Read Toraja-Sa'dan YEREMIA 52 Bible Online

YEREMIA 52 - Toraja-Sa'dan bible

YEREMIA 52

¹Iatu Zedekia duangpulo mmisa taunna tonna diangka’ datu, anna ma’parenta dio Yerusalem sangpulo misa taunna. Iatu indo’na disanga Hamutal, anakna Yeremia dio mai Libna.

²Napogau’ tu apa kadake dio pentiroNa PUANG, susi mintu’ penggauranna Yoyakim.

³Belanna kasengkeanNa PUANG, anna susi maromoto tu Yerusalem sola Yehuda. Nasualei dio mai oloNa. Pabali-balimi Zedekia lako datu Babel.

⁴Iatonna taun ma’pengkasera kadatuanna, bulan ma’pessangpulo sia allo ma’pessangpulo bulan iato, saemi Nebukadnezar, datu Babel, sola mintu’ surodadunna ullaoi Yerusalem sia napabendan tu tendana tiku lao, nagaragai tu benteng la nanii ullaoi.

⁵Susimo kadipatama-limbuanna tu tondok iato sae lako taun ma’pessangpulo misa kadatuanna Zedekia.

⁶Iatonna bulan ma’penna’pa’, allo ma’pengkasera bulan iato, lendu’ ia ma’irrikna karorian lan kota, naurungan tae’mo rotinna tu mai to buda lan tondok.

⁷Iatu mai tambakuku kota ditossomo, anna mallai tu mai surodadu lan mai kota tonna bongi unnola babangan naparitangnga da’dua benteng tembo’ sirondong pa’lakna datu — na iatu to Kasdim umpatama limbu kota iato, apa moi susito unnola bang lalan lu lako Araba-Yordan.

⁸Apa iatu datu naula’ surodadu to Kasdim, anna lambi’i tu Zedekia dio padang marantena Yerikho, naurungan dipasisarak-sarak tu mai surodadunna tu nasolan.

⁹Natingkanni tu datu, nasolammi lako datu Babel dio Ribla, lili’na Hamat, nara’ta’mi datu Babel tu ukunganna.

¹⁰Napateimi datu Babel tu mintu’ anakna muane Zedekia dio tingayona sia iatu mai arungna Yehuda napatei duka dio Ribla.

¹¹Sia napopebutai patomali tu matanna Zedekia, anna pungoi da’dua rante tambaga; anna solanni datu Babel lako Babel sia napatama pa’tarungkuan sae lako matena.

¹²Iatonna bulan ma’pellima, allo ma’pessangpulo bulan iato, iamotu taun ma’pessangpulo kaseranna kadatuanna Nebukadnezar, datu Babel, saemi lako Yerusalem tu Nebuzaradan, pangulu to ma’kampa, tu mareke’na datu Babel.

¹³Nasumpunmi tu banuanNa PUANG sia tongkonan layukna datu, sia iatu mai banua dio Yerusalem, iamotu mintu’ banuanna to kapua, pura nasumpun.

¹⁴Iatu rinding tembo’ Yerusalem tiku lao natuan nasangmo mintu’ surodadu to Kasdim tu nasolan pangulu to ma’kampa.

¹⁵Iatu to makario-riona bangsa iato sia iatu to tinampenapa lan kota sia iatu mai to menta’pa tu malemo lako datu Babel, sia iatu mai to buda tu tinampepa napali’mo Nebuzaradan, pangulu to ma’kampa.

¹⁶Apa iatu ba’tu pira-pira to makario-rio dio tondok iato natampepa Nebuzaradan, pangulu to ma’kampa, la ma’pa’lak anggoro’ sia ma’pa’lak.

¹⁷Iatu lentong tambaga, tu dio banuanNa PUANG sia mintu’ tangdan pembasean sia tasik tambaga tu lan banuanNa PUANG puramo natesse to Kasdim anna baai tu mintu’ tambaga iato lako Babel.

