Read Toraja-Sa'dan YEHEZKIEL 10 Bible Online

YEHEZKIEL 10 - Toraja-Sa'dan bible

YEHEZKIEL 10

¹Ta’kala kutiromi, tonganna dao batara daona lu ulu karubion, den misa’ apa susi parimata lasuri’, susi rupa isungan kapayungan, tu paan daona lu.

²Ma’kadami tu Puang lako tu to ma’bayu lamba’ lenang, Nakua: Maleko tama alla’na tu mai lentenan diong to’ karubion, muraku’i tu ruaya lan mai alla’ karubion, ammu ambo’i tu to lan lu kota. Malemi inde to lako kutiro.

³Bendanmi tu karubion dio to’ sa’de kanan Banua Kabusungan, tonna male tu tau iato; naden misa’ gaun ussitutu’i tu tarampak lanna lu.

⁴Kendekmi tu kamala’biranNa PUANG dao mai karubion iato, anna male lako to’ ampang Banua Kabusungan, na iatu tarampak nasitutu’i arrang kamala’biranNa PUANG.

⁵Iatu ongngo’ pani’ karubion dirangi sae lako tarampak diona lu salian, susi gamaranNa Puang Matua, To umpoissan angge maritik, ke ma’kadaI.

⁶IatonNa mangkamo ussuai tu to ma’bayu lamba’ lenang nakua: Alai tu api lan mai alla’lenteran, lamotu lan mai alla’ karubion, namale bendan dio sa’dena misa’ roda.

⁷Unnangka’mi limanna tu misa’ karubion lan mai alla’ karubion lako to’ api lan kasiallaran karubion, anna alai tu ruaya anna parokkoi limanna to ma’bayu lenang; naalami tau iato namale.

⁸Payanmi dio lu tu mai karubion iato tu susi lima to lino diongna lu pani’na.

⁹Kutiromo den a’pa’ lentenan dio sa’de karubion iato mai, dio sa’dena simisa’misa’ karubion den misa’ lentenan. Iake ditiroi tu lentenan iato pandillak susi parimata pirusa’.

¹⁰Iatu tiroanna: sangrupari sola a’pa’i, takua to den misa’ lentenan lan tangnga lentenan.

¹¹Iake malei ma’din umpempatui a’pa’ patunna sola nasang; tae’ namenggirik len, ke malei. Umba-umba tu napatu tu dolona lako, ia bangsiamo naturu’ tu solana to, tae’ namenggirik len, ke malei.

¹²Na diona mintu’ kalena, iamotu dio boko’na, limanna sia pani’na, dio lentenan nasitutu’i mata tiku lao; napantan den lentenanna sola a’pa’i.

¹³Iatu mintu’ lentenan iato disangai Melolin, dio pa’perangingku.

¹⁴Na iatu mai karubion iato sia’pa’ tu lindona. Iatu bunga’na lindo karubion, iatu ma’penduanna lindo tolino, iatu ma’ pentallunna lindo singa, iatu ma’penna’pa’na lindo langkan maega.

¹⁵Kendekmi tu karubion iato mai, iatu iannato susi bang a’gan mangka kutiro dio salu Kebar.

¹⁶Ianna male tu karubion, tigirik nasangmi tu lentenan dio sa’dena; sia ianna umballa’ pani’na tu mai karubion la kendek diong mai lino, tae’ natilendok tu lentenan dio mai sa’dena.

¹⁷Ianna bendan tu karubion, bendan duka tu lentenan, ianna kendek tu karubion, kendek duka tu lentenan, belanna iatu penaanna a’gan iato lanna lu lentenan.

¹⁸Malemi tu kamala’biranNa PUANG dao mai ampang Banua Kabusungan anna sae bendan dao karubion.

¹⁹Umballa’mi pani’na tu karubion, sia iatonna male, kendekmi diong mai padang dio pentiroku, na iatu lentenan kendek sola. Anna torro dio lalan tama babangan matallo dio banuanNa PUANG, na iatu kamala’biranNa Kapenombanna Israel daona lu.

²⁰Iamote tu a’gan kutiro diongna lu Kapenombanna Israel dio salu Kebar; totemo mane kutandairi, kumua karubion pale’ ia.

²¹Pantanni lindo sia’pa’ sia pantanni pani’ sia’pa’ sia den tu apa susi lima tolino diongna lu pani’na.

²²Na iatu pantarisan lindona, susi bang to lindo mangka kutiro dio salu Kebar; iatu rupanna ia bangsiamo rupanna. Iatu apa iato pantan male ma’palulako bang tingayona.