Read Toraja-Sa'dan YEREMIA 29 Bible Online

YEREMIA 29 - Toraja-Sa'dan bible

YEREMIA 29

¹Inde sia kada lan sura’ tu napa’pea nabi Yeremia dio mai Yerusalem lako mintu’ pekaamberan dipali’, tu torrona sia lako mintu’ to minaa sia mintu’ nabi sia mintu’ to buda, tu napali’ Nebukadnezar lako Babel dio mai Yerusalem,

²tonna tassu’mo lan mai Yerusalem tu datu Yekhonya sia datu baine sia to mase’ponna sia arungna Yehuda sia Yerusalem sola to pande sia pande bassi.

³Iatu sura’ iato napa’pea nabaa Elasa, anakna Safan sia Gemarya, anakna Hilkia, sumbungan pudukna Zedekia, datu Yehuda lako Nebukadnezar, datu Babel, nakua:

⁴Inde sia tu kadanNa PUANGna mintu’na ma’dandan maritik, Kapenombanna to Israel, lako tu mintu’ to dipali’ dio mai Yerusalem lako Babel, nakua:

⁵Bangunkomi banua ammi torro lan, tananni tu mai pa’lak, ammi kandei tu burana;

⁶kebainekomi ammi dadian muane sia baine, pakebainei tu anakmi muane sia pakemuanei tu anakmi baine, anna ma’dadian muane sia baine; ammi memba’ka’ dio sia da nasosso’ tu bilangammi.

⁷Dakaranni kamanamanan tu kota Kunii umpali’komi, sia passambayanganni lako PUANG, belanna lan kamanamananna la minii duka manaman.

⁸Belanna nakua kadanNa PUANGna mintu’ ma’dandan maritik, Kapenombanna to Israel, kumua: Da napakenakomi mintu’ nabimmi tu misolan sia mintu’ to pakita-kitammi, sia da miperangii tu to mangimpimmi, tu misua mangimpi.

⁹Belanna tau iato mai ma’nubua’ tang tongan lako kalemi tete dio sangangKu; tae’ Kusuai, kadanNa PUANG.

¹⁰Belanna nakua kadanNa PUANG: Iatu tonganna, ianna ganna’mo pitungpulo taunna dio Babel, la Kuto’longikomi sia la Kupalalo lako kalemi tu pangallu’ meloKu sia la Kupasulekomi lako inan iate.

¹¹Belanna Kutandai tu pa’tangngaran tu Kutangnga’ diona kamu, kadanNa PUANG, iamo pa’tangngaran diona kamarampasan, tangia kamandasan, kumua angKu kamaseangkomi undinna tu attu mirannuan tu melona.

¹²Attu iato la meongli’komi sia malekomi massambayang lako Kaleku, angKu perangiikomi.

¹³Sia la miappa’Na’, ke midaka’Na’, ke ponnoi penaammi malaku pa’tunduan lako Kaleku.

¹⁴Sia Kuelorangkomi la unnapparanNa’, kadanNa PUANG, sia la Kupopembali tu toto’mi, sia la Kupulungkomi dio mai mintu’ bangsa sia dio mai mintu’ inan tu Kunii urrambaikomi male, kadanNa PUANG, sia la Kupasulekomi lako inan, tu Kunii mesua umpa’pepalirangkomi dio mai.

¹⁵Iake ma’kadakomi mikua: Napabendanammokanni PUANG ba’tu pira-pira nabi lan Babel.

¹⁶Tae’ natongan to, sangadinna nakua kadanNa PUANG diona tu datu unnisungi kapayunganna Daud sia diona mintu’ to buda tu torro lan kota iate, iamotu mintu’ siulu’mi, tu tae’ mimale sola dipali’:

¹⁷Nakua kadanNa PUANGna mintu’ ma’dandan maritik: Manassa la ussuaNa’ kandean pa’dang sia karorian sia ra’ba biang dio lu tau iato mai sia la Kupabutung bua ara kadangkeng tu tau iato mai tu lendu’ ia kadakena, naurunganni tae’ nadikande.

