Read Toraja-Sa'dan YEREMIA 23 Bible Online

YEREMIA 23 - Toraja-Sa'dan bible

YEREMIA 23

¹Upu’ allona tu mintu’ to mangkambi’ tu ussanggang sia umpasisarak-sarak mintu’ domba Kukambi’, kadanNa PUANG.

²Iamoto, nakua kadanNa PUANG, Kapenombanna to Israel, lako mintu’ to mangkambi’ tu ungkambi’ taungKu, kumua: Mipasisarak-sarak sia miula’ tu dombaKu sia tae’ mikaritutui; tonganna la Kupapakkanni tu mintu’ penggauran kadakemi, kadanNa PUANG.

³Apa iatu mintu’ domba torroKu la Kurampun lan mai mintu’ tondok, tu Kunii mangka urrambai sia la Kupasule lako padang dinii ungkambi’i, anna memba’ka’ sia sabuda-budanna.

⁴AngKu padenanni ba’tu pira-pira to mangkambi’ tu la ungkambi’ tau iato mai, naurungan tae’mo namataku’ ba’tu tiramban sia tae’mo nala pa’de, kadanNa PUANG.

⁵Tonganna la sae tu allona, kadanNa PUANG, ke Kupatuoanni Daud tu misa’ Taruk malambu’; Iamo la ma’parenta susi datu sia la lolang kinaa sia umpalalo salunna sia kamaloloan lan tu tondok.

⁶Iake alloNa iatu to Yehuda la dikarimmanni sia iatu to Israel la torro marampa’, na iatu sanganNa la nasa’bu’ tau: PUANG tu oto’na kamaloloanta.

⁷Iamoto, manassa la sae tu allona, kadanNa PUANG, ke tae’mi nakuai tau: La lelukraka tuoNa PUANG tu ussolan to Israel lan mai tondok Mesir,

⁸sangadinna la lelukraka tuoNa PUANG tu ussolan sia umpasaei tu bati’na to Israel daa mai tondok daa ulunna salu sia lan mai mintu’ tondok, tu diniimo unnula’i male; sia iatu tau iato mai la torro dio padangna kalena.

⁹Diona mintu’ nabi. Pu’du’ tu penaangku lan ba’tengku, sia ma’parondo tu mintu’ kaleku; sia susina’ to malango sia susi misa’ to tarru’ buda anggoro’ nairu’, belanna PUANG sia belanna kada maseroNa.

¹⁰Belanna tondok iate nanii ponno to pasandak salu lako rampanan kapa’; sia belanna padang iate makarorrong napobua’ tampak ropu, sia mintu’ padang kariuan marangke; tonganna apa kadake manna natuntun sia iatu apa tang malambu’ nasanga napomatoto’.

¹¹Belanna la nabi la to minaa urruttakki apa maindan; akkenna nalan banuangKu Kulolongan tu kakadakeanna tau iato mai, kadanNa PUANG.

¹²Iamoto iatu lalanna la butung to inan malangngo’ lan kapittukan, napusa sia tobang tu tau iato mai. Belanna Aku la umparampoi kasanggangan kadanNa PUANG.

¹³Tonganna Kutiro tu apa umpa’dikki penaa dio lu mintu’ to minaa Samaria: iatu tau iato mai ma’nubua’ tete dio Baal sia umpapusa taungKu Israel.

¹⁴Apa dio lu mintu’ nabi Yerusalem Kutiro tu apa megi’giran, iamotu pasandak salu lako rampanan kapa’ sia ma’kada tang tongan; sia napamatoto’ limanna tu mintu’ to umpogau’ kadake naurungan moi misa’ tae’ namengkatoba’ dio mai kakadakeanna. Mintu’ tau iato mai susi Sodom lako Kaleku sia mintu’ pa’tondokanna sangtinti Gomora.

¹⁵Iamoto nakua kadanNa PUANGna mintu’ ma’dandan maritik tu diona mintu’ nabi iato: Tonganna la Kupakande apsantin sia la Kupairu’ rasun tu tau iato mai, belanna dio mai mintu’ nabi Yerusalem tassu’mo tu penggauran urruttakki apa maindan ulleleimi mintu’ tondok.

¹⁶Nakua kadanNa PUANGna mintu’ ma’dandan maritik, kumua: Da miperangii tu kadanna mintu’ nabi tu ma’nubua’ lako kalemi, belanna tau iato mai umpapusakomi diona apa tae’ gai’na, sia umpokada apa pangala penaanna, tu tae’ natassu’ dio pudukNa PUANG.

¹⁷Tontong bang tu tau iato mai ma’kada lako to untattaNa’ nakua: Iatu PUANG mangkamo ma’kada Nakua: La marampa’komi, sia ma’kada lako mintu’ to lolang unturu’ kamakarrasanna penaanna, nakua: Moi misa’ tae’ tu kadake la urrampoikomi.

