Read Toraja-Sa'dan YEREMIA 4 Bible Online

YEREMIA 4 - Toraja-Sa'dan bible

YEREMIA 4

¹Iake la mengkatoba’ko e Israel, kadanNa PUANG, ma’dinko sule lako Kaleku sia ia ke mutibei tu apa megallian dio mai pentiroKu, manassa tae’mo mula mallai,

²sia la umpalaoko sumpa mukua: La lelukraka tuoNa PUANG situang kamanapparan, katonganan sia kamaloloan, anna mintu’ bangsa sipalakuan kamasakkean sia massattuan tete dio sanganNa PUANG.

³Belanna susite tu kadanNa PUANG lako mintu’ to Yehuda sia to Yerusalem, Nakua: Bungka’komi pa’lak ba’ru, da mimangambo’ lan lu to’ duri.

⁴Sunna’i tu kalemi lako PUANG sia tibei tu salepe’ kasirisan penaammi, e kamu to Yehuda sia pa’tondokan Yerusalem, da nama’lana-lana susi api tu kare’dekangKu sia ma’pamampu’, naurunganni tang dibela dipa’dei, belanna penggauran kadakemi.

⁵Patale’i te lan Yehuda, pa’perangianni lan lu Yerusalem sia pokadai kumua: Pannonii tu napiri tanduk lan lu tondok, sia pemandui metamba kumua: La sirampunkomi anta tama kota ditambakuku!

⁶Pabendanni tu tanda kumua: lu lakokomi Sion! Da mitorro bendan, sangadinna ma’dondokomi ammi mentirerung! Belanna la umpasaeNa’ kamandasan sia kasanggangan kapua lu daa mai ulunna salu.

⁷Iatu singa bendanmo lan mai to’ pangala’-ala’na, iatu to pasanggangna mintu’ bangsa ke’de’mo, tassu’mo lan mai inanna, la umpopempadang lo’bangi tu padangmu; mintu’ tondokmu la disabu’i, naurunganni tae’mo misa’ tau torro lan.

⁸Iamoto la membungku’ karungkomi sia umbating sia unnurruk-urruk, belanna iatu katorrong-torronganna PUANG tae’pa natoyang dio mai kaleki:

⁹Allo iato iatu datu sia mintu’ arung la pa’de deata, kadanNa PUANG, napussak penaanna tu mintu’ to minaa sia tiramban tu mintu’ nabi,

¹⁰sia ma’kada nakua: O Puangta PUANG, Kamumo mandu umpapusai te bangsa iate sia iatu pa’tondokan Yerusalem, tomMi ma’kada lako kumua: La marampa’komi, anna iatu pa’dang tibua’mo la ungka’tu sunga’.

¹¹Attu iato dipokada tu diona bangsa iate sia to lan Yerusalem, kumua: Den angin ma’pamalayu mangiri’ lu dao mai mintu’ tanete lan lu padang pangallaran lu lako anak dara bangsaKu; tangia angin ma’ta’pii ba’tu la ma’pamurru’i.

¹²La sae tu angin bara’ kapua Kusua; totemo Aku kalena la umpokadai tu ukungan urrua tau iato mai.

¹³Tiromi, kendekmo susi gaun tikembong; sia iatu mintu’ karetana butung angin bara’, na iatu mintu’ darangna mandu matira’ anna langkan maega: upu’ allota belanna sanggangmoki’.

¹⁴Seroi tu penaaammu, e Yerusalem, ammu makarimman; sangapapara tu tangnga’ sala tonang lan penaammu?

¹⁵Belanna saemo tu karebanna dio mai Dan sia dipa’peissanammo tu kareba kasanggangan dio mai buntu Efraim.

¹⁶Pokadanni mintu’ bangsa, ondongpi pa’peissananni lako Yerusalem, kumua: Ba’tu pira-pira to ma’patama limbu sae dio mai padang mambela, sia unnarrak-arrak la ullaoi mintu’ tondok Yehuda.

¹⁷Susito ma’kampa pa’lak ma’talimbungan untikui, belanna pabalibalimo lako Kaleku, kadanNa PUANG.

¹⁸Iatu kedomu sia penggaurammu umparampoi te mintu’na apa iate lako kalemu, napobua’ mintu’ kakadakeammu; mapai’ tongan to sia nari’ta’ ko sae tama penaammu.

¹⁹A’a mapa’di’ ba’tengku, mapa’di’ ba’tengku! Mangunterona’ sia bonnong tu penaangku, ma’dube-dube tu ara’ku, tae’mo kurapa’, belanna urrangi oni napiri tanduk sia arrak kasirarian.

²⁰Dennoi kasanggangan napetambanoi tau, ondongpi mintu’ padang mangsanmo; tae’ nadikapang anna disanggang tu mintu’ tendaku, sia lan sangpekkappidian matari tu sambo tendaku.

²¹Sangapapara’ la untiroi tu tanda iato sia urrangi oni napiri tanduk?

²²Belanna tang paissan tu taungKu sia tae’ natandaiNa’; iatu tau iato mai susito pia baga sia tang keinaa; manarang umpogau’ kadake, apa tae’ naissanni umpogau’ melo.

²³Iatongku tiroi te lino tang tibori’mo sia tae’ bangmo apa-apa lan; iatongku mentingara langngan langi’ pa’demo tu arrangna.

²⁴Iatongku mentingara langngan mintu’ buntu, tiseno nasangmo sia mintu’ tanete tigega’mo.

²⁵Umba-umba kunii mentiro, tae’mo tau, sia mintu’ manuk-manuk dao langi’ male nasangmo mettia’.

²⁶Iatu padang maelo kutiro dadimo padang pangallaran, sia mintu’ tondokna ro’pokmo dio oloNa PUANG, napobua’ katorrong-torronganNa.

²⁷Belanna nakua kadanNa PUANG, Nakua: Mintu’ padang iate la Kupopempadang lo’bang, apa tae’ Kupisanni.

²⁸Iamoto, la rosso tu lino sia iatu langi’ dao la ma’pote dibolong, belanna mangkamo Kupokada sia Kura’ta’ tu iannato, sia tae’mo Kupenassanni sia Kuboko’imo.

²⁹Belanna diona arrak pakkanarang sia to ma’pana, anna mallai tu mintu’ to lan tondok; iatu tau iato mai malemo tama pangala’-ala’ anna kendek langngan buntu batu; iatu mintu’ kota ditampe sia tae’mo misa’ tau torro lan.

³⁰Iamoto apa la mupogau’, e iko tu sanggangmo, moi ammu ma’pakean lango-lango, moi ammu beloi ma’rupa-rupa bulaan tu kalemu, moi ammu ba’da’i malotongi tu matammu? Tae’ gai’na mubeloi tu kalemu susito, mintu’ pa’pangngan buni ussayuko sia morai ungka’tu sunga’mu.

³¹Belanna kurangi tu misa’ sarro, susi sarrona baine mangurria’ sia sarro sume’den-me’den susi sarrona baine kianak pa’bunga’, iamotu sarrona anak dara Sion; seka-seka tongan sia umpopempala’ limanna, nakua: Upu’alloku, belanna la ka’tumo tu sunga’ku napobua’ to papatean.