Read Toraja-Sa'dan YEREMIA 50 Bible Online

YEREMIA 50 - Toraja-Sa'dan bible

YEREMIA 50

¹Inde sia tu kada Napokada PUANG tu nalopian nabi Yeremia diona Babel, iamo tondok to Kasdim.

²Patale’i dio lu mintu’ bangsa sia pa’peissananni, angka’i misa’ bandera sia pa’peissananni, da mibunii, sia pokadai kumua: Ditalomo tu Babel, sia kasirisanmo tu Bel sia kapussakan tu Merodakh; kasirisan tu rapang-rapang dipodeatanna, sia mintu’ deata megi’giranna.

³Belanna misa’ bangsa lu daa mai ullaoi, tu la umpopempadang lo’bangi tu padangna, naurunganni tae’mo tau untorroi; la tolino la patuoan mallai nasangmo anna lanna’.

⁴Allo iato sia attu iato, kadanNa PUANG, pada la sae tu mintu’ to Israel sola to Yehuda, situang tangi’na undaka’ PUANG, Kapenombanna.

⁵Tau iato mai la umpekutanan Sion sia iatu lindona la mentingo lako; la sae anna mengkara’pa lako PUANG tete dio misa’ basse matontongan, tu tae’mo nala dikalupai len.

⁶Iatu taungKu butungmo to domba pusa tu napapusa pengkambi’na sia nasolan langngan buntu; sia salamba-salao tu tau iato mai dio mai misa’ buntu lako misa’ tanete, naurungan tae’mo nakilalai tu inan nanii mari’pi.

⁷Iatu tau iato mai napurai nakande mintu’ to unnapparanni sia nakua tu mintu’ ualinna: Tae’ kisala, belanna kasalammo tu tau iato mai lako PUANG, tu inanna kamaloloan, ondongpi lako PUANG, pa’rannuananna nene’ to dolona.

⁸Mallaikomi lan mai Babel sia tassu’komi lan mai tondok to Kasdim sia la susikomi domba laki tu undoloan domba ma’baanan.

⁹Belanna tonganna la kupake’de’ tu misa’ kasirampunan bangsa kapua lu daa mai la ullaoi Babel, sia ma’pampangan la ullaoi, belanna iatu kaditaloanna bu’tu inde to daa mai. Iatu anak panana to lalong maupa’, tu tae’ lenpa nasule lo’bang.

¹⁰Attu iato iatu tondok Kasdim la dipangrampai; minda-minda urrampai la samosona, kadanNa PUANG.

¹¹Moi parannu-rannukomi sia unnarrak-arrak, e mintu’ pangrampa mana’Ku, moi mekkondong-kondongkomi susitu anak sapi lan lu to’ riu kamban sia ma’mehe’-mehe’ susi darang laki,

¹²iatu indo’mi kasirisan tonganmo sia matunamo tu to undadiangkomi; tiromi tu misa’ bangsa makaasi-asi, tu sangtinti padang pangallaran, sia padang talo sia padang aak.

¹³Tete dio kare’dekanna ara’Na PUANG, tae’mo nala dinii torro, sangadinna la mempadang lo’bang nasang; minda-minda tu ullendu’i Babel, la bangngo ara’na anna tellei belanna mintu’ kasangganganna.

¹⁴La ma’pampangangkomi umpatama limbu Babel, e kamu mintu’ to umbinting pana! Panai lako, da mikanana’i tu tinaran, belanna kasalammo lako PUANG!

¹⁵Sumapukokomi ullilingi — ussorongmo kalena; ro’pokmo tu lentong tembo’na, sia dirondonmo tu rinding tembo’na, belanna iamote tu pa’pakkanNa PUANG; papakkanni sia pogau’i lako susitu mangka napogau’.

¹⁶Pisanni lan mai Babel tu to mangambo’ sia iatu to sitoe sae’, ke attu pegandungan. Belanna iatu kandean pa’dang masang tongan la pantan sule lako bangsana sia pantan mallai lako tondokna.

¹⁷Iatu Israel butung to misa’ domba dipakasingkiran, tu naula’ ba’tu pira-pira singa. Pamulanna naampello’ datu Asyur, ma’katampakanna totemo iatu bukunna nale’to-le’to Nebukadnezar, datu Babel.

¹⁸Iamoto, nakua kadanNa PUANGna mintu’ ma’dandan maritik, Kapenombanna to Israel: Manassa la Kuukung tu datu Babel sia tondokna, susitu datu Asyur mangka Kuukung.

¹⁹Sia la Kupasule tu to Israel lako padang kariuanna, anna purai nakande tu riu dao Karmel sia Basan sia la dipedia’i dao buntu Efraim sia lan Gilead.

²⁰Allo iato sia attu iato, kadanNa PUANG, la didaka’ tu kakadakeanna Israel, apa tae’, sia iatu kasalanna Yehuda, apa tae’ diapparan, belanna la Kupagarri’ kasalanna minda-minda tu Kupopa’elo’napa la torro.

²¹Malemoko ullaoi tu tondok Merataim sia ullaoi tu to lan Pekod. Roto’i sia sabu’i butung pepayu, kadanNa PUANG, sia pogau’ nasangi to, susitu Kupasanangko.

²²Den arrak kapararian dirangi lan tondok sia kasanggangan kapua.

²³Umba nakua anna le’tomo sia pokamo tu pepa’tongna mintu’ lino. Umba nakua tu Babel anna dadimo misa’ apa megiangan dio lu mintu’ bangsa.

