Read Toraja-Sa'dan YEREMIA 33 Bible Online

YEREMIA 33 - Toraja-Sa'dan bible

YEREMIA 33

¹Saemi tu kadanNa PUANG ma’penduanna lako Yeremia, tonna dipattangpa lan lu ba’ba pa’kampan:

²Nakua tu kadanNa PUANG tu umpogau’i to sia umpasakka’i tu apa la Napadadi; PUANG iamo sanganNa.

³Meongli’ko lako Kaleku, angKu pebaliiko sia la Kupokadangko tu apa kapua tu tang dipebuyu’, tu tae’ mutandai.

⁴Belanna nakua kadanNa PUANG, Kapenombanna to Israel, tu diona mintu’ banua lan kota iate sia diona mintu’ tongkonan layukna datu Yehuda, tu dirondon napobua’ benteng sia pa’dang;

⁵sae tu tau urrarii to Kasdim sia umponnoi batang rabuk tu banua iato, iamotu batang rabukna to Kupatei napobua’ kasengkeangKu sia kare’dekangKu sia bannang dio mintu’ kakadakeanna angKu popentilindung lindoKu dio mai te kota iate.

⁶Tonganna la Kupasikemun tu bangkena sia la Kupamondo sia la Kupamatana tu tau iato mai sia la ungkamaseanni kamakarimmanan sebo tu tae’ upu’na.

⁷Sia la Kupopembali tu toto’na Yehuda sia Israel sia la Kupabangun tu tau iato mai susito dolona.

⁸Sia la Kupemaseroi tu tau iato mai dio mai mintu’ kakadakeanna tu napobannang kasalan lako Kaleku sia umboko’iNa’.

⁹Attu iato kota iato la dadi misa’ sanga Kupoparannu, sia kadipudian sia kadipangkeran dio lu mintu’ bangsa lan lino, tu la urrangi kareba diona mintu’ kameloan tu Kupogau’ lako tau iato mai; la tiakka’ sia tigega’ penaanna diona mintu’ kameloan sia kasalamaran tu Kupogau’ lako tau iato mai.

¹⁰Nakua kadanNa PUANG: Lan inan iate tu mipokada kumua disabu’imo, naurungan moi misa’ tolino ba’tu patuoan tae’mo lan, anna lan mintu’ kota Yehuda sia mintu’ batatta lan lu Yerusalem tu sanggang, moi misa’ tolino ba’tu misa’ patuoan tae’mo lan.

¹¹La dirangi pole’omo tu arrak kaparannuan sia kamaruasan sia gamara to ma’rampanan kapa’ sia gamaranna tu mintu’ tau nakua: Pudimi tu PUANGna mintu’ ma’dandan maritik, belanna masokan tu PUANG, belanna iatu kamasokananNa tang leluk sae lakona! iake umbaai pemala’ pa’pudian tama banuanNa PUANG; belanna la Kupopembali tu toto’na te tondok iate, naurunganni susito dolona, kadanNa PUANG.

¹²Nakua kadanNa PUANGna mintu’ ma’dandan maritik: Lan inan iate tu sanggangmo, naurungan moi misa’ tolino ba’tu misa’ patuoan tae’mo lan, sia lan lu mintu’ kotana la den pole’mo padang kariuan, la nanii to mangkambi’ umpakande dombana.

¹³Lan lu mintu’ kota dao ma’buntunna sia lan mintu’ kota dio Padang Merrantena sia lan mintu’ tondok lo’ Pollo’na uai sia dio tana Benyamin sia lili’na Yerusalem sia lan mintu’ kotana Yehuda la lendu’ pole’omo tu mintu’ domba diongna lu limanna to umbilangi, kadanNa PUANG.

¹⁴Tonganna la sae tu allona, kadanNa PUANG, ke Kuparampo randannami tu kada melo, tu mangka Kupokada diona to Israel sia diona to Yehuda.

¹⁵Allo iato sia attu iato la Kupatuoan Daud tu misa’ Taruk malambu’, tu la umpalalo salunna sia kamaloloan lan lu tondok.

¹⁶Allo iato iatu Yehuda la dirampanan na iatu Yerusalem la torro marampa’, anna sangai tau tu tondok iato: PUANG tu kamaloloanta.

¹⁷Belanna nakua kadanNa PUANG: Tae’ nala ka’tu len dio mai Daud tu misa’ tau tu la unnisung dao isungan kapayunganna to Israel;

¹⁸sia dio mai tu mintu’ to minaa to Lewi tae’ len nala ka’tu tau dio oloKu umpemalaran pemala’ ditunu pu’pu’ sia untunu kande dipemalaran sia umpennoloan pemala’ pangrere’ lan mintu’ allo.

¹⁹Saemi tu kadanNa PUANG lako Yeremia, Nakua:

²⁰Inde sia tu kadanNa PUANG Nakua: Iake mibelai umpokai tu basseKu diona allo sia bongi, naurunganni tae’mo allo sia bongi ke attunnai,

²¹mane dukari dipoka to tu basseKu sola taungKu Daud, naurungan tae’mo anakna muane tu la dadi datu dao isungan kapayunganna, sia sola tu mai to Lewi, iamotu mintu’ to minaa, taungKu.

²²Susitu mintu’ ma’dandan maritik dao langi’ tang dikemba’ bilanganna sia karangan dio biring tasik tang tisuka’, susi dukamoto la Kupopemba’ka’ tu bati’na Daud, taungKu, sia mintu’ to Lewi, tu mengkaola lako Kaleku.

²³Saemi kadanNa PUANG lako Yeremia, Nakua:

²⁴Tae’raka mupalan penaai tu apa napokada bangsa iate, nakua: Iatu da’dua pa’rapuan tu mangka Napilei langsa’ PUANG, Natibemo, Nasayu tu taungKu, nasanga butung to tangiamo misa’ bangsa.

²⁵Nakua kadanNa PUANG: Iake tae’i Kutanan basseKu diona allo sia bongi sia iake tae’i Kupondok atoranna langi’ sia lino,

²⁶mane dukari la Kutibe tu bati’na Yakub sia bati’na Daud, taungKu, Kuurungan tang unnalai dio mai bati’na tu tau la umparenta tarukna Abraham, Ishak na Yakub, belanna la Kupopembali tu toto’na tau iato mai sia la Kukaturu-turui.