Read Toraja-Sa'dan YEREMIA 5 Bible Online

YEREMIA 5 - Toraja-Sa'dan bible

YEREMIA 5

¹La lele-lelekomi lan lu batatta Yerusalem, tiro meloi sia kamantang tonganni sia daka’i lan lu tana lapangna, ke denni miappa’, moi misa’mora tau tu umpogau’ salunna sia untoe manda’ kabulo-lollongan, manassa la Kupa’dei tu kasalanna.

²Moi anna ma’kada tu tau iato mai kumua: La lelukraka tuoNa PUANG umpalao duka ia sumpa tang tongan.

³O PUANG, tang Mipenunuraka tu kabulo-lollongan? Mangkamo Mibamba tu tau iato mai, apa tae’ nasa’dinganni tu mapa’di’; Misanggangmo, apa natumpu tu peada’, sangadinna umpamatoro lindona ondong na buntu batu sia noka mengkatoba’.

⁴Apa kukua, iatu tau iato mai bongko; tau iato mai baga liu, belanna tae’ natandai tu lalanNa PUANG sia katongananNa Kapenombanna.

⁵Iamoto la malena’ lako to kapuana sipa’kada-kada, belanna tau iato mai untandai lalanNa PUANG sia katongananNa Kapenombanna. Apa tau ia dukamoto mai ussituru’i ulle’toi tu ayoka sia ungka’tuan pepori.

⁶Iamoto anna dammakki singa lan mai pangala’ tu tau iato mai sia nasanggangi guruk lan mai padang aak sia naodo’ arimau buluh tu mintu’ kotana, naminda-minda tu tassu’ lan mai la nase’bu-se’bu, belanna budamo tu kasalanna sia tang dikemba’mo tu kakelokanna.

⁷Umba la Kukua umpa’dei tu kasalammu? Mintu’ anakmu untampeMo’ sia umpalao sumpa umposissareanni tu tangia kapenomban. IatongKu mangkamo umpedia’i, ullullu’omira tananan dapo’ sia tontong bangmo lan banua lonte.

⁸Iatu tau iato mai butung to darang laki kura’ tu lu lako lu dio bang mai, ma’mehe’-mehe’ ungkaduangi bainena solana.

⁹Ma’apai angKu tang la umparessai tu apa susito, kadanNa PUANG; ma’apai angKu tang la umpapakkanni tu bangsa susito?

¹⁰La mikendekki tu tanete anggoro’na, ammi sanggangi, apa da miratoi; alai tu tangkena, belanna tangia apanNa PUANG.

¹¹Belanna kedo tang maruru’ manna napogau’ to Israel sia to Yehuda lako Kaleku, kadanNa PUANG.

¹²Iatu tau iato mai umpeonganni PUANG sia ma’kada nakua: Tangia Ia pekapuangangki! sia: Tang narampoimoki’ kamandasan, sia tang la untiromoki’ kandean pa’dang sia karorian.

¹³Iatu mintu’ nabi la susi bang angin, tae’ kuasa ullopianni ma’kada: da’ito na ia kalenamo narampoi tu susinna te.

¹⁴Iamoto Nama’kada PUANG, Kapenombanna mintu’ ma’dandan maritik, Nakua: Belanna susi kadammi to, iamoto na iatu kadangKu lan sadangmu la kupopendadimo api na bangsa iate susi kayu, anna pepurai nakande tu tau iato mai.

¹⁵Tonganna la Kupasaeangkomi mintu’ bangsa mambela, e to Israel, kadanNa PUANG, iamo misa’ bangsa matontongan tu inang den dolona, misa’ bangsa tang mutandai basana sia tang mupebuyu’ tu kadanna.

¹⁶Iatu inan tinaranna butung to kaburu’ menganga: mintu’ tu tau iato mai tau lalong nasang.

¹⁷Bangsa iamoto la umpurai nakande tu bura padangmu sia rotimmu, sia la ummangsanni tu mai anakmu muane sia baine, sia la umpurai nakande tu mintu’ dombamu sia sapimmu sia ia duka la umpurai nakande tu bua anggoro’mu sia bua ara sia ia duka la ussanggangi pa’dang tu mintu’ tondok ditambakukummu tu murannuan.

¹⁸Attu iato, kadanNa PUANG, tae’ dukapa angKu la umpisannikomi.

¹⁹La dadi, ke ma’kadakomi kumua: Ma’apai anNa parampoiki’ PUANG, Kapenombanta te mintu’ apa iate, la mukua lako: susitu mangkaMo’ mitampe ammi menomba lako deata senga’ lan tondokmi, susi dukato la napokaunankomi to senga’ lan misa’ tondok tangia kamu puangna.

²⁰Pa’peissananni te dio lu bati’na Yakub sia pakaleleanni lan lu Yehuda, kumua:

²¹Perangiimi te, e bangsa baga sia tae’ tangnga’na, tu kemata, apa tae’ napatiro, tu ketalinga, apa tae’ naparangi.

²²Tae’raka mila ungkataku’Na’, kadanNa PUANG, tae’raka mila ma’parondo dio oloKu, tu umpadadi bungin naposapa’ tasik, sia napokatonan tontong tu tang nalendu’i? Moi umbassan-bassan tu bombangna, tang nalambi’ duka lako, moi mematu-matu, tae’ duka naleanni.

²³Apa iate bangsa iate to toro sia pabali-bali, sorong boko’mo unturu’ lalan penaanna.

²⁴Sia tae’ nama’kada lan penaanna, kumua: Melo ke mengkaolaki’ lako PUANG, Kapenombanta, tu mamase umpasaeangki’ uran, la uran bunga’ la uran tampak, ke attunnai sia tu umpenandangki’ ba’tu pirang-pirang minggu, tu attu pegandungan.

²⁵Apa iatu kakadakeammi untumpui te mintu’ apa iate sia kasalammi umpatoyangi te mintu’ kameloan iate dio mai kalemi.

²⁶Belanna dio lu mintu’ taungKu diapparan tu to tang mekaaluk, tu mangodo’-odo’ susito ma’poya lumbang untanan poya la umpoya tau.

²⁷Susi toban ponno manuk-manuk, susi dukamoto tu banuanna ponno pa’pakena, iamoto napobannangi mala’bi’ sia sugi’;

²⁸malompo tu tau iato mai sia malannu’; tarru’ maparrang tu kakadakeanna. Tae’ namalambu’ ma’paolai salu la urra’ta’ kara-karana pia biung, apa moi susito maupa’ duka; sia tang untonganan kara-karana to bongko.

²⁹Ma’apai angKu tang la umparessai tu apa susito, kadanNa PUANG; ma’apai angKu tang la umpapakkanni tu bangsa susito?

³⁰Metakuran sia megi’giran tu apa dadi lan tondok iate.

³¹Mintu’ nabi ma’nubua’ tang tongan sia mintu’ to minaa undi duka mesaro la’da’ sia mintu’ taungKu umporai tu iannato. Na apamora la mipogau’ ke katampakannai?