Read Toraja-Sa'dan YEREMIA 21 Bible Online

YEREMIA 21 - Toraja-Sa'dan bible

YEREMIA 21

¹Inde sia tu kada dio mai PUANG lako Yeremia, tonna suai datu Zedekia tu Pasyhur, anakna Malkia, sia to minaa Zefanya, anakna Maaseya lako kalena, Nakua:

²La mekutanakomi lako PUANG tu diona kami, belanna Nebukadnezar, datu Babel urrariikan; den sia manii apa napogaurangkan PUANG tu mintu’ apa memangngan susi dolona, napourungi sorong boko’ tu datu iato dio mai kaleki.

³Nakuami Yeremia lako: La mipokada te lako Zedekia, kumua:

⁴Inde sia tu kadanNa PUANG, Kapenombanna to Israel: La Kupatibalik sule tu pa’buno mitoe, tu mipake dio lu salian benteng sirari datu Babel sia to Kasdim, tu untama tikuikomi, sia la Kurampun tu mintu’ pa’buno iato lan kota iate.

⁵Sia Aku kalena la urrariikomi lima tie’te’Ku sola takia’ mawatangKu, ondongpi situang kasengkean sia kare’dekan sia kamapallan tongan.

⁶Mintu’ tu to lan kota iate la Kuparampoi kamandasan, la tolino la olo’-olo’: la mate nasang napobua’ ra’ba biang iato.

⁷Mangkato, kadanNa PUANG, la Kusorong tu Zedekia, datu Yehuda sia mintu’ pareana sia iatu mai to buda, tu nasesannapa ra’ba biang sia kandean pa’dang sia karorian lan kota iate, tama limanna Nebukadnezar, datu Babel, sia tama limanna ualinna, sia tama limanna to la ungka’tu sunga’na; anna tang mamase sia tang mario sia tang maturu umpakandei bassi mataran tu tau iato.

⁸Sia ma’kadako lako te to buda: Inde sia tu kadanNa PUANG Nakua: Manassa la Kupatingayoangkomi te lalan lu lako katuoan sia lalan lu lako kamatean:

⁹Minda-minda torro lan kota iate, la mate nakande pa’dang, ba’tu karorian, ba’tu ra’ba biang, apa minda-minda tu memboko’mo naunturu’ to Kasdim tu untama tikuikomi, la tuo na iatu pangrampana, iamo deatanna.

¹⁰Belanna iatu lindoKu Kupatingo lako kota iate tang la napomelo, sangadinna la napokadake, kadanNa PUANG, anna disorong tama limanna datu Babel, tu la ussumpunni api.

¹¹Diona rapunna datu Yehuda. Perangii te kadanNa PUANG, e bati’na Daud!

¹²Nakua PUANG: Madomi’komi umpaolai salunna sia rampananni tu to dirampa apanna lan mai limanna to ma’pakario-rio, da namendelok tu kare’dekangKu susi api sia dukku naurungan moi misa’ tau tae’ nakulle umpa’deanni, napobua’ kakadakeanna mintu’ penggaurammi.

¹³Manassa Aku la unnukungko e pa’tondokan diong lombok, e buntu batu diong padang lappa’, kadanNa PUANG, e kamu tu ma’kada kumua: Mindara tu la solo’ umpellambi’ikan, mindara tu la tama to’ pembuniangki?

¹⁴Belanna Aku la umpapakkannikomi sitinaya bua penggaurammi, kadanNa PUANG sia Akumo la umpadukku api lan to pangala’na, anna lallei tu mintu’ apa untikui.