Read Toraja-Sa'dan BATING 1 Bible Online

BATING 1 - Toraja-Sa'dan bible

BATING 1

¹A’a, lendu’ ia makarorrongna, te kota marua’ pirangbongi’; sangtintimo misa’ baine balu, tu kuasa dio lu mintu’ bangsa; datu baine dio lu mintu’ lembang, anna mengkanorong dipopa’diama.

²Unnade-ade tumangi’ situ’turan bongi, sia umpendau’ uai matanna, moi misa’ tau tae’ bang umpakatanai, dio lu tu mintu’ muane ungkamali’i; iatu mintu’ sangmanena tang maruru’mo lako kalena, anna mendadi ualinna.

³Iatu Yehuda lo’bangmo napobua’ kamandasan, sia napobua’ pa’diaman magasa; torro dio lu mintu’ bangsa, apa tae’ naappa’ karapasan; iatu mintu’ to unnula’i unnappa’i, lan lu kapussakan.

⁴Iatu mintu’ lalan lako Sion madu’sen, belanna tae’ tau sae umpakaraya pa’gauran; iatu mintu’ babanganna makarorrong, mintu’ to minaanna sisumarroan, mintu’ anak dara dio dosso inaa, sia ia kalena mapa’di’ penaanna.

⁵Mintu’ to umbalii ussau’i, iatu ualinna paiman, belanna PUANG umparampoi kamasussan, natumang sala budanna; iatu mintu’ pia’-pia’na inang la male dipali’, nadolo lumingka naturu’ to umbalii.

⁶Iatu mintu’ kamala’biran, sisayurammo anak dara Sion; iatu mai arungna sangtinti to donga tang unnappa’ padang kariuan, tau iato mai langga’ lumingka, dio tingayona to unnula’i.

⁷Lan allo kamaparrisanna sia kalumioranna, iatu Yerusalem tontong ungkilalai, tu mintu’ apa keangga’, tu mangka naampui lan allo lendu’mo; iatonna tobangmo tu bangsana tama limanna ualinna, sia tae’mo to patunduanna, natiromi ualinna, sia napetaai, belanna kasangganganna.

⁸Lendu’ tongan kapuana tu kasalanna Yerusalem; iamoto naboko’i tau susito misa’ tau maruttak; iatu mintu’ to umpangke’i, untattami, belanna natiromo tu kama’kambelanganna; ia kalena duka sumarro sia memboko’.

⁹Iatu kamaruttakanna le’ke’ lako biring dodona; tae’ natangnga’-tangnga’i tu katampakanna, anna tobang rokko posi’ tana lambe’, na moi misa’ tau tae’mo umpakatanai. Tiroi, o PUANG, tu kamaparrisangku, belanna matampo tu ualingku!

¹⁰Iatu mai uali umpopengkorongmo limanna lako mintu’ apa keangga’na; ondongpi natiro bang tau iato mai, kumua iatu bangsa iato tama inan maindanna, tu a’ganna mangka Mipa’pepasanan, kumua: iatu tau iato mai tae’ nama’din urreke’komi tama kombongan.

¹¹Mintu’ pa’tondokanna sisumarroan undaka’ roti; iatu mintu’ apa keangga’na napasituka’ kande, la natoean sunga’na. — Tiromi, o PUANG, sia pemarangai, umba nakua tu kaditunaiangku!

¹²Tae’raka, misa’dingi, e kamu mintu’ to lendu’? Pemarangai sia tiroi, ke la denni misa’ pa’di’ susi pa’di’, tu diparampoanna’, tu urruana’ tonNa parampoina’ PUANG kamandasan, tonna allo kare’dekanna ara’Na.

¹³Napasaemi tu api dao mai madaona; Napasonglo’mo sae tama bukungku; Natananni porro’ tu lentekku sia Naturrunna’ lako boko’; Napatorro to pussakmo’, mandasa situ’turan allo.

¹⁴Iatu ayoka kakadakeangku magasa, tu Napasikande-kande limanNa Puang: Iatu apa iato unti’tin sokkongku, tu umpamoro’ kamatotorangku; Nasorongmo’ Puang tama lisu pala’na, to tang kusau’ unneai.

¹⁵Napembuangammo Puang tu mintu’ to mawatangku lan tangngaku; umpogau’mo misa’ pa’maruasan untambai tau la unneana’ sia la ussanggangi mintu’ pia muane malolle’ku; Nalullu’mo Puang lan pa’parran anggoro’ tu mai anak dara, iamotu baine anakna Yehuda.

¹⁶Iamoto angku tumangi’ bang, iatu matangku, iatu matangku sitanutuan tu uainna, belanna sikambelana’ to ma’pakatana, tu umpapaya deatangku; iatu mai anakku muane pussakmo, belanna mawatang tu uali!

¹⁷Umballa’mo limanna tu Sion, apa moi misa’ tau tae’ umpakatanai; Natambaimi PUANG la unnea Yakub tu mai sanglembangna Yakub butung to pabali-bali. Iatu Yerusalem dadimo butung misa’ to maruttak lan lu tangngana tau iato mai.

¹⁸Iatu PUANG malambu’, belanna pabali-balimo’ unnea kadanNa. Perangii, e mintu’ bangsa, sia tiroi tu kamapa’dirangku, mintu’ tu baine malolle’ dio kaleku sia pia muane malolle’ku male nasangmo dipali’.

¹⁹Metambana’ lako mintu’ muane ungkamali’na’, apa napopa’elo’nana’ sia napakenana’. Mintu’ to minaangku sia pekaamberangku ka’tumo sunga’na lan kota, tonna undakaran kande kalena, la natoean sunga’na.

²⁰Tiroi, o PUANG, tu kapussakangku; iatu ba’tengku naponnoi kamagiangan, sia iatu penaangku tibaliang lan ara’ku, belanna tarru’ pabali-balimo’. Dio lu salian iatu pa’dang ma’patamanang, nalan lu banua den ropu.

²¹Narangimo tau iato mai umba nakua tu sarroku; apa moi misa’ tau tae’ tu umpakatanana’; narangi mintu’ ualingku tu kamandasangku; parannu-rannumo tu tau iato mai, belanna Mipogau’mo tu iannato, belanna Miparampomo tu allo mangka Mipa’peissanan — kenna dadiora susi aku tu tau iato mai,

²²kumua anna sae dio oloMi tu mintu’ kakadakeanna tau iato mai! Pogau’i lako tau iato mai, susitu mangka Mipogau’ lako kaleku natumang mintu’ salaku, belanna lendu’ ia budanna sarroku, sia masaki ara’na’.