Read Toraja-Sa'dan YEREMIA 9 Bible Online

YEREMIA 9 - Toraja-Sa'dan bible

YEREMIA 9

¹A’a, kenna la uai tu ulungku sia matangku susito kalimbuang, angku tangi’i ke allo ke bongi tu mintu’ to dipongko dio lu anakna baine bangsaku.

²A’a kenna dennora kuissan tu misa’ pa’bongian dio lu padang pangallaran manassa kutampe te bangsaku sia umpatoyangna’ kaleku dio mai, belanna to ma’gau’ sala nasang tu tau iato mai sia sangtuntunan to tang maruru’.

³Ma’neko-neko tu lilana susi pana digi’tingan ponno buttok sia tae’ namalambu’ ma’parenta lan lu tondok sia tae’ upu’na umpasisonda kakadakean napogau’, sia tae’ natandaiNa’ tu tau iato mai, kadanNa PUANG.

⁴Pada kanandaikomi kalemi dio mai solami sia da mirannuan moi misa’ siulu’ belanna iatu mintu’ siulu’ pa’pakenan sia lu lako lu dio mai ma’palele beko.

⁵Iatu tau iato mai pada umpakena solana sia tae’ nama’kada tongan; napopa’biasa tu lilana ma’kada tang tongan sia urruttakki kalena umpogau’ kakelokan.

⁶Indete tu nanii sitoppo’-toppo’ pa’pakario-rio sia sitombon-tombon pa’pakena; tae’ namorai tu tau iato mai untandaiNa’, kadanNa PUANG.

⁷Iamoto, nakua kadanNa PUANGna mintu’ ma’dandan maritik: Manassa la Kupakombong sia la Kusudi tu tau iato mai, belanna apapa tu la Kupogau’ diona anakna baine taungKu?

⁸Iatu lilana tau iato mai susito tinaran papatean, tu ma’kada tang tongan; iatu pudukna pada ma’kada marampa’ sola tu mai solana, apa lan penaanna natananan poya.

⁹Ma’apai angKu tang la unnukungi tu tau iato mai diona tu apa iate, kadanNa PUANG, ba’tu ma’apai angKu tang la umpabala’i tu bangsa susite?

¹⁰Diona tu mintu’ buntu angKu tumangi’ sia untannun bating sia diona tu lili’na padang alla’ angKu sumarro, belanna talomo sia tae’mo misa’ tau unnolai sia tae’mo oni ma’dandan patuoan dirangi dio; la mintu’ manuk-manuk dao lu langi’ la mintu’ olo’-olo’, mallai nasangmo, pa’de pallan.

¹¹Iatu Yerusalem la Kupadaun launan, napopembunianni serigala sia iatu mintu’ kota Yehuda la Kupopempadang lo’bang, na moi misa’ tau tae’mo untorroi.

¹²Mindara tu paissan la untandai te apa iate? Mindara tu mangka Nanii PUANG ma’kada, naurungan ma’din umpa’peissananni, kumua apa bannangna anna sanggang te padang iate sia talo susi padang pangallaran to moi misa’ tau tae’mo unnolai?

¹³Nakua kadanNa PUANG: Belanna naboko’i tau iato mai tu Sukaran alukKu tu Kupadio tingayona sia tae’ naperangii tu gamarangKu sia tae’ napasiolananni tu kedona,

¹⁴sangadinna unturu’ kamakarrasan penaanna sia umpengkaolai Baal, susitu naadaranni nene’ to dolona.

¹⁵Iamoto nakua kadanNa PUANGna mintu’ ma’dandan maritik, Kapenombanna to Israel, kumua: Tonganna la Kupakande apsantin[1] sia la Kupairu’ rasun tu tau iato mai.

¹⁶Sia la Kupasisarak-sarak tu tau iato mai dio lu mintu’ bangsa, tu tae’ natandai sia tae’ natandai nene’ to dolona sia la Kupaula’i pa’dang, sapuranna Kusabu’i.

¹⁷Inde sia tu kadanNa PUANGna mintu’ ma’dandan maritik, nakua: Kilalai sia tambai tu baine umbating sia pesuanni tu baine malute anna sae,

¹⁸anna madoi’ umbarrakangki’ tu misa’ bating, naurunganni sitanutuan sia lolong tu uai matanta.

¹⁹Belanna dirangi lan mai Sion tu bating iate nakua: A’a, sanggangmokanni! Natoding tonganmokan siri’, belanna diparukumokan untampe tondokki sia dipongkamo tu mintu’ banuangki.

²⁰Iamoto, e kamu mintu’ baine, perangiimi tu kadanNa PUANG, la mitanding talinga tu kada sun dio pudukNa; ada’i tu mintu’ anakna baine umbating sia siadarangkomi ma’rio-rio:

²¹Iatu mammaran mata menteka’mo tama pentiroangki, sia tarru’mo tama tongkonan layukki, sia ummangsanni pia dio lu lalan, sia to mangura dio lu padang;

²²— nakua kadanNa PUANG: Ma’kadako — iamo napourung to na iatu batang rabukna tau situlambenan, susi pangangku’ dio lu padang sia susi gandung dika’pan tobang dio boko’na to ungka’ta’i, namoi misa tau tae’ urrampunni.

²³Inde sia tu kadanNa PUANG: Iatu to maluangan ba’tengna, da nasattuanni tu kamaluanganna sia iatu to matoto’ da nasattuanni tu kamatotoranna sia iatu to sugi’ da nasattuanni tu kasugiranna,

²⁴apa iatu to la morai massattuan, melo ke massattuanni, belanna paissan sia natandaiNa’, kumua Akumo tu PUANG, tu umpalalo kamasokanan sia kamalamburan sia kamaloloan dao kuli’na padang; belanna naala penaangKu tu to massattuan susito, kadanNa PUANG.

²⁵Tonganna la sae tu allo, kadanNa PUANG, ke Kuukungi tu mintu’ to disunna’i, apa butungpa to tang disunna’i;

²⁶iamotu Mesir sia Yehuda sia Edom sia to Amon sia Moab sia mintu’ tu to disoppo kurin, tu torro lan lu padang pangallaran, belanna mintu’ tu bangsa iato tae’ nadisunna’i, apa mintu’ bati’na to Israel iamotu tang disunna’i penaanna.