¹⁸Belanna mindamora ma’dioren lan kombonganNa PUANG la unnissanni sia urrangii tu kadanNa? Mindamora tu untananni talinga sia urrangii tu kadanNa?

¹⁹Tonganna la tassu’ tu angin bara’Na PUANG, iamotu kare’dekan sia talimpuru’ ma’pamumbuk, tu la ta’pa dao ulunna mintu’ to tang mekaaluk.

²⁰Tae’ nala toyang tu kasengkeanNa PUANG, ke tae’pi Naupu’ umpalaoi tu mintu’ lalan penaanNa; diopi allo ma’katampakanna mimane unnissan tongan-tonganni.

²¹Tae’ naAku ussuai tu nabi iato mai, apa male duka lumingka, tae’ naAku ma’kada lako, apa ma’nubua’ duka.

²²Belanna iakenna la ma’dioren tu tau iato mai lan kombongangKu, manassa napa’perangian tu kadangKu lako taungKu sia napatibalik dio mai lalan salana sia dio mai penggauran kadakena.

²³Kapenomban mandappi’ mannaRa’ka te? kadanNa PUANG, na tae’ KuKapenomban ke mambelai?

²⁴Ma’dinraka misa’ tau umbuni kalena lan pembunian, anna tae’ Kutiroi? kadanNa PUANG. Tang umponnoiRa’ka langi’ sola lino? kadanNa PUANG.

²⁵Kurangimo tu apa napokada mintu’ nabi, tu ma’nubua’ tang tongan, tete dio sangangKu, nakua: Mangkamo’ mangimpi, mangkamo’ mangimpi.

²⁶Sangapapira? — denparaka lan penaanna tu nabi ma’nubua’ tang tongan sia tu ma’nubua’ umpokadai tu pa’tangnga’ penaanna,

²⁷la ma’tangnga’, kumua anna tang ungkilalai taungKu tu sangangKu tete dio pangimpinna tu pantan nauleleanan solana, susi tu nene’ to dolona tau iato mai tang ungkilalai sangangKu belanna Baal.

²⁸Iatu nabi mangimpi la napokada tu pangimpinna sia iatu to nanii kadangKu la napokada situru’ kamanapparan; samaraka tu dalame anna gandung? kadanna PUANG.

²⁹Tang susiraka api tu kadangKu, kada Napa’petanggungan PUANG, ba’tu susi misa’ pepa’tong unnisak-nisak buntu batu’?

³⁰Iamoto, manassa Aku la ullaoi tu nabi iato mai, kadanNa PUANG, tu pada umboko kadangKu dio mai solana.

³¹Manassa Aku la ullaoi tu nabi iato mai, kadanNa PUANG, tu ma’neko-neko lilana sia ma’kada kumua: KadanNa PUANG te.

³²Manassa Aku la ullaoi tu mai pa’nubua’ tu umpokada pangimpi tang tongan, kadanNa PUANG, tu naulelean tau iato mai la umpapusa taungKu tete dio kada tang tonganna sia passedena; tae’ra Kusuai sia tae’ Kupasanni tu tau iato mai; iatu tau iato mai moi misa’ tae’ gai’na lako bangsa iate, kadanNa PUANG.

³³Iake mekutanai te to buda iate ba’tu misa’ nabinna ba’tu misa’ to minaanna lako kalemu, kumua: Passanan tengko apara Napokada PUANG? la mukua lako tau iato mai: Kamumo tu passanan sia Aku la untua’komi, kadanNa PUANG.

³⁴Iatu nabi ba’tu to minaa ba’tu tau buda tu ma’kada nakua: Iatu passanan iato lu dio mai PUANG; — la Kupapakkanni tu tau iato sia mintu’ bati’na.

³⁵Pada la mipokada lako solami sia lako siulu’mi, kumua: Apa tu Napebalian PUANG, ba’tu: Apara tu Napokada PUANG?

³⁶Apa damo misa’bu’i tu kada nakua: Iatu passanan tengko iato lu dio mai PUANG, belanna kadanna kalenamo tu dadi passananna simisa’-misa’i, iamotu umbulang leko’ kadanNa Puang Matua matontongan, PUANGna mintu’ ma’dandan maritik, Iamo Kapenombanta.

³⁷La ma’kadako lako nabi iato mai kumua: Apa tu Napebalian PUANG lako kalemu, ba’tu: Apara tu Napokada PUANG?

³⁸Apa iake mikuai: Iatu passanan iato lu dio mai PUANG, iamoto nakua kadanNa PUANG: belanna mikua: Iatu passanan lu dio mai PUANG, moi angKu mangkamo ussua tau umpokadangkomi kumua: Da mikuai Iatu passanan iato lu dio mai PUANG,

³⁹iamoto, manassa la Kuangka’komi sia la Kutua’komi dio mai oloKu, sola tu kota mangka Kubenkomi sia Kuben nene’ to dolomi,

⁴⁰sia la Kupakatattangkomi sia la Kupakasirisangkomi sae lakona, tu tae’ len nala dikalupai.