Read Toraja-Sa'dan YEREMIA 25 Bible Online

YEREMIA 25 - Toraja-Sa'dan bible

YEREMIA 25

¹Iamote tu kada urrampoi Yeremia diona mintu’ bangsa Yehuda, tonna taun ma’penna’pa’na ma’parenta tu Yoyakim, anakna Yosia, datu Yehuda, iamo tonna taun pamulanna Nebukadnezar ma’parenta dio Babel,

²tu napokada nabi Yeremia diona a’ganna mintu’ bangsa Yehuda sia mintu’ pa’tondokan Yerusalem, nakua:

³Randuk tonna ma’pessangpulo tallunna ma’parenta tu Yosia, anakna Amon, datu Yehuda, sae lako allo iate, denmo duangpulo ntallu taunna, narampoimo’ tu kadanNa PUANG sia kupokadammokomi ke makale’ sia ke karoen, apa tae’ duka miperangii.

⁴Susi dukato Nasuammokomi PUANG tu mintu’ taunNa, iamotu mai nabi, ke makale’ sia ke karoen, apa inang tae’ duka miperangii, ba’tu untananni talinga.

⁵Ianna ma’kada tu tau iato mai, nakua: Pantan mengkatoba’komi untampe lalan kadakemi sia umboko’i penggauran kadakemi, ammi ma’din umpa’tondokki tu padang Nakamaseangkomi PUANG sia lako nene’ to dolomi misituran-turananni.

⁶Da mimengkaola lako kapenomban senga’ la umpenombai sia tukku dio tingayona; da mipa’dikki penaangKu napobua’ panggaragammi; iake mitorroimi, tae’ Kula umparampoikomi kadake.

⁷Apa inang tae’ miperangiiNa’, kadanNa PUANG, — sangadinna mipa’dikki tu penaangKu napobua’ panggaragammi, tu untumang kalemi.

⁸Iamoto, nakua kadanNa PUANGna mintu’ ma’dandan maritik: Belanna tae’ miperangii tu mintu’ kadangKu,

⁹iamoto la Kusua tu mintu’ bangsa daa mai ulunna salu, kadanNa PUANG, sia ia duka tu Nebukadnezar, datu Babel, taungKu, sia la Kupasae tu tau iato mai ussanggangi te padang iate sia mintu’ pa’tondokanna, sia mintu’ bangsa tiku lao, sia la Kusabu’i butung pepayu sia la Kupopendadi apa napotiramban tau sia apa nabellu’i tau sia nabelle’i sae lakona.

¹⁰Sia la Kupatoyang dio mai padang iato tu arrak kaparannuan sia kamaruasan, sia gamara to ma’rampanan kapa’, sia oni pangrissoan sia mintu’ arrang palita.

¹¹Mintu’ tondok iate la daun lauan sia lo’bang. Mintu’ bangsa iate la napokaunan datu Babel pitungpulo taunna.

¹²Apa iake ganna’mi pitungpulo taunna, la Kupapakkanni tu mintu’ kakadakeanna datu Babel sia bangsa iato, kadanNa PUANG, sia ia duka tu padang to Kasdim, la Kupopempadang lo’bang sae lakona.

¹³La Kupopembuamo dio padang iato tu mintu’ kadangKu tu Kupokadamo la urrampoi, iamotu mintu’ tisura’na lan sura’ iate, tu napokada dolomo Yeremia diona a’ganna mintu’ bangsa iato.

¹⁴Belanna ia duka tu tau iato mai la napokaunan bangsa makuasa sia datu mala’bi’, susimoto la Kupapakkanni sitinaya mintu’ kedona sia penggauranna.

¹⁵Belanna inde sia tu kadanNa PUANG, Kapenombanna to Israel, lako kaleku, Nakua: Alami te irusan Kutadoangko nanii anggoro’ kare’dekan ara’, ammu pairusanni mintu’ bangsa, tu la Kunii ussuako.

¹⁶Elo’namo namangiru’ tu tau iato satipa’re’ba-re’banna sia mentobomboan natumang kandean pa’dang, tu Kuparampoanni.

