Read Toraja-Sa'dan YEREMIA 22 Bible Online

YEREMIA 22 - Toraja-Sa'dan bible

YEREMIA 22

¹Nakua kadanNa PUANG: Solo’ko rokko tongkonan layukna datu Yehuda, pokadai dio te kada iate,

²pokadanni kumua: Perangii tu kadanNa PUANG, e datu Yehuda, tu unnisungi isungan kapayunganna Daud, la kamu la to mase’ponmi la iatu mai baanammi, tu tama babangan iate.

³Inde sia tu kadanNa PUANG, Nakua: Paolai salunna sia karitutui tu kamalamburan, sia rampananni tu to dirampa apanna lan mai limanna to ma’pakario-rio, da miparugii sia da mipandasai tu to sae ba’tu pia biung ba’tu baine balu; sia da mipatibollo rarana to tang kasalan dao inan iate.

⁴Belanna iake mipangu’kui umpogau’i te, manassa dio mai babangan tongkonan layuk iate la nanii tama tu mintu’ datu la unnisung dao isungan kapayunganna Daud, tu ma’kareta sia ma’darang, la ia la mintu’ to mase’ponna sia baananna.

⁵Apa iake tae’i miperangii te kada iate, mangkaMo’ umpalao sumpa tete dio Kaleku, kadanNa PUANG, kumua iate tongkonan layuk iate la daun lauanmo.

⁶Belanna nakua kadanNa PUANG tu diona tongkonan layukna datu Yehuda: Susiko Gilead sia sangtintiko botto Libanon lako Kaleku — ke tae’i Kupopempadang pangallarangko, tu tang natorroi tau.

⁷Aku la umpatumayai tu to ma’kasanggang la ullaoiko, pantanni pa’bunona; iamo la ullellengi tu mintu’ arasi’ pa’tonno’mu anna pembuanganni tama api.

⁸Attu iato buda bangsa la ullendu’i te kota iate sia sipa’kada-kada nakua: Ma’apai Napasusii PUANG to te kota kapua iate?

⁹Anna mebali nakua: Belanna naboko’imo tau iato mai tu basseNa PUANG, Kapenombanna, sia tukku umpenombai sia umpengkaolai deata senga’.

¹⁰Da mitangi’i tu to mate sia da mibatingi, sangadinna iari tu to malemo tu la mitangi’i, belanna tae’mo nala sule la untiroi tu tondok kadadianna.

¹¹Belanna inde sia tu kadanNa PUANG diona Salum, anakna Yosia, datu Yehuda, tu dadi datu ussonda Yosia, ambe’na sia tu tassu’ lan mai tondok iate, nakua: tae’mo nala sule pole’o tama,

¹²sangadinna inan umba tu nanii tau umpali’i, inde to dio la nanii mate sia tae’mo nala untiro pole’i te padang iate.

¹³Upu’ allona tu to umbangun banuanna situang katangmaloloan, sia tu unggaragai bilik tiangka’ langnganna situang katangmalamburan; sia ussua-sua bang padanna tolino mengkarang tang nagadi sia tae’ nasaroi.

¹⁴Tu ma’kada nakua: La umbangunanna’ kaleku misa’ banua kapua sia bilik malona’ tiangka’ langnganna; sia nagaragan pentiroanna tu banua iato sia nalapik kayu arasi’, anna paradai parada mararang.

¹⁵Datukomiraka, ammi sipatomporanra kayu arasi’? Iatu ambe’mi tang kumanderaka sia mangiru’ sia umpogau’ salunna sia kamalamburan? Iatonna iato manaman ia.

¹⁶Nasanda tonganni tu diona to makario-rio sia to bongko, attu iato manaman ia. Tang susiraka to tu unnakuNa’? kadanNa PUANG.

¹⁷Apa tae’ mikemata sia kepenaa dio kalemi, sangadinna ungkamoraikomi saro bu’tu kadake sia umpatibollo rarana to tang kasalan sia umpandasa sia umpakario-rio tau.

¹⁸Iamoto nakua kadanNa PUANG tu diona Yoyakim, anakna Yosia, datu Yehuda: Tae’ nala umbatingi tau susite: Oo dikka’ siulu’ku muane! ba’tu: Oo dikka’ siulu’ku baine!; sia tae’ duka nala umbatingi tau susite: Oo dikka’ puang! ba’tu: Oo dikka’ to kabarre-alloan!

¹⁹Sangadinna la nalamun tau susito ullamun keledai mate, iamotu diriu’ sia ditibe dio lu salian babangan Yerusalem.

²⁰Kendekko langngan Libanon, ammu ma’urrukan dao, sia unnangle-angleko dao Basan, sia ma’urrukangko dao mai Abarim, belanna mintu’ muane pa’kaboro’mu sanggangmo.

²¹Iatommu marampa’ siapa, ma’kadaNa’ lako kalemu; apa mukua: Manokana’ umperangii! Susimo lalanmu to, randuk dio mai mangurammu, belanna tae’ len muperangii tu gamarangKu.

²²Mintu’ to mangkambi’mu la nakambi’ angin sia mintu’ muane pa’kaboro’mu la dirampa. Belanna attu iato la kasirisangko sia la ditatta diona mintu’ kakadakeammu.

²³E iko to unno’ko’ dao Libanon sia messerang lan lu kayu arasi’, lendu’ ia sarromu, ke narampoiko tu mintu’ pa’di’, susito baine mangurria’.

²⁴Tonganna la lelukraka tuoKu, kadanNa PUANG, moronganna tu Konya, anakna Yoyakim, datu to Yehuda, susito misa’ sissin peca’ dio lima kananKu, manassa la Kusintakki duka lan mai,

²⁵sia la Kusorongko tama limanna to la ungka’tu sunga’mu sia mukataku’, iamotu tama limanna Nebukadnezar, datu Babel sia to Kasdim.

²⁶Sia la Kupellebarangko sola indo’mu, tu mangka undadiangko lako misa’ tondok senga’, tu tangia tondok kadadiammi, naindeto dio la minii mate.

²⁷Iatu tondok nakamali’ tongan la nanii sule tama, inang tae’mo ia nala sule tama.

²⁸Misa’raka kurin tesse tu nasayu tau te tau iate, iamotu Konya, ba’tu misa’ kandean litak tae’ gai’na? Ma’apai anna dipembassanan, la ia sia mintu’ repokna sia ditibe lako misa’ tondok tu tae’ natandai?

²⁹E tondok, e tondok, e tondok! perangii tu kadanNa PUANG.

³⁰Nakua kadanNa PUANG: Sura’i te tau iate susito tamanang sia misa’ to tang maupa’ lan mintu’ allo katuoanna, belanna dio mai mintu’ ampo bati’na moi misa’ tae’ la maupa’ sia la unnisung dao isungan kapayunganna Daud sia undatuipa tondok Yehuda.