²⁴Kutanannimoko poya sia diala dukamoko, e Babel, tonna tae’pa muissanni; ta’pa diapparangko sia ditingkan dukako, belanna unnapeko PUANG.

²⁵Nabungka’mo PUANG tu pangnannan pa’bunoNa sia Napatassu’mo tu mintu’ pa’buno kasengkeanNa, belanna iamote tu misa’ penggauran tu la Napogau’ Puang, PUANGna mintu’ ma’dandan maritik lan tondok to Kasdim.

²⁶Sangke’derammokomi, naurunganni tae’mo misa’ tau torro, la male nasang ullaoi, bungka’i tu mintu’ alangna, popa’toppo’-toppo’i susi pongo’ gandung, sia sabu’i; damo naden torrona.

²⁷Ba’tai tu mintu’ sapi lakinna, da’ito namale ditunu. A’a dikka’ tu tau iato mai, belanna nalambi’mo tu allona sia attu kadiukunganna.

²⁸Den kadanna dirangi tu to mallai tilendok dio mai tondok Babel la umpa’peissananni dio Sion tu pa’pakkanNa PUANG, Kapenombanta, iamotu pa’pakkanNa diona banua kabusunganNa.

²⁹Arrakki tu mintu’ to ma’pana ullaoi Babel sia mintu’ to umbinting panana; patama limbui, da naden misa’ tau mallai tilendok! Pabala’i sitinaya mintu’ penggauranna sia pogau’i lako susitu mintu’ apa mangka napogau’. Belanna matampo pabali-bali lako PUANG, tu Tomaserona to Israel.

³⁰Iamoto iatu mintu’ to manguranna la songka mate dio lu pasa’ sia mintu’ surodadunna la disabu’i allo iato, kadanNa PUANG.

³¹Tonganna, la Kuukungko, e Kamatampoan, kadanNa PUANG, PUANGna mintu’ ma’dandan maritik, belanna saemo tu allomu, sia attu Kunii unnukungko.

³²Sia iatu Kamatampoan la titodo sia songka, na moi misa’ tau tae’mo la umpamalimbangunni sia la Kupadukku tu api lan lu mintu’ kotana, anna sumpunni tu mintu’ lili’na.

³³Nakua kadanNa PUANGna mintu’ ma’dandan maritik kumua: Pada dipakario-riomo to Israel tu to Yehuda: na iatu mintu’ tau umpali’i, untoe manda’i, tang naeloran male.

³⁴Matoto’ tu Pela’bakna, tu disanga PUANGna mintu’ ma’dandan maritik: manassa Iamo la urra’ta’i tu kara-karana, kumua anna paden karapasan lan lino, apa iatu to untorroi Babel la Napamagiang.

³⁵E pa’dang rampoimoko to Kasdim, kadanNa PUANG, sia to torro lan Babel sia iatu mai arungna sia tu paissanna.

³⁶E pa’dang laoimi tu mai to ma’kada layuk, anna baga tu tau iato mai. E pa’dang laoimi tu mai to lalongna, anna tiramban.

³⁷E pa’dang laoimi tu mintu’ darangna sia mintu’ karetana sia mintu’ surodadu pantan tama dio lu tau iato mai, anna tau iato mai butung to baine! E pa’dang laoimi tu mintu’ iananna, anna dirampa.

³⁸E pa’dang laoimi tu kauaianna, anna mempadang rangke. Belanna tondok iato nanii ponno rapang-rapang dipodeata dipa’ sia napobagamo tau iato mai tu rapang-rapang dipodeata metakuran.

³⁹Iamoto naniimi torro serre’ lampung sola serigala sia nanii duka torro burung unta sia tang titondokmo sae lakona, na moi misa’ tau tae’mo untorroi ussiosso’i.

⁴⁰Susitu Sodom sola Gomora sola mintu’ lili’na mangka Naro’pok Kapenomban, kadanNa PUANG, susi dukamoto moi misa’ tau tae’mo la torro dio sia moi misa’ ma’rupa tau tae’mo la mempue dio.

⁴¹Tiromi, la sae tu misa’ bangsa lu daa mai, misa’ to sangpetayanan kapua nasolan datu tarompo’ ke’de’ dio mai randan langi’.

⁴²Tau iato mai untangke pana sia doke; masuang sia tang untandai kamamasean. Iatu ongngo’na mariak susi tasik sia pakkanarang; sia sakka’mo parari la ullaoiko, e anak dara Babel.

⁴³Iatonna rangimi datu Babel tu karebanna, loemi tu limanna; narampoi kapussakan sia kamapa’diran susito misa’ baine manguria’.

⁴⁴Tonganna susi misa’ singa sun lan mai pangala’-ala’ makampunna Yordan susi dukamoto tu uali ullaoi tu inan matoto’, belanna la sangpekkappidian matari Kuula’i tu tau iato mai inde to lan mai. Sia mindara tu dipilei tu Kuangka’ la umparentai? Belanna mindara tu padangKu sia mindara untuntun lalan poissanangKu sia to mangkambi’ umbara tu ungkullei bendan dio oloKu?

⁴⁵Iamoto perangiimi tu panglampakNa PUANG, tu mangka Napamanassa la naposanggang Babel sia tu apa mangka Nara’ta’ lan tanan penaanNa la ullaoi to Kasdim: Manassa nariu’ pia to mangkambi’ domba tu tau iato mai, sia iatu padangna la bangngo ara’na diona tau iato mai.

⁴⁶Iate lino tigega’ napobua’ kareba kaditaloanna Babel sia iatu urrukna dirangi dio lu mintu’ bangsa.