Read Toraja-Sa'dan YEREMIA 40 Bible Online

YEREMIA 40 - Toraja-Sa'dan bible

YEREMIA 40

¹Inde sia tu kadanNa PUANG, tu sae lako Yeremia, tonna mangka ussuai Nebuzaradan, pangulu to ma’kampa, ke’de’ dio mai Rama, iamo tonna mangka umpesuanni unnalai, tonna dirantepa dio lu mintu’ to Yerusalem sia to Yehuda dirampa, tu la dipalele lako Babel.

²Attu iato napesuammi pangulu to ma’kampa tu Yeremia, anna kuanni kumua: PUANG, Kapenombammimo, mangka umpokadai tu diona mintu’ kamandasan la urrampoi tondok iate,

³sia Naparampomo PUANG sia Napogau’mo tu mintu’nato susitu Napokada, belanna kasalangkomi lako PUANG sia tae’ mituru’i tu kadanNa. Iamoto narampoikomi te ianna te.

⁴Tiromi totemo, kuko’ka’imo tu rante lan mai limammi: iake misangai melo ke maleki’ sola lako Babel, turu’mo’, manassa kupatiroangkomi kameloan; apa iake misangai kadake, ke maleki’ sola lako Babel, da’imito; mintu’na padang iate tae’ nadipesangkai, umba-umba misanga melo sia tongan, male bangmokomi lako.

⁵Sulemokomi lako Gedalya, anakna Ahikam, anakna Safan, tu naangka’ datu Babel umparenta tondok Yehuda, sia torrokomi sola dio lu to buda, ba’tu malekomi lako umba tu misanganna melo. Nabenmi pangulu to ma’kampa tu kinallo sia misa’ pamengan namane unneloranni male.

⁶Susimoto tu kasaeanna Yeremia lako Gedalya, anakna Ahikam, dio Mizpa, anna torro sola dio lu to buda, tu torrona siapa dio padang iato.

⁷Iatonna rangimi mintu’ kamandang surodadu tu dio lu padang sisola surodadunna, kumua naangka’mo datu Babel tu Gedalya, anakna Ahikam, umparenta tondok sia nasorongan lako tu mintu’ muane sia baine sia pia, iamotu mintu’ to makario-rio, tu tae’ nadirampa lako Babel,

⁸saemi tu tau iato mai lako Gedalya dio Mizpa, iamotu Ismael anakna Netanya sia Yohanan sia Yonatan, anakna Kareah sia Seraya, anakna Tanhumet sia anakna Efai, to Netofa sia Yezanya, anakna to Maakha sisola surodadunna.

⁹Umpalaomi sumpa tu Gedalya, anakna Ahikam, anakna Safan, lako tau iato mai sia mintu’ surodadunna, nakua: Da mimataku’ mengkaola lako to Kasdim; torro bangmokomi lan tondok iate sia mengkaolakomi lako datu Babel, ammi makarimman.

¹⁰Na iatu aku, manassa la torrona’ dio Mizpa, susito maraa dio tingayona to Kasdim, tu sae lako kaleta; apa iate kamu, mebua anggoro’komi sia mebua-buakomi sia urrampunkomi minna’ sia patamai pa’paniammi, ammi torro lan lu mintu’ kotami, tu la minii tontong torro.

¹¹Iatonna rangimi mintu’ to Yehuda, tu dio lu tondok Moab sia dio lu to Amon sia dio Edom sia lan lu mintu’ tondok senga’, kumua iatu datu Babel untampemo ba’tu pira-pira tau dio Yehuda sia naangka’mo tu Gedalya, anakna Ahikam, anakna Safan, la umparentai tu tau iato mai,

¹²sulemi tu mintu’ to Yehuda dio mai mintu’ tondok, tu dinii umpatisambo’i male, tama tondok Yehuda lako Gedalya dio Mizpa; urrampunmi tarru’ buda uai anggoro’ sia bua-bua tau iato mai.

¹³Attu iato saemi tu Yohanan, anakna Kareah sia mintu’ kamandang lompo, tu torro dio lu padang tonnanu, lako Gedalya dio Mizpa,

¹⁴sia ma’kada lako nakua: Miissan siaraka, kumua iatu Baalis, datu to Amon, ussuamo Ismael, anakna Netanya, la umpateikomi? Apa tae’ napatonganni Gedalya, anakna Ahikam.

¹⁵Mangkato ma’kada bunimi tu Yohanan, anakna Kareah, lako Gedalya dio Mizpa, nakua: Da’ito kumale umpatei tu Ismael, anakna Netanya, na moi misa’ tau tae’ unnissanni; ma’apai anna la umpateikomi, sisarak-sarak manii tu mintu’ to Yehuda, tu mangka sirampun lako kalemi, anna sanggang tu mintu’ to torro dio mai to Yehuda?

¹⁶Apa ma’kada tu Gedalya, anakna Ahikam lako Yohanan, anakna Kareah, nakua: Da mupogau’i to, belanna tang tongan tu mupokada diona Ismael.