Read Toraja-Sa'dan YEREMIA 39 Bible Online

YEREMIA 39 - Toraja-Sa'dan bible

YEREMIA 39

¹Iatonna taun ma’pengkasera kadatuanna Zedekia, datu Yehuda, bulan ma’pessangpulo, saemi tu Nebukadnezar, datu Babel sola mintu’ surodadunna lako Yerusalem, anna patama limbui.

²Iatonna taun ma’pessangpulo misa kadatuanna Zedekia, bulan ma’penna’pa’ sia allo ma’pengkaseranna bulan iato, ditossomi tu tambakuku kota.

³Tamami tu mintu’ surodadunna datu Babel, anna bendan dio to’ babangan Tangnga, iamotu Nebusyazban pangulu sandan uai, Nergal-Sarezer, to maraa sia iatu mai arung senga’na datu Babel.

⁴Iatonna tiromi Zedekia, datu Yehuda, sia mintu’ surodadunna tu tau iato mai, mallaimi untampei tu kota tonna bongi ma’palulako pa’lak datu, anna sun unnola babangan naparitangnga da’dua benteng tembok, namale ma’palulako Araba-Yordan.

⁵Apa naula’ to Kasdim tu tau iato mai, anna lambi’i tu Zedekia dio padang marantena Yerikho; anna solanni lako Nebukadnezar, datu Babel dio Ribla, lili’na Hamat: nara’ta’i Nebukadnezar tu ukunganna.

⁶Napateimi datu Babel tu mintu’ anakna muane Zedekia dio Ribla dio tingayona sia napatei datu Babel tu mintu’ to Yehuda mala’bi’.

⁷Sia nasu’be’i patomali tu matanna Zedekia, anna pungoi rante tambaga da’dua, la nabaa lako Babel.

⁸Iatu tongkonan layukna datu nasumpun to Kasdim, sia iatu mai banuanna to buda, sia mintu’ tembo’ Yerusalem natuan.

⁹Iatu to torronapa, tu lan siapa kota sia mintu’ to menta’pa, tu malemo umpenta’pai, narampa Nebuzaradan, pangulu to ma’kampa nasolanni lako Babel.

¹⁰Apa iatu mintu’ to makario-rio dio mai to Yehuda tu tae’ apa naampui, napatorro Nebuzaradan, pangulu to ma’kampa dio tana Yehuda, sia naben ba’tu pira-pira pa’lak anggoro’ sia pa’pa’lakan tu tau iato mai.

¹¹Apa iatu diona Yeremia, mangkamo napa’parentan Nebukadnezar, datu Babel, lako Nebuzaradan, pangulu to ma’kampa, nakua:

¹²Alai mukampai meloi, da musussai lenni lako, sangadinna apa tu napokada, paturu’i bangi.

¹³Iamoto napesuammi Nebuzaradan, pangulu to ma’kampa sia Nebusyazban, tu pangulu sandan uai sia Nergal-Sarezer, to maraa, sia mintu’ pangulu pa’baraninna datu Babel,

¹⁴nasuami tu tau male unnala Yeremia dio mai tarampak pa’kampan, anna sorongi lako Gedalya, anakna Ahikam, anakna Safan, naeloranni umba-umba tu naporai. Susimoto natorro tu Yeremia dio lu to’ to buda.

¹⁵Denpa tu kadanNa PUANG sae lako Yeremia, tonna dipattangpa dio tarampak pa’kampan, Nakua:

¹⁶Malemoko, pokadai te lako Ebed-Melekh, to Etiopia: Inde sia tu kadanNa PUANGna mintu’ ma’dandan maritik, Kapenombanna to Israel: Manassa la Kupopembuamo tu mintu’ kadangKu lako kota iate tu la napokadakena, tangia la napomelona sia allo iate la mutiro.

¹⁷Apa allo ia dukato la Kurampanangko, kadanNa PUANG, sia tae’ mula disorong tama limanna mintu’ to mukataku’.

¹⁸Manassa la Kurampanangko, da ammu mate nakande pa’dang, sangadinna iatu pangrampamu iamo deatammu, belanna muposande’Na’, kadanNa PUANG.