Read Toraja-Sa'dan YEREMIA 20 Bible Online

YEREMIA 20 - Toraja-Sa'dan bible

YEREMIA 20

¹Iatonna rangimi to minaa Pasyhur, anakna Imer, to minaa, tu pangulunna to ungkampai banuanNa PUANG, diona mintu’ kada nubua’na Yeremia,

²nabambami Pasyhur tu nabi Yeremia anna sangkalai lan babangan Benyamin daona lu, dio banuanNa PUANG.

³Iatonna masiangmo dio mai, tonna tassu’imi Pasyhur tu Yeremia lan mai sangkala, nakuami Yeremia lako: Tae’mo Nasangai PUANG tu sangammu Pasyhur, sangadinna Kamagiangantiku-lao.

⁴Belanna nakua kadanNa PUANG: La Kupadadiko misa’ apa megiangan lako kalemu sia lako mintu’ solamu; iatu tau iato mai la songka mate nakande pa’dangna ualinna anna tiroi matammu sia mintu’ tondok Yehuda la Kusorong tama limanna datu Babel, anna rampai lako Babel sia la napatei pa’dang tu tau iato mai.

⁵Mintu’ mana’na kota iate sia mintu’ daka’na sia mintu’ iananna sia mintu’ pareanan ballona datu Yehuda la Kusorong tama limanna ualinna, tu la urrampai sia unnalai sia umbaai lako Babel.

⁶Iatu iko, e Pasyhur sia mintu’ sangdadiammu la dipali’ nasangkomi sia la rampoko lako Babel sia la mateko ammu dilamun dio, la iko la mintu’ solamu, tu munii ma’nubua’ tang tongan.

⁷O PUANG, Kamu unnaranna’ sia kuturu’mo tu kadamMi; tarru’ matoto’Komi na aku, iamoto amMi patalo. Dadimo’ pa’popetaa tu’turan allo, pantan nasitelle-telleimo’ tau.

⁸Belanna iake ma’kadaona’ manassa la melallakna’, sia umpeolianona’ kamasa’garan sia pa’pakario-rio, belanna kadanNa PUANG kupobannangi ditatta sia ditelle-telle tu’turan allo.

⁹Iake ma’kadana’ kukua: Tae’mo kula ungkilalai tu PUANG sia tae’mo kula ma’kada tete dio sanganNa, dadimi lan penaangku tu susi api dukku, tu ussitutu’i kaleku umpatananni, apa tang kukulle.

¹⁰Belanna kurangimo tu tau buda sibisik-bisik — den kamaramban tiku lao — nakua: Pokadai apara tu la tatandaranni! Mintu’ solaku tu kusikadamakan ummanta-manta katobangangku sia nakua: Lalo sia manii tanaran anta ma’din umpasalai sia umpabala’i.

¹¹Apa PUANG urrondongna’ susi misa’ pa’barani lalong; iamoto mintu’ to unnula’na’ la tisumbang sia tang pakulle; la kasirisan tongan, belanna tae’ nalalo tu natangnga’na, iamo kaditattan matontongan sia tang dikalupai.

¹²PUANGna mintu’ ma’dandan maritik, iamo Tomassudi malambu’, tu untarru’ mintu’ ba’teng sia penaa; inang la kutiro tu pa’bala’Mi lako tau iato mai, belanna lako Kalemi kunii ussorongi tu kara-karaku.

¹³Penanianni tu PUANG, pudii tu PUANG, belanna Narampanan tu sunga’na to bongko dio mai limanna to kadake.

¹⁴Tampak ropu tu allo kunii dadi; nake tang maupa’i tu allo nanii indo’ku ungkianakanna’.

¹⁵Tampak ropu tu to umparampo kareba melo lako ambe’ku, kumua: Napadadiammoko misa’ pia muane. Mandu napopaiman ambe’ku tu kareba iato.

¹⁶Elo’namo tu tau iato nasusi tu mai kota Nabaliangammo PUANG, natang umpenassanni; melo ke melambi’ narangi tu sarro sia ongngo’ kasirarian ke ma’tangngai allo.

¹⁷Belanna tang Napateina’ lan pa’tambukanna indo’ku, anna indo’ku bangmo kupolamunan sia tang tore tu inan taunna ma’tambuk.

¹⁸Ma’apai angku tassu’ lan mai pa’tambukan la umperasai kamaparrisan sia kamandasan sia la natonangi kamasirisan tu mai alloku sae lako upu’na?