Read Toraja-Sa'dan YEREMIA 34 Bible Online

YEREMIA 34 - Toraja-Sa'dan bible

YEREMIA 34

¹Inde sia tu kadanNa PUANG lako Yeremia, tonna Nebukadnezar, datu Babel sia mintu’ surodadunna sia mintu’ kadatuan lan lino tu naluang parentana sia mintu’ bangsa urrarii Yerusalem sia mintu’ kotana tiku lao, kumua:

²Nakua kadanNa PUANG, Kapenombanna to Israel: Maleko ma’kada lako Zedekia, datu Yehuda, mukua: Inde sia tu kadanNa PUANG: Tonganna la Kusorong te kota iate tama limanna datu Babel, anna ballai api.

³Tae’ duka mula tilendok dio mai limanna, sangadinna manassa la ditingkanko ammu disorong tama limanna sia la sitiro lindo datu Babel sia la sipudukko sipa’kada sia la rampo dukako lako Babel.

⁴Moi na susito, perangii dukai tu kadanNa PUANG, e Zedekia, datu Yehuda! Inde sia tu kadanNa PUANG tu diona kamu: Tae’ mula mate nakande pa’dang.

⁵Sangadinna la mate marampa’ko sia susi pantunuan pebangki’ la umpakala’bi’ nene’ to dolomu, iamotu mintu’ datu dolo-dolona, tu dolo na iko, susi dukamoto tu tau iato mai la mantunu pebangki’ umpakala’bi’ko sia nabatingiko, nakua: A’a dikka’ puangki! Belanna Aku tu mangka ma’kada susito, kadanNa PUANG.

⁶Naparampomi nabi Yeremia te mintu’ kada iate lako Zedekia, datu Yehuda dio Yerusalem,

⁷tonna marassan tu surodaduanna datu Babel urrarii Yerusalem sia iatu mai kota Yehuda tu torronapa iamotu Lakhis sia Aseka, belanna ia mannamo te mai tu kota Yehuda ditambakuku tu torronapa.

⁸Inde sia tu kada lu dio mai PUANG lako Yeremia tonna mangka tu datu Zedekia untanan allu’ sola mintu’ to buda, tu dio Yerusalem, la umpetamban kamentomakakanna tau iato mai.

⁹Anna tau iato mai pada unneloranni mentomakaka tu kaunanna muane sia baine, ke to Ibrani, da naden misa’ tau umpokaunan to Yehuda siulu’na.

¹⁰Attu iato mintu’ arung sia mintu’ to buda, tu sanginaa untanan allu’, situru’mo pada la umpopentomakakai tu kaunanna muane sia baine, naurungan tae’mo napokaunanni tu tau iato mai; situru’mo sia naelorammo mentomakaka.

¹¹Apa undinna membaliomi tu penaanna tau iato mai, unnalai sule tu kaunan muane sia baine, tu mangka napopentomakaka, napatunduk pole’omi tu tau iato mai mendadi kaunan muane sia baine.

¹²Attu iato saemi tu kadanNa PUANG lako Yeremia, Nakua:

¹³Inde sia tu kadanNa PUANG, Kapenombanna to Israel: MangkaMo’ untanan basse sola nene’ to dolomi, tongKu solanni tassu’ lan mai tondok Mesir, lan mai inan dinii umpokaunanni, nakua:

¹⁴Iake nalambi’mi taun ma’pempitu pada la mieloran male tu siulu’mi, tu to Ibrani, tu mangka umbalukan kalena lako kalemi; iake mangkami mengkaunan annan taunna lako kalemi, la mipopentomakakamo. Apa tae’ natananni talinga.

¹⁵Apa totemo mengkatoba’mokomi sia umpogau’ apa malolo dio pentiroKu sia pada umpetambammokomi katomakakan lako solana sia mangkamokomi untanan basse dio oloKu lan banua, tu dinii ussa’bu’ sangangKu.

¹⁶Apa sorong boko’ pole’omokomi sia mie’sek tu sangangKu, belanna pada mitambai sule tu kaunanmi muane sia baine tu mangka mipopentomakaka unturu’ pa’poraian penaanna sia mipatunduk pole tu tau iato mai mendadi kaunanmi muane sia baine.

¹⁷Iamoto nakua kadanNa PUANG: Belanna tae’ miperangiiNa’ la pada umpetamban katomakakan lako siulu’na sia lako solana, kadanNa PUANG, iamoto la Kupetamban tu katomakakan lako kalemi, la napotaa pa’dang sia ra’ba biang sia karorian sia la Kupadadikomi misa’ apa metakuran lako mintu’ kadatuan lan lino.

¹⁸Iatu mintu’ tau, tu umpoka basseKu sia tae’ naturu’i tu mintu’ atoran basse iato, tu mangka natanan dio oloKu, la Kupapada anak sapi dipa’dua sia lumingka lan lu alla’ panta’tak iato,

¹⁹iamotu mintu’ arungna Yehuda sia Yerusalem sia mintu’ to mase’ponna datu sia mintu’ to minaa sia mintu’ pa’tondokan, tu lumingkamo lan lu alla’ panta’tak anak sapi iato.

²⁰Ondongpi la Kusorong tu tau iato mai tama limanna mintu’ ualinna sia mintu’ tau undaka’ lalan la umpatei sia iatu batang rabukna la napopendurukan mintu’ manuk-manuk dao langi’ sia olo’-olo’ dao kapadanganna.

²¹Susi dukato tu Zedekia datu to Yehuda sia mintu’ arungna la Kusorong tama limanna mintu’ ualinna sia mintu’ tau undaka’ lalan la umpatei, iamotu tama limanna surodadunna datu Babel, tu ke’de’mo dio mai kalemi.

²²La Kuben parenta, kadanNa PUANG, sia la Kupasule tu tau iato mai indete kota iate, anna laoi sia nataloi sia pura nasumpun; mintu’ kota Yehuda la Kupopempadang talo, anna moi misa’ tau tae’mo torro lan.