Read Toraja-Sa'dan YEREMIA 46 Bible Online

YEREMIA 46 - Toraja-Sa'dan bible

YEREMIA 46

¹Inde sia tu kada sae lako nabi Yeremia, iamotu kadanNa PUANG, diona bangsa kapere’.

²Diona tondok Mesir. Diona kataloanna surodadunna Firaun Nekho, datu Mesir, tu dio lu randan salu Efrat, sikandappi’ Karkemis, tu mangka natalo Nebukadnezar, datu Babel, tonna taun ma’penna’pa’ kadatuanna Yoyakim, anakna Yosia, datu to Yehuda.

³Parandanni tu balulang sia balulang kalando, ammi tama tananan ra’!

⁴Pariu’imi tu darang, messakemokomi, e mintu’ pakkanarang, ma’pampangangkomi, ma’songko’ bassi, pematadi’imi tu mata dokemi, ammi ma’bayu kararran!

⁵Ma’apai angku tiroi tu tau iato tiramban sia sorong boko’? Iatu mai pa’baraninna ditalomo anna tarru’ liu mallai tang messaile len: dadimi tu katirambanan tiku lao! kadanNa PUANG.

⁶Iatu to matippa’ tang pakala umpallaian kalena sia to lalong tae’ duka natilendok: daanna lu dio randan salu Efrat titodo tu tau iato mai anna tibambang.

⁷Mindara ia tu saba’ susi salu Nil sia mongngo’ susi salu darra’?

⁸Iatu to Mesir saba’mo susi salu Nil sia mongngo’ susi salu darra’, nakua: la ke’de’mo ussitutu’i te lino sia la kusanggang tu mintu’ tondok sia to umpa’tondokki.

⁹Palakomi, e darang: patikaranni, e kareta; la tassu’mokomi e mintu’ to lalong: To Etiopia sia to Put ma’balulang sia mintu’ to Lidia ma’binting pana.

¹⁰Iamote tu alloNa PUANGna mintu’ ma’dandan maritik, iamo allo pa’pakkan la umpabala’i kakadakeanna mintu’ ualinNa. Iamoto nasamosona tu kandean pa’dang sia malango napobua’ rarana tu tau iato mai, belanna Napogau’mo Puang, iamo PUANGna mintu’ ma’dandan maritik, tu misa’ pemala’ pangrere’ daana lu padang dio randan salu Efrat.

¹¹Maleko lako Gilead, alanni gommo’ pedampi tu kalemu, e anak dara, anakna datu baine Mesir; tae’ gai’mu umpebudai pedampi, belanna tae’ mula mondo.

¹²Iatu kamatunammu narangimo mintu’ bangsa, sia naponnoimo sarromu te lino, belanna sititodo-todoammo tu mai to lalong, napada tibambang.

¹³Inde sia tu kada Napokada PUANG lako nabi Yeremia tu diona kasaeanna Nebukadnezar, datu Babel, la untalo tondok Mesir.

¹⁴Pa’peissananni lan lu mintu’ Mesir, patale’i dio Migdol, sia patale’ dukai dio Memfis sia Tahpanhes, kumua: ma’pampangangko ammu tumanan, belanna kumandemo tu pa’dang tiku lao.

¹⁵Ma’apari anna dibambanganra tu lalongmu, sia anna tang tumananra? Belanna PUANG unnula’i natibambang.

¹⁶Buda tu mai tau titodo anna tibambang sii’pin-i’pinan, naurungan ma’kada nakua: Maikomi tasule lako bangsata sia lako tondok kadadianta, naruaki’ manii kandean pa’dang masang tongan.

¹⁷Sangaimi tu Firaun, datu Mesir: To ma’pamaramba, tu umpopa’elo’na bangi lendu’ tu attu melo.

¹⁸La lelukraka tuoKu, kadanNa Datu, tu diganti PUANGna mintu’ ma’dandan maritik, kumua: Susitu buntu Tabor dio lu mintu’ buntu sia buntu Karmel dio randan tasik, susimo kasaeanna to.

¹⁹Ma’parandanko, belanna la dipali’ko, e to ma’tondok, e anakna baine Mesir, belanna la mempadang lo’bang tu Memfis sia la disanggang, naurungan moi misa’ tau tae’mo la torro lan.

²⁰Iatu Mesir butung to anak sapi me’lok, apa narampoi tambolik lu daa mai.

²¹Sia mintu’ surodadu disaroi dio lu tau iato mai susitu anak sapi maloppok, apa tau iato mai memboko’, anna mallai sola nasang sia tang naatta tumanan, belanna narampoimo allo kamandasanna, iamotu allo kadiukunganna.

²²Iatu gamaranna susi garesena ula’ mendonglo’, tarru’ lako tete dio kamatotoranna sia tau iato mai sae umpellambi’i sitangke uase susito manglelleng kayu.

²³Iatu tau iato mai ullelleng pangala’na, kadanNa PUANG, belanna tang dikanassa melo bilanganna, sia mandu losong anna batik, tang dikemba’ diia’.

²⁴Iatu anak dara Mesir matunamo, mangkamo disorong tama limanna tau lu daa mai.

²⁵Iatu PUANGna mintu’ ma’dandan maritik, Kapenombanna to Israel, ma’kada Nakua: Manassa la Kuukung tu Amon dio Tebe sia Firaun sia tondok Mesir sia iatu mai deatanna sia iatu mai datunna, sia la Kuukung tu Firaun sia iatu mai to urrannuanni.

²⁶Sia la Kusorong tu tau iato mai tama limanna mintu’ to undaka’ lalan la umpatei, iamotu tama limanna Nebukadnezar, datu Babel, sia tama limanna taunna. Apa undinnato marampa’mi sule tu tondokna susito dolona, kadanNa PUANG.

²⁷Da mumataku’, e taungKu Yakub, sia da mutiramban, e Israel, belanna manassa la Kurampanangko dio mai tondok mambela, sia iatu bati’mu dio mai tondok dinii umpali’ko; la sulemo tu Yakub anna torro marampa’ sia manaman, na moi misa’ tau tae’ umpatirambanni.

²⁸Da mumataku’, e taungKu Yakub, kadanNa PUANG, belanna Kurondongko sia la Kusabu’i tarru’ tu mintu’ bangsa, Kunii untale’ko, apa iko tae’ Kula ussabu’i tarru’ko, sangadinna la Kupa’dikkiko sitinayanna, moi natae’ Kuelorangko tang diukung.