Read Toraja-Sa'dan YEREMIA 24 Bible Online

YEREMIA 24 - Toraja-Sa'dan bible

YEREMIA 24

¹Napatiroammo’ PUANG tu da’dua bakku’ bua ara tu diona tingayo banuanNa PUANG, tonna mangka Nebukadnezar, datu Babel, umpali’i tu Yekhonya, anakna Yoyakim, datu Yehuda, sia iatu mai arungna Yehuda sia iatu mai to pande sia mintu’ pande bassi lan mai Yerusalem lako Babel.

²Lan tu bakku’ misa’na den bua ara tarru’ melo, susito bua ara dolo matasak, apa lan tu bakku’ misa’na den bua ara tarru’ kadake, tu lendu’ ia kadakena, naurunganni tang dikande.

³Nakuami PUANG lako kaleku: Apara mutiro, e Yeremia? Mebalimo’: Bua ara; iatu bua ara melo tarru’ melo, na iatu kadakena tarru’ kadake lendu’ ia kadakena, naurunganni tang dikande.

⁴Saemi tu kadanNa PUANG lako kaleku nakua:

⁵Inde sia tu kadanNa PUANG, Kapenombanna to Israel, Nakua: Susite bua ara melo, susi dukato la Kutiro tu mintu’ to dipali’ dio mai to Yehuda tu la napomelona, tu Kupalele dio mai inan iate lako tondok to Kasdim.

⁶Sia la Kutiro tu tau iato mai tu la napomelona, sia la Kupasule tama tondok iate, sia la Kubangun tang la Kurondonni sia la Kutanan tang la Kudu’dukki.

⁷Sia la Kukamasean penaa la untandaiNa’, kumua Akumote tu PUANG, anna tau iato mai dadi taungKu sia Akumo dadi Kapenombanna, podo namengkatoba’ lako Kaleku sae rokko penaanna.

⁸Apa susitu bua ara kadake, tu lendu’ ia kadakena, naurunganni tang dikande — , kadanNa PUANG, la Kupasusi dukato tu Zedekia, datu Yehuda sola mintu’ arungna sia to torronapa lan Yerusalem, tu torronapa lan tondok iate sia to ma’tondok lan Mesir.

⁹Kueloran tu tau iato mai napakario-rio sia nasanggang mintu’ kadatuan lan lino sia la dadi kaditattan sia dipoparumbasan sia kaditellean sia tampakan ropu dio lu mintu’ inan, tu la Kunii umpatisambo’i tu tau iato mai.

¹⁰Sia Kuparampo dio lu tau iato mai tu kandean pa’dang sia karorian sia ropu, naurungan tappu disabu’i dio mai padang, tu Kukamaseanni sia Kukamasean nene’ to dolona.