Read Toraja-Sa'dan YEREMIA 6 Bible Online

YEREMIA 6 - Toraja-Sa'dan bible

YEREMIA 6

¹Mallaikomi, e bati’na Benyamin, lan mai Yerusalem. Pannonii tu napiri tanduk lo’ Tekoa sia tutungi tu bia’ naparrang tu dukkunna dao Bet-Kerem! Belanna daa mai ulunna salu mempaan tu misa’ kakadakean sia kasanggangan kapua.

²La Kusanggang tu baine melo sia dipamo’le’, iamotu anak dara Sion.

³Iatu mai pangkambi’ ussolan dombana ma’baanan lako, napabendanni tu tendana tiku lao sia napakande dio lu to’ riu umba-umba tu nalambi’.

⁴Menombaki’ tamane tama tananan ra’ la ullaoi tau iato mai: maikomi take’de’ tangnga allo! A’a umba nakua, makaroenmo, lando-landonamo tu bayo-bayo makaroen.

⁵Maikomi take’de’ bongi, anta sanggangi tu mintu’ tongkonan layukna.

⁶Belanna susimo kadanNa PUANGna mintu’ ma’dandan maritik: Lellengi tu garonto’ kayu, pabendanni tu ba’tu pira-pira benteng la dinii urrarii Yerusalem; iamote tu tondok naponnoi kabuttokan sia pa’pakario-rio manna lan.

⁷Susi bubun batu umpamadingin bang uai, susi dukato napamadingin bang tu kakadakeanna; kamasa’garan sia pa’pakario-rio manna dirangi lan, balala sia pebamba tontong bang dio pentiroKu.

⁸Eloranni tu kalemu dipa’dikki, e Yerusalem, da Kumessarak dio mai kalemu, da angKu padadiko padang talo sia tondok tang dipa’tondokki.

⁹Iamote tu kadanNa PUANGna mintu’ madandan maritik: Iatu to Israel tinampenapa mupupu susi bua anggoro’; pasulei tu limammu lako tangkena susito ma’pupu.

¹⁰Mindara tu la kupa’kadai sia la kuada’i, kumua anna perangii? Manassa iatu talinganna tau iato mai tang disunna’i. Iamoto natang parangi; iatu kadanNa PUANG susito apa ditatta dio tau iato mai, tae’ napasiolai.

¹¹Nakabu’na’ kare’dekanNa PUANG sia mengkata’ka’na’ untemme’ ara’ku. Barrakanni lako pia dio lu batatta sia lako kasirampunanna pia muane lolle’! Belanna pada-pada la ditingkan muane sola baine, sia to ubanan sola to matua.

¹²Mintu’ banuanna tau iato mai la dipalele lako to senga’ sola mintu’ pa’lakna sia mintu’ bainena, belanna unnangka’Na’ limangKu lako mintu’ pa’tondokan, kadanNa PUANG.

¹³Belanna tau iato mai randuk dio mai to bitti’ sae lako to kapua undaka’ bang saro bu’tu kadake; mintu’nato ma’pakena nasang; la nabi la to minaa.

¹⁴Iatu bangkena taungKu samaraa-raanna nadampi, nakua: Marampa’-marampa’! Apa tae’ tu kamarampasan dio!

¹⁵Dipakasiri’ tu tau iato mai, belanna apa megallian tu napogau’, apa tae’ bangmo natandai tu siri’, ondongpi ma’lindo’ batu bangmo. Iamoto la tipessambak tu tau iato mai dio lu mintu’ to tipessambak; iangKu papakkanni tu tau iato mai, la tisumbang, kadanNa PUANG.

¹⁶Iamote tu kadanNa PUANG: Bendankomi dio lu to’ batatta; tiro meloi sia pekutananni tu lalan dolo, umbanna tu lalan tongan, anna ia mipolalan, anna rapa’ penaammi; apa nakua tu tau iato mai: Manokakan umpolalanni.

¹⁷Sia Kuangka’mo tu ba’tu pira-pira to ungkampaikomi, nakua: Perangii meloi tu oni napiri tanduk! Apa nakua tu tau iato mai: Manokakanni umperangii.

¹⁸Iamoto perangiimi, e mintu’ bangsa, sia la miissan, e kasirampunan tu apa urrampoi tau iato mai.

¹⁹Perangii, e lino, manassa iatu kasanggangan Kuparampoan bangsa iate iamotu buanna mintu’ tangnga’na, belanna tang naperangii tu kadangKu sia natampe tu Sukaran alukKu.

²⁰Iamoto apara gai’na mibanNa’ tu dupa dio mai Syeba sia bangle mellong dio mai tondok mambela? Iatu pemala’ pantunu pu’pu’mi tang nakalo’ penaangKu sia iatu pemala’ pangrere’mi tang Kupopaiman.

²¹Iamoto, kadanNa PUANG, nakua: Manassa la Kupannii ba’tu pira-pira batu katitodoan dio lu lalanna bangsa iate, nanii titodo ambe’ sola tu mai anakna; to sangtondok la pada sanggang sangbanuanna.

²²Iamote tu kadanNa PUANG Nakua: La sae misa’ bangsa lu daa mai ulunna salu, iamotu to sangpetayanan kapua ke’de’ dio mai randan langi’.

²³Tau iato mai untangke pana sia doke; masuang sia tang untandai kamamasean; iatu ongngo’na mariak susi tasik sia ma’darang tu tau iato mai; sia sakka’mo susito la parari, la ullaoiko, e anak dara Sion.

²⁴Iatonta rangi tu karebanna, loe tu limanta; narampoiki’ kapussakan sia kamapa’diran susito misa’ baine la kianak.

²⁵Da mitassu’ dio lu padang sia da misun dio lu lalan, belanna nanii pa’dang uali dio sia kamaramban tiku lao.

²⁶E anak dara taungKu, ma’dodo karungko sia umpentombangko au. Ma’pote dibolongko susito kamatean anak misa’, sia mario-rioko umbating; belanna ta’pa nalaoiki’ to ma’kasanggang.

²⁷Kupadadimoko passudi bulaan dio lu mintu’ taungKu, mendadi to ma’paressa, ammu tandai sia umparessai tu lalanna.

²⁸Pabali-bali tongan tu mintu’ tau iato, tu tontong bang ma’palele beko; susi bangmo tambaga sia bassi, sangbulitukan nasangmo.

²⁹Iatu sauan merambu bang, apa tima manna tassu’ lan mai to’ api; tae’ bang gai’na tontong dipakombong tang ma’din disarakki tu to kadake.

³⁰Nasangaimi tau salaka ditibean, belanna Natibemo PUANG tu tau iato mai.