Read Toraja-Sa'dan YEHEZKIEL 13 Bible Online

YEHEZKIEL 13 - Toraja-Sa'dan bible

YEHEZKIEL 13

¹Rampomi tu kadanNa PUANG lako kaleku Nakua:

²E ma’rupa tau, ma’nubua’ko unneai tu mai nabi to Israel, tu ma’nubua’ ammu ma’kada lako to ma’nubua’ unturu’ tanan penaanna, kumua: Perangii tu kadanNa PUANG.

³Inde sia tu kadanNa Puangta PUANG Nakua: Upu’ allona tu mai nabi baga, tu unturu’ tanan penaanna kalena, moi natae’ apa natiro. —

⁴Susi a’ganna sindallung dio lu to’ banua ro’pok, la susi duka a’ganna mintu’ nabimmi, e to Israel. —

⁵Tae’ milapa’ len kalo’tok dio rinding tembo’, ba’tu umbangun rinding tembo’ untikui to Israel, kumua anna kullei bendan tu tau iato mai lan kasirarian, ke allonai PUANG.

⁶Pa’pakena sia pa’biangan balle tu mai apa natiro, tu ma’kada nakua: Susito tu kadanNa PUANG natae’ anna sua lenni PUANG; moi susito natayan siapa tau iato mai la dipalanda’ tu kada iato!

⁷Tang patiro mendeata pa’pakenaraka tu mangka mitiro sia pa’biangan balle tu mipokada, tommi ma’kada kumua: Susito tu kadanNa PUANG anna inang tae’ Kuma’kada?

⁸Iamoto, inde sia tu kadanNa Puangta PUANG, belanna umpokadakomi pa’pakena sia tang tongan, iamoto manassa la Kuukungkomi, kadanNa Puangta PUANG.

⁹La nata’pai limangKu tu mintu’ nabi untiro patiro mendeata pa’pakena sia umpokada pa’biangan balle; tau iato mai tae’ nala unnalai bilanganna taungKu, tae’ nala disura’ lan sura’na to Israel, sia tae’ nala tama tondok Israel, ammi issanni, kumua Akumo tu Puangta PUANG.

¹⁰Belanna, ondongpi belanna napapusa tu taungKu nakua: Marampa’!, na inang tae’ tu kamarampasan, iake umbangunni misa’ rinding tembo’ nasapu’ kapu’;

¹¹ma’kadako lako to massapu’ kapu’ kumua: manassa la songka. La sae tu uran kamban, na iko, tu uran batu la tibollo, sia angin bara’ la ma’pamumbuk.

¹²Ianna tuanmo tu rinding tembo’, tae’raka nala ungkuangkomi, kumua: Umbamira tu kapu’ mipassapuran?

¹³Iamoto, inde sia tu kadanNa Puangta PUANG Nakua: Inang la Kupopa’pamumbuk tu angin bara’ tete dio kare’dekangKu, sia la sae tu uran kamban tete dio kasengkeangKu, sia uran batu tete dio kare’dekangku, anna sabu’i.

¹⁴Sia la Kurondon tu rinding tembo’ tu misapu’ kapu’, anna songka rokko padang, sia la dipabu’tu tu parandanganna; la songka tu kota, ammi sanggang lan. Ammi tandai kumua Akumo tu PUANG.

¹⁵La Kupaleanni kare’dekangKu tu rinding tembo’ sia mintu’ tu to ussapu’i kapu’, sia la ma’kadaNa’ lako kalemu, Kukua: Tae’mo tu rinding tembo’ sia tae’ dukamo tu to ussapu’i kapu’,

¹⁶iamotu mintu’ nabi Israel, ma’nubua’ lako Yerusalem sia untiroanni misa’ patiro mendeata, tu umpaombo’ kamarampasan, moi anna tae’ bang kamarampasan — , kadanNa Puangta PUANG.

¹⁷Na iko, e ma’rupa tau, tingo lakoko to’ anak dara bangsamu, tu ma’nubua’ unturu’ tanan penaanna; ma’nubua’ko unneai sia ma’kadako, kumua:

¹⁸Inde sia tu kadanNa Puangta PUANG: Upu’ allona tu to umbeke’i pa’beke’ pangissan dio lu mintu’ lengo-lengo sia umpalullungi lullung ulunna to kapua sia to bitti’, la untingkan deatanna tau! La mitingkanraka tu deatanna taungKu, ammi tiroan kalena deatammi!

¹⁹MipamatunaNa’ dio tingayona taungKu kumua ammi appa’ dalle sisikan ba’tu pirang-pirang raku’ sia ba’tu pirang-pirang sasa’ roti, la ungka’tu sunga’na tau, tu tae’ nasipatu la mate sia la ungkarimmanni sunga’na tau, tu tae’ nasipatu la tuo, belanna mimo’rangi tu taungKu, tu morai umperangii mo’rang.

²⁰Iamoto, inde sia tu kadanNa Puangta PUANG, manassa Kutumpu tu beke’ pangissanmi, tu mipake la umpoya deatanna tau susi manuk-manuk, sia la Kusabak dio mai limammi, sia la Kurampanan tu deatanna tau, tu mipoya susi manuk-manuk.

²¹Sia la Kuserek-serek tu mai lullungmi sia la Kurampanan tu taungKu lan mai limammi, anna tae’mo nasusi piala lan limammi, ammi issanni kumua Akumo tu PUANG.

²²Belanna miparossomo tu penaanna to malambu’ tete dio kamo’rangan, moi natae’ Kupamasussai, sia mipamatoto’ tu limanna to tang mekaaluk, kumua da natibalik dio mai lalan kadakena, anna tuo.

²³Iamoto tae’mo mila untiro patiro mendeata pa’pakena sia tae’mo mila ma’biangi; la Kurampanan tu taungKu lan mai limammi, ammi tandai kumua Akumo tu PUANG.