¹⁸Kuula’ pa’dang sia Kuparampoi karorian sia ra’ba biang tu tau iato mai sia la Kupadadi misa’ apa metakuran lako mintu’ kadatuan lan lino, sia apa nasa’bu’ tau, ke ma’tampak ropui sia apa megiangan sia apa nabellu’i tau sia kaditattan dio lu mintu’ bangsa, tu la Kunii unnula’i male tu tau iato mai.

¹⁹Belanna tae’ naperangii tau iato tu mintu’ kadangKu, kadanNa PUANG, tu Kusuan nabi, taungKu, umpokadanni, ke makale’ sia ke karoen, apa tae’ miperangii, kadanNa PUANG.

²⁰Totemo perangiimi tu kadanNa PUANG, e kamu mintu’ to dipali’, tu Kupalele dio mai Yerusalem lako Babel!

²¹Inde sia tu kadanNa PUANGna mintu’ ma’dandan maritik, Kapenombanna to Israel, tu diona Ahab, anakna Kolaya sia Zedekia, anakna Maaseya, tu ma’nubua’ tang tongan tete dio sangangKu, nakua: Manassa la Kusorong tu tau iato mai tama limanna Nebukadnezar, datu Babel, tu la umpatei dio pentiromi,

²²naurunganni la bu’tu dio mai tau iato mai tu kada tampak ropu dipoparumbasan dio lu mintu’ to Yehuda tu dipali’ dio Babel, nakua: Kenna sabu’ioroko PUANG, susi Zedekia sia Ahab, tu natunu datu Babel!

²³Belanna mangkamo umpogau’ kabagan mesirisan dio lu to Israel sia sigau’ sala bainena solana sia umpokada kada tang tongan tete dio sangangKu, tu tae’ Kupepasananni lako tau iato mai. Tonganna Aku unnissanni sia ussa’bii, kadanNa PUANG.

²⁴Sia pokadanni Semaya, to Nehelam, kumua:

²⁵Inde sia tu kadanNa PUANGna mintu’ ma’dandan maritik, Kapenombanna to Israel, Nakua: Belanna mangkamoko umpa’pea sura’ tete dio sangammu lako mintu’ to buda dio Yerusalem sia to minaa Zefanya, anakna Maaseya, sia lako mintu’ to minaa, kumua:

²⁶Mangkamoko Naangka’ PUANG dadi to minaa ussonda to minaa Yoyada, ammu dadi to ma’kampa lan banuanNa PUANG la ungkampai mintu’ to katama-taman sia tu lolang susi nabi, ammu sangkalai sia pangkai bassi.

²⁷Ma’apai anna tae’ mugagai tu Yeremia, to Anatot tu umpalalong kalena susi nabi dio lu kalemi?

²⁸Belanna mesua lako Babel lako kaleki, nakua: La masaikomi dio, bangunkomi banua ammi torro lan, tananni tu mai pa’lak, ammi kandei tu burana.

²⁹Nabasammi to minaa Zefanya lako nabi Yeremia tu sura’ iato.

³⁰Attu iato saemi tu kadanNa PUANG lako Yeremia, Nakua:

³¹Pa’peai te kareba iate lako mintu’ to dipali’, kumua: Inde sia tu kadanNa PUANG tu diona Semaya, to Nehelam: Belanna napa’nubuarangkomi Semaya, anna tae’ Kusuai, sia ia mipobannang urrannuan apa tang tongan,

³²iamoto nakua kadanNa PUANG: Tonganna la Kuukung tu Semaya to Nehelam sia mintu’ bati’na; dio mai mintu’ bati’na moi misa’ tau tae’ la torro dio lu bangsa iate sia ia kalena tae’ nala untiroi tu kameloan, tu Kuparampo lako taungKu, kadanNa PUANG, belanna naada’i tu tau pabali-bali lako PUANG.