mai, tu munii ussedan rannummu, muurunganni tang unnappa’i tu mudaka’na lako tau iato mai.