Read Toraja-Sa'dan YEREMIA 43 Bible Online

YEREMIA 43 - Toraja-Sa'dan bible

YEREMIA 43

¹Iatonna mangkamo Yeremia umpokadai lako mintu’ to buda tu kadanNa PUANG, Kapenombanna, tu Napesuan PUANG, Kapenombanna, umparampoanni, tu mintu’ kada iato,

²nakuami tu Azarya, anakna Hosaya sia Yohanan, anakna Kareah sia mintu’ to matampo lako Yeremia: Tae’ natongan te kadammi; tae’ Nasuakomi PUANG, Kapenombanta, umpepasananni kumua: Da mimale lako Mesir la mentiruran dio.

³Apa naada’ salamokomi Barukh, anakna Neria, la undakarangkanni kadake, kumua anna sorongkan tama limanna to Kasdim, anna pateikanni ba’tu napali’ lako Babel.

⁴Susimoto tu Yohanan, anakna Kareah sia mintu’ pa’barani sia mintu’ to buda tang unturu’ kadanNa PUANG, tae’ namorai torro lan tondok Yehuda.

⁵Sangadinna naala Yohanan, anakna Kareah sia mintu’ pa’barani tu to Yehuda tu torronapa, iamotu to sulemo dio mai mintu’ bangsa, tu dinii umpasisarak-sarakki male, la torro mari’pi dio tana Yehuda,

⁶iamotu mai muane sia baine sia pia sia anakna baine datu sia mintu’ tau tu napatorro Nebuzaradan, pangulu to ma’kampa, lako Gedalya, anakna Ahikam, anakna Safan, la nakampai, sia ia dukapa tu nabi Yeremia sola Barukh, anakna Neria.

⁷Anna male tu tau iato mai lako Mesir, belanna tang unturu’ kadanNa PUANG: rampomi lako Tahpanhes.

⁸Attu iato saemi kadanNa PUANG lako Yeremia dio Tahpanhes, Nakua:

⁹Alako batu kapua ammu tangkei, bunii lan to’ losso’ pitti’ diongna lu paladan batu dio tingo tongkonan layukna Firaun dio Tahpanhes, natingayo mintu’ to Yehuda,

¹⁰sia pokadai lako kumua: Inde sia tu kadanNa PUANGna mintu’ ma’dandan maritik, Kapenombanna to Israel, Nakua: Manassa la Kupesuan tu Nebukadnezar, datu Babel, iamo taungKu, anna pabendanni tu isungan kapayunganna dao te batu mangka Kubuni, sia naampa’i paramadani kapayunganna.

¹¹La sae anna taloi tu tondok Mesir; minda-minda tu dilampak mate, la mate, minda-minda tu dilampak dipali’, la dipali’, minda-minda tu dilampak nakande pa’dang, la nakande pa’dang.

¹²Sia la umpadukku api lan mintu’ banua deata to Mesir sia nasumpun sia narampa tu rapang-rapang dipodeatanna, sia napessambu’ tu tana Mesir, susito misa’ pangkambi’ ma’lullung, anna sun marampa’ inde to dio mai.

¹³Ia dukamo la umpoka-pokai tu mintu’ batu dipodeata dio to’ banua deata mata allo, tu bendan dio Mesir sia nasumpun tu banua deata dio lu Mesir.