Read Toraja-Sa'dan YEHEZKIEL 14 Bible Online

YEHEZKIEL 14 - Toraja-Sa'dan bible

YEHEZKIEL 14

¹Iatonna sae lako kaleku tu ba’tu pira-pira pekaamberan to Israel, anna unno’ko’ dio tingayoku,

²saemi kadanNa PUANG lako kaleku Nakua:

³E ma’rupa tau, iate tau iate mai napalanpa penaanna tu rapang-rapang dipodeata sia napatulangdan sipatu lindona tu katitodoan sae lako tobang rokko kakadakean; ma’dinparaka la Kueloran tu tau iato mai sae mekutana lako Kaleku?

⁴Iamoto ma’kadako sia pokadai lako tau iato mai kumua: Inde sia tu kadanNa Puangta PUANG, Nakua: Minda-minda tu to Israel tu umpalan penaanna rapang-rapang dipodeata sia umpatulangdanni sipatu lindona tu katitodoan sae lako tobang rokko kakadakean, sia sae umpessitammui nabi Akumo, PUANG, tu la umpebalii, ke saei, sitinaya kabudanna rapang-rapang dipodeatanna;

⁵angKu patiakka’i tu penaanna to Israel, tu umboko’iMo’ sola nasangi sola mintu’ rapang-rapang dipodeatana.

⁶Iamoto pokadanni to Israel, kumua: Inde sia tu kadanNa Puangta PUANG Nakua: Mengkatoba’komi sia tibalikkomi dio mai mintu’ rapang-rapang dipodeatammi sia toyangkomi dio mai tu mintu’ apa megalliammi.

⁷Belanna minda-minda tu mai to Israel ba’tu to salian lembang, tu mempue dio to Israel, tu umboko’iNa’ sia umpalan penaanna rapang-rapang dipodeatanna sia umpatulangdanni sipatu lindona tu katitodoan sae lako tobang rokko kakadakean, sia sae umpessitammui nabi la mekutana lako Kaleku nalopian nabi — Akumo, PUANG, tu la umbalii.

⁸Sia la Kupatampa’i lindoKu tu tau iato sia la Kupadadi misa’ tanda sia misa’ parumbasan sia la Kusabu’i lan mai tangngana taungKu, ammi tandai, kumua Akumo tu PUANG.

⁹Iake denni misa’ nabi dipetobagai la umpokada kada, Kupetobagai tu nabi iato sia la Kue’te tu limangku la unneai sia la Kuurakki lan mai tangngana taungKu, Israel.

¹⁰Anna pada untanggung kakadakeanna — pada kakadakeanna nabi tu kakadakeanna to mekutana — ,

¹¹kumua damo namemboko’ tu to Israel dio mai Kaleku, sia damo naruttakki kalena untengkai atorangKu. Iake susito iatu tau iato mai la dadi taungKu na Aku la dadi Kapenombanna, kadanNa Puangta PUANG.

¹²Rampomi tu kadanNa PUANG lako kaleku Nakua:

¹³E ma’rupa tau, iake morongannai naden misa’ tondok kasalan lako Kaleku tete dio katangmarurusanna, sia iake la Kupata’pai lima, sia iake la Kuparoto’i tu roti la napopamuntu sia iake Kuparampoi karorian sia iake la Kusabu’i lan mai tu tolino sia olo’-olo’,

¹⁴sia iake denni dio te tau tallu, iamotu Nuh, Daniel na Ayub, manassa kalena manna tu ma’din narampanan tete dio kamaloloanna, kadanNa Puangta PUANG.

¹⁵Iake moronganna Kupatamai olo’-olo’ masuru tu tondok, anna purai tu mai pia lan, naurunganni dadi misa’ padang lo’bang, anna moi misa’ tau tae’ lendu’ inde to dio mai belanna mataku’ lako olo’-olo’ masuru,

¹⁶sia iake denni lan tu tau tallu, la lelukraka tuoKu, kadanNa Puangta PUANG, manassa inang tae’ nala urrampananni tu anakna muane sia baine. Iamanna tu kalena tu la dirampanan, apa iatu tondok iato la mempadang lo’bang.

¹⁷Ba’tu iake moronganna Kuparampoi pa’dang tu tondok, angKu ma’kada kumua: E pa’dang pasilamban-lambanni tu tondok, sia iake Kusabu’i lan mai tu tolino sia olo’-olo’,

¹⁸sia iake denni lan tu tau tallu la lelukraka tuoKu, kadanNa Puangta PUANG, manassa inang tae’ nala urrampananni tu anakna muane sia baine, ia manna tu kalena tu la dirampanan.

¹⁹Ba’tu iake moronganna Kupatamai ra’ba biang tu tondok sia Kuparampoi kare’dekangKu situang to’doan rara, la ussabu’i tolino sia olo’-olo’ lan mai,

²⁰sia iake denni lan tu Nuh, Daniel na Ayub, la lekukraka tuoKