Read Toraja-Sa'dan YEREMIA 3 Bible Online

YEREMIA 3 - Toraja-Sa'dan bible

YEREMIA 3

¹(Saemi kadanNa PUANG urrampoina’, nakua): Iake denni misa’ muane untantang bainena, anna male napobainei to senga’, la ma’dinraka tu muane dolona ussulei? Tae’raka nala maruttak tu tondok napobua’? Apa moi muma’gau’ salamo sola buda pa’gau’ sala, la susi bangrokoka to sule lako Kaleku? kadanNa PUANG.

²Mentingarako langngan mintu tanete lo’bang, umbara nii tu tang dinii ussiammurangko? Unno’ko’moko dio lalan ungkampai tu tau mai, susi misa’ to Arab, lan padang pangallaran, sia muruttakkimo tu tondok napobua’ passulobongimmu sia mintu’ kakadakeammu.

³Iamoto natae’ Napasaei tu uran kamban sia uran tampak; apa iatu lindomu makamban susi lindo baine bualang sia tontongko tang masiri’.

⁴Tang randukmorokoka totemo mengkamoya lako Kaleku, mukua: O Ambe’ku, Kamumo tu kukamali’na tongku mangura?

⁵Ma’dinraka tu kasengkeanNa la tontong sae lakona? Ma’dinraka la Napatontong bang tu kare’dekanNa? Susimo kadammu to, ammu pogau’ siapi tu mintu’ kakadakean, naurungan sakerangngan-rangnganna.

⁶Ma’kadami PUANG lako Kaleku tonna linona datu Yosia, Nakua: Mutiroraka tu apa mangka napogau’ to Israel, to sorong boko’? Biasa male langngan mintu’ tanete madao sia diong lu garonto’ kayu maluna, anna ma’gau’ sala dio.

⁷Sia Kukuapa tonna mangka tu tau iato umpogau’i tu iannato: Suleko lako Kaleku; apa manoka sule. Iate apa iato natiro Yehuda sangbainena to tang maruru’.

⁸Apa Kutiro, tongKu mangka untibei tu Israel, to sorong boko’ sia Kuben sura’ kasitantangan belanna diona mintu’ gau’ sala napogau’, iaomi tu Yehuda sangbainena to tang maruru’, tae’ namataku’, sangadinna male duka ma’gau’ sala;

⁹dadimi diona kapanglulluranna umpogau’ pa’pangngan buni, anna ruttakki tu tondok; ondongpi sigau’ salamo batu sia kayu.

¹⁰Iatonna mangka tu mintu’ apa iato, tae’ duka namorai tu Yehuda, sangbainena, iamoto tang maruru’, bulo lollong sule lako Kaleku, sangadinna naangga’-angga’i bangri, kadanNa PUANG.

¹¹Iamoto Nama’kada PUANG lako kaleku Nakua: Iatu Israel, to sorong boko’ umpatandan kalena kumua malambu’ na iatu Yehuda, to tang maruru’.

¹²Malemoko, petambanni te kada iate rekke ulunna salu, kumua: La mengkatoba’ko, e Israel, to sorong boko’, kadanNa PUANG, da angKu patiroangko lindo sengke, belanna maturu-turuNa’, kadanNa PUANG, sia tae’ angKu la unnannai tu kare’dekangKu tontong sae lakona.

¹³Apa la mutandai tu kakadakeammu kumua mangkamoko sorong boko’ dio mai PUANG, Kapenombammu sia male punala bangko lako to sae diong lu garonto’ kayu maluna sia tae’ muperangii tu gamarangKu, kadanNa PUANG.

¹⁴La mengkatoba’komi, e mintu’ anak pabali-bali, kadanNa PUANG, belanna Akumo tu Puangmi, sia Akumo la unnalakomi simisa’ lan mai misa’ kota, nasida’dua, ke sangpa’rapuanoi angKu solangkomi lako Sion.

¹⁵Aku la ungkamaseangkomi tu mintu’ to mangkambi’ tu naala penaangKu anna ia ungkambi’komi situang kapaissanan sia tangnga’kinaa.

¹⁶La dadi attu iato, ke sabuda-budannakomi sia memba’ka lan tondok, kadanNa PUANG, tae’mo nala umpokada-kadai tau tu diona patti basseNa PUANG, sia tae’mo nala sae lan penaanna tau sia tae’mo nakilalai tau sia tae’mo nala undaka’i sia tae’mo nala unggaraga pole’i.

¹⁷Attu iato Yerusalem la disa’bu’ isungan kapayunganNa PUANG sia mintu’ bangsa la sirampun lako belanna sanganNa PUANG dio Yerusalem sia tae’mo nala lolang unturu’ kamakarrasanna penaa kadakena.

¹⁸Attu iato to lan tondok Yehuda la male sitammu to lan tondok Israel, anna tau iato pada la sae lu daa mai padang daa ulunna salu lako padang Kukamaseammo nene’ to dolomi la napomana’.

¹⁹Tonganna Kukua: Umba la Kukua umpapadako tu mai mintu’ anak muane sia la Kubenko misa’ padang maelo, iamotu padang pa’tonno’na dio lu mintu’ bangsa la mupomana’! Sia Kusangapa la musa’bu’Na’ Ambe’mu sia tae’mo mula toyang dio mai Kaleku.

²⁰Apa susi misa’ baine tang maruru’ lako muanena, susi dukamoto tu kamu tang maruru’ lako Kaleku, e bati’na Israel, kadanNa PUANG.

²¹Perangii, tu gamara dao mai tanete lo’bang, iamotu tangi’na sia pengkamoyana to Israel, belanna umpasepang lalanna sia naboko’i tu PUANG, Kapenombanna.

²²La mengkatoba’komi, e mintu’ anak pabali-bali, angKu popa’runduanangkomi sule dio lu kapusammi. Tonganna indemokanni, saekanni lako Kalemi, belanna Kamumo PUANG, Kapenombangki.

²³Tonganna iatu mintu’ tanete sia kamamakanna mintu’ buntu pa’pakena manna napabu’tu; manassa PUANG Kapenombanta Iamo oto’na kasalamaranna to Israel.

²⁴Belanna iatu ra’ta’na mintu’ nene’ to doloki puramo naampello’ kadibelleran randuk dio mai mangurangki, iamotu mintu’ dombana sia sapinna sia anakna muane sia baine.

²⁵La malimungkukan mamma’ nakabu’ siri’ki sia nasamboikan kaditattangki, belanna kasalammokan lako PUANG, Kapenombangki la kami la mintu’ nene’ to doloki, randuk dio mai mangurangki sae lako allo iate sia tae’mo kiperangii tu gamaranNa PUANG, Kapenombangki.