¹⁷Kualamo tu irusan Natadoanna’ PUANG, angku pairusanni tu mintu’ bangsa tu Nanii PUANG ussuana’:

¹⁸iamotu Yerusalem sia mintu’ kota Yehuda sola mintu’ datunna sia arungna, la dipadaun lauammo, la disabu’i anna potirambanni tau, sia la natelle-telle sia la tampakan ropu, susite allo iate;

¹⁹sia Firaun, datu Mesir, sia mintu’ to mase’ponna sia mintu’ arungna sia taunna,

²⁰sia mintu’ bangsa pantan tama sae sia mintu’ datunna tondok Us sia mintu’ datu tondok to Filistin, iamotu Askelon, Gaza, Ekron na Asdod, tu torrona siapa;

²¹na Edom, Moab na to Amon;

²²sia mintu’ datunna Tirus, mintu’ datunna Sidon na mintu’ datunna lebukan lamban lianna tasik;

²³sia Dedan, Tema, Bus na mintu’ to ma’soppo kurin;

²⁴sia mintu’ datunna to Arab na mintu’ datunna to pantan tama, tu umpa’tondokki padang pangallaran;

²⁵sia mintu’ datunna Zimri, mintu’ datunna Elam na mintu’ datunna Madai;

²⁶sia mintu’ datunna tondok daanna ulunna salu, la mandappi’na la mambelanna, siamping-amping; ondongpi mintu’ kadatuan lan lino, dao te kuli’na padang; undinna tonna upu’mo to namane mangiru’ tu datu Sesakh.

²⁷Pokadanni to tau iato mai, kumua: Inde sia tu kadanNa PUANGna mintu’ ma’dandan maritik, Kapenombanna to Israel, nakua: Iru’mi samalangomi, satiluammi, ammi songka tang malimbangun sule, natumang kandean pa’dang Kuparampoangkomi.

²⁸Iake manokai tu tau iato mai unnalai tu irusan mutadoanni la nairu’, la mukua lako: Inde sia tu kadanNa PUANGna mintu’ ma’dandan maritik kumua: Tae’ mitang la unniru’i.

²⁹Belanna manassa Kuparandukmo ussanggangi tu kota dinii ussa’bu’ sangangKu, umba nakua nala tang urruakomi? Tae’ mila tilendok dio mai kamandasan, belanna Akumo la umparampoi kandean pa’dang tu mintu’ to untongkonni kuli’na padang, kadanNa PUANGna mintu’ ma’dandan maritik.

³⁰La ma’nubua’ko umpokadanni tau iato mai te mintu’ kada iate, kumua la sumadang tu PUANG dao mai masuanggana sia la umpemandui gamaranNa dao mai isungan maindanNa; la sumadang-madang unggarrakki tu pangleonNa; la unnarrakki mintu’ tu untongkonni kuli’na padang, susi arrakna to manglullu’ bua angoro’.

³¹Rorakmo lako randan langi’ tu ongngo’na tananan ra’, belanna PUANG untoe kara-karana mintu’ bangsa sia umpaolai salu mintu’ tolino; sia ussorongi tu to tang mekaaluk lako kandean pa’dang, kadanNa PUANG.

³²Inde sia tu kadanNa PUANGna mintu’ ma’dandan maritik, Nakua: Tonganna iatu kasanggangan silelean dio lu bangsa, sia iatu talimpuru’ ma’pamumbuk dio mai randan langi’,

³³allo iato mintu’ tu to Napatei PUANG la situlambenan tu batang rabukna dio mai randan langi’ sae lako randan langi’, tae’ bang nadibatingi sia tang diangkaran ba’tu dipeliang tu mai batang rabukna; sangadinna mempangangku’ nasang dio lu padang.

³⁴Unnurrukkomi, e mintu’ to manglaa, melallakkomi sia melenten-lentenkomi dio lu to’ barra’-barra’, e mintu’ pangkambi’ domba ma’baanan; belanna nalambi’mo tu allomi, la ditunu. Sia Akumo la untesse-tessekomi, ammi tobang susi pindan mellong.

³⁵Iatu mintu’ to manglaa la diampangi da namallai, sia iatu mintu’ pangkambi’ domba tang pakalamo lussu’.

³⁶La dirangi tu lallakna mintu’ to manglaa sia urrukna mintu’ pangkambi’ domba, belanna Nasanggangmo PUANG tu padang pa’pasanganna.

³⁷Mintu’ padang masakke-sakke sanggangmo napobua’ kare’dekanna ara’Na PUANG.

³⁸Susito singa mangura untampemo pentiongananNa; iamoto iatu padangna tau iato mai mempadang lo’bangmo napobua’ kandean pa’dang pasanggangNa sia kare’dekanna ara’Na.