¹⁸Sia ia duka tu kurin sia pesodok sia piso sia pindan pa’pi’pikan sia dolong-dolong sia mintu’ pareanan tambaga tu dipake menomba, nabaa nasang.

¹⁹Sia piring sia pa’peruayan sia pindan pa’pi’pikan sia kurin sia tongkonan palita sia dolong-dolong sia balubu, iatu mintu’ pareanan bulaan sia salaka nabaa nasang pangulu to ma’kampa iato.

²⁰Sia iatu lentong da’dua sia iatu tasik tambaga misa’ sia iatu tangdan pembasean tu nagaragan datu Salomo banuanNa PUANG tang dibela ditimbang tu tambagana mintu’ pareanan iato.

²¹Iatu lentong iato da’dua sangpulo karua siku langka’na, ke misa’oi, sia sangpulo dua siku tu ulang pelebu’na sia kambanna patang taruno anna lo’bang lanna lu.

²²Daona lentong iato nanii misa’ parande tambaga sia iatu misa’ parande limang siku langka’na, sia daona pole’ lu tu parande tikunna male den dalla’ tambaga massang sola bua dalima. Susi dukato tu bua dalima dio lentong misa’na.

²³Iatu mintu’ bua dalima iato den kasera pulona nannan tu payan; mintu’ bua dalima iato den saratu’ dio dalla’ iato tiku lao.

²⁴Natingkanmi pangulu to ma’kampa tu Seraya, tominaa kapua, sia Zefanya, tominaa ma’penduanna, sia iatu tallu to ma’kampa ba’ba.

²⁵Sia lan mai kota iato natingkan tu misa’ to mase’ponna datu, tu ungkampai surodadu, sia pitui dio mai tau iato, tu la tontong mennolo lako datu, tu diapparan lan kota iato, sia to massura’na kamandang lompo, tu urrampun mintu’ tau lan tondok la lao parari, sia annan pulona tau dio mai kampung tu diapparan lan kota.

²⁶Natingkanmi Nebuzaradan, pangulu to ma’kampa tu mintu’ tau iato mai, nabaai mennolo lako datu Babel, dio Ribla.

²⁷Napesuammi datu Babel umpatei tu tau iato mai dio Ribla lan lili’na Hamat. Susimoto tu kadipaliranna to Yehuda lan mai tondokna.

²⁸Inde sia tu mintu’ to napali’ Nebuzaradan; iamo tonna taun ma’pempitu, tallungsa’bu duangpulo ntallu to Yehuda;

²⁹sia iatonna taun ma’pessangpulo karua kadatuanna Nebukadnezar tassu’mi lan mai Yerusalem tu tau karua ratu’na tallungpulo ndua tau.

³⁰Iatonna taun ma’penduangpulo ntallu kadatuanna Nebukadnezar, napali’mi Nebuzaradan, pangulu to ma’kampa tu to Yehuda pituratu’ patangpulo llima. Mintu’i tu tau iato mai patangsa’bu annan ratu’.

³¹Iatonna taun ma’pentallungpulo mpitu kadipaliranna Yoyakhin, datu Yehuda bulan ma’pessangpulo dua, allo ma’penduangpulo llima bulan iato, iatu Yoyakhin, datu Yehuda, nakaturu-turui Ewil-Merodakh, datu Babel, sia natassu’i lan mai pa’tarungkuan, lan taun dinii unnangka’i datu.

³²Ma’kada malamma’mi tu datu lako kalena sia napamadao tu kao’koranna na iatu kao’koranna mintu’ datu, tu nasolan dio Babel.

³³Naelorammi datu Babel ussondai tu pakean pa’tarungkuanna, sia kumande dio medana datu lan mintu’ katuoanna.

³⁴Tontong nabalantai datu Babel pada tu silasanna napake kiallo-kiallo lan mintu’ katuoanna sae lako kamateanna.