Read Toraja-Sa'dan BATING 3 Bible Online

BATING 3 - Toraja-Sa'dan bible

BATING 3

¹Iatu aku te umperasaimo’ kamandasan napobua’ pebamba kare’dekan ara’Na.

²Nasolammo’ sia Napopa’lingkamo’ lan malillinna sia lan kapittukanna.

³Tonganna ba’tu pempiran-piranna’ Napata’pai limanNa, tu’tu’ allo.

⁴Napamarangkemo tu kaleku sia Napatingkurrungmo tu kuli’ku, Tappumo Narebong tu bukungku.

⁵Napalilingina’ rasun sia kamaparrisan ma’toppo’-toppo’.

⁶Napanno’ko’na’ lan to’ malillinna susito mate masai allomo.

⁷Naampangi tikumo’, angku tang kullei tassu’, Narantemo’ tambaga magasa.

⁸Moi angku metamba-tamba umpalaku pa’tunduan, Tang Nasaile tu passambayangku.

⁹Mintu’ batatta la kuola Napalapa’imo batu dipa’, mintu’ lalanku Natuan-tuanmo.

¹⁰Iamo butung misa’ beruang mangamu’ lako kaleku, butung misa’ singa dio to’ kabunianna.

¹¹Natutu’ bang tu lalanku sia Nadammakna’, Napapussakna’.

¹²Nabintingmo tu panaNa, Napopassanda tu tinaranNa lako kaleku.

¹³Napatarru’ina’ tinaran lan mai inan tinaranNa Landa’ tama bale’ke’ku.

¹⁴Bupetaamo’ lako mintu’ bangsaku sia napoparumbasan tu’tu’ allo.

¹⁵Napedia’imo’ kamapassikan sia Napairu’mo’ apsantin. [1]

¹⁶Nasuana’ ungkaru’tukki karangan anna tappu simpo tu isingku, anNa ti’tinna’ rokko to’ barra’-barra’.

¹⁷Mipasisayurammo kasalamaran tu deatangku, tang kuissanmo tu kamauparan.

¹⁸Iamoto angku ma’tangnga’ kukua: ta’demo tu kamatotorangku, sia pa’rannuanangku langngan PUANG.

¹⁹Kilalai dikka’ tu kamaparrisangku sia salamba salaoku, sia iatu mai apsantin sia rasun.

²⁰Iake nakilalai deatangku te iannate, tukku bangna’ ma’dosso-dosso.

²¹Inde sia tu la kupalan penaa, iamoto angku ma’rannuan:

²²Belanna mintu’ tanda pa’kamaseNa PUANG, anna tae’ tasanggang, belanna iatu mai kamamaseanNa tae’ upu’na.

²³Iake melambi’oi ba’ruoi, sia kapua kamarurusamMi.

²⁴Nakua penaangku: PUANGmo tu ba’gi mana’ku, iamoto anna Ia kurannuan.

²⁵Masokan tu PUANG lako tu umpeagii, sia lako tu penaa umpeangI.

²⁶Melo ke rapa’ penaai tu tau umpeagi kamakarimmananNa PUANG;

²⁷Melo tu mai muane, ke mangurapi, anna passan ayoka.

²⁸Sipatu unno’ko’ misa-misa sia ma’pakappa bang, ke Napapassannimi Puang.

²⁹Sipatu tukku bang sae rokko to’ barra’-barra’, umbai den sia kapa’rannuanan.

³⁰Sipatu napopa’elo’na tu popona lako minda-minda ussala’pai, da’ito napedia’i kadilo’boan.

³¹Belanna tae’ Natontong sae lakona patumpu tu Puang.

³²Belanna iake mangkaMi meparosso, mekamaseioMi sitinaya kakapuanna kamaturu-turuanNa.

³³Belanna tangia lalan penaanNa Napandasai sia Naparossoi tu mai ma’rupa tau.

³⁴Iake nalullu’-lullu’i tau tu mintu’ to ditarungku dao kuli’na padang.

³⁵Iake naleko’i tau tu katongananna misa’ muane dio oloNa Patodoranna.

³⁶Iake natampun pusa’i tau tu solana lan kara-karana, tang Natiroraka Puang tu iannato?

³⁷Mindara tu ma’kada manna nakombongmo? Ke tae’i anNa Puang umpasanni?

³⁸Tang tassu’ dioraka mai pudukNa Patodoranna tu kadake sia melo?

³⁹Ma’apai nasumarro tu tolino lan katuoanna? Melo ke pantan sumarroi diona kasalanna.

⁴⁰Melo ke umparessaki’ sia umpelalanki’ mintu’ tengkata, anta mengkatoba’ lako PUANG.

⁴¹Melo ke umballa’ki’ pala’ta sia ara’ta langngan Puang Matua dao suruga.

⁴²Salamokan sia pabali-balimokan, apa tae’ Mima’pagarri’.

⁴³Mipembungku’mo tu kasengkean, sia Milolaimokanni, sia tang makatirinnamoKomi umpateikan.

⁴⁴Mipembungku’mo tu salebu’, naurungan iatu passambayang tae’ tarru’ lako Kalemi.

⁴⁵Mipasusimokan passarrinan rumpang dio lu mintu’ bangsa.

⁴⁶Napengangaimokan sadangna mintu’ ualingki.

⁴⁷Katirambanan sia pepoya urrampoimokan, kamasolangan sia kasanggangan.

⁴⁸Lolong-lolong tu uai matangku susitu uai salossok, natumang kasangganganna anak dara bangsaku.

⁴⁹Iatu uai matangku tang tore sitana’takan, sia tang radan len,

⁵⁰sae lako mentiro lumbang tu PUANG, sia ma’penunu dao mai suruga.

⁵¹Kambang bangmo tu matangku tumangi’ napobua’ tu mintu’ anak dara lan kotaku.

⁵²Naula’ sumpu tonganmo’ susi misa’ manuk-manuk tu mai to tae’ bannangna nanii unnula’na’.

⁵³Nasabu’ina’ rokko garuang sia natumbuina’ batu.

⁵⁴Natu’ba’mo’ uai sia nakabu’ tu ulungku; Kuma’tangnga’ kukua: la ka’tumo sunga’ku.

⁵⁵Meongli’na’ ussa’bu’ sangamMi, o PUANG diong mai garuang mandalan.

⁵⁶Mitananni talinga tu peongli’ku, da Misissinganni talinga tu sarroku sia pengkamoyaku.

⁵⁷Mareke’Komi, ke meongli’na’ lako Kalemi, Ma’kadaKomi kumua: Da mumataku’.

⁵⁸Kamu, o Puang umpebalii tu kara-karaku, Mirampanan mana’pa tu sunga’ku.

⁵⁹Mitiro, o PUANG, ditampun pusa’ bang tu kara-karaku, sanda tonganni tu kara-karaku.

⁶⁰Mitiro tu kamagallianna tau iato mai sia mintu’ tangnga’na la ussanggangna’.

⁶¹Mirangi, o PUANG, tu pelo’bona, sia mintu’ tangnga’na la ussanggangna’,

⁶²tu kadanna minda-minda umbalina’ sia pa’bisik-bisikna, la ungkadakeina’ tu’tu’ allo.

⁶³Tiroi tu torro ke’de’na tau iato mai: Napadadina’ parumbasan.

⁶⁴La Mipapakkanni, o PUANG, sitinaya penggauranna.

⁶⁵La Mibutai penaanna tu tau iato mai; parampoi tampak ropumMi tu tau iato mai!

⁶⁶La Mipaula’i kasengkeamMi sia la Mipisanni tu tau iato mai diong mai nasambo langi’Na PUANG.