Read Toraja-Sa'dan YEHEZKIEL 12 Bible Online

YEHEZKIEL 12 - Toraja-Sa'dan bible

YEHEZKIEL 12

¹Rampomi tu kadanNa PUANG lako kaleku Nakua:

²E ma’rupa tau, torroko dio lu misa’ bati’ pabali-bali, iamotu bati’ kemata la patiro, apa tae’ napatiro, ketalinga la parangi, apa tae’ naparangi, belanna tau iato mai misa’ bati’ pabali-bali.

³Na iko, e ma’rupa tau, pasakka’i tu mintu’ apa parallu dio pa’paliran, sia la maleko butung to dipali’ ke allona dio pentirona tau iato mai; manassako la ke’de’ dio mai inanmu lako misa’ inan senga’ dio pentirona tau iato mai. Umbai la napalan penaa sia tau iato mai, belanna misa’i bati’ pabali-bali.

⁴Baai sun tu apa parallu lako kalemu butung misa’ pa’bungku’ to dipali’ ke allona dio pentirona tau iato mai, na iatu iko la sunko ke bonginnai butung to dipali’ dio pentirona tau iato mai.

⁵Lo’po’i tu rinding tembo’ dio pentirona tau iato mai, ammu olai sun lako salian.

⁶Iatu pa’bungku’mu la mupassan dao palempengmu dio pentirona tau iato mai; iake mapi’tukmi la mubaamo; ammu putu’i tu lindomu, naurunganni tae’ mutiroi tu padang. Belanna la Kupadadiko misa’ rapang-rapang lako to Israel.

⁷Kupogau’mi susitu Napa’parentan lako kaleku: iatu apa parallu lako kaleku kubaa lako salian butung to pa’bungku’na misa’ to dipali’ sia iatonna bongi kulo’po’mi limangku tu rinding tembo’; iatonna mapi’tukmo kubaami; kupadaomi palempengku dio pentirona.

⁸Iatonna melambi’mo rampomi tu kadanNa PUANG lako kaleku Nakua:

⁹E ma’rupa tau, iatu to Israel, iamotu bati’ pabali-bali, tae’raka ungkutanaiko kumua: Apara tu mipogau’?

¹⁰Ma’kadako lako tau iato mai mukua: Inde sia tu kadanNa Puangta PUANG: Iatu datu lan Yerusalem narua te kada Napa’petanggungan Puang Matua iate sia mintu’ to Israel tu torro inde to dio.

¹¹Ma’kadako kumua: Akumote tu misa’ rapang-rapang lako kalemi; susitu mangkanna kupogau’ susi dukato la digauran tau iato mai: iamotu la male dipali’ sia la ditarungku.

¹²Iatu datu dio lu tau iato mai la ussompo pa’bungku’na dao palempengna ke mapi’tukmi anna male lako salian; la nalo’po’ tau tu rinding tembo’, kumua anna olai tassu’; la naputu’ tu lindona, belanna tae’mo na la untiro pole’i matanna te padang iate.

¹³La Kupae’te’i pukaKu sia la naala poyaKu; la Kusolan lako Babel, tondok to Kasdim, apa tae’ nala untiroi; sia inde to dio la nanii mate.

¹⁴Mintu’ baananna, iamotu to untundui sia mintu’ surodadu la Kupatitale’ lako mintu’ mata angin, sia la Kunonok tu pa’dang dio boko’na.

¹⁵Anna tandai tau iato mai, kumua Akumo tu PUANG, ke Kupatitale’mi dio lu mintu’ bangsa sia Kuambo’ lan lu mintu’ tondok.

¹⁶Apa dio mai tau iato mai tae’mora napira la Kupatilendokpa dio mai kandean pa’dang, karorian na ra’ba biang, kumua anna tuna’i tau iato mai tu mintu’ penggauran megallianna dio lu mintu’ bangsa tu nanii rampo lako; anna tandai bangsa iato kumua Akumo tu PUANG.

¹⁷Rampomi tu kadanNa PUANG lako kaleku Nakua:

¹⁸E ma’rupa tau, la ma’parondoko ungkande rotimmu sia la ma’paganggangko sia rosso penaammu unniru’ uaimmu.

¹⁹Sia la ma’kadako lako tau lan tondok, kumua: Inde sia tu kadanNa Puangta PUANG diona pa’tondokan Yerusalem dio lu padang Israel, Nakua: iatu tau iato mai la ungkande rotinna situang karossoan penaanna sia la unniru’ uainna situang kamagianganna — kumua anna iatu tondokna tau iato mai masopu tu mintu’ apa lan sia mempadang lo’bang napobua’ kamasa’garanna mintu’ pa’tondokanna.

²⁰Iatu kota dinii torro la daun lauan sia iatu tondok la mempadang lo’bang, ammi tandai, kumua Akumo tu PUANG.

²¹Rampomi tu kadanNa PUANG lako kaleku Nakua:

²²E ma’rupa tau, pa’parunde apara tu mipoparunde lan tondok Israel, kumua: Lendu’mo tu allo, apa tae’ nalalo tu patiro mendeata.

²³Iamoto ma’kadako lako tau iato mai: Inde sia tu kadanNa Puangta PUANG Nakua: La Kutappui tu pa’parunde iate sia tae’mo nala umpoparundei tau lan Israel, sangadinna ma’kadako lako tau iato mai kumua: Mandappi’mo tu attunna sia iatu kadipalandaranna mintu’ patiro mendeata!

²⁴Belanna la tae’mo tu patiro mendeata balle sia pa’biangan ma’papusa dio lu to Israel.

²⁵Akumo, PUANG, la umpokadai tu kada la Kupokada, sia la dipalanda’; tae’ anna la dipadampa. Belanna lan allomi, e bati’ pabali-bali, la Kupokada tu misa’ kada sia la Kupogau’ duka, kadanNa Puangta PUANG.

²⁶Rampomi tu kadanNa PUANG lako kaleku Nakua:

²⁷E ma’rupa tau, tonganna iatu to Israel ma’kada nakua: Iatu patiro mendeata natiro, umpatu allo masaipa namane sae, sia ma’nubua’ diona attu mambelapa.

²⁸Iamoto ma’kadako lako tau iato mai, kumua: Inde sia tu kadanNa Puangta PUANG: Iatu mintu’na kadangKu, moi sangbuku tae’ nala dipadampa, sangadinna iatu kada la Kupokada la dipalanda’, kadanNa Puangta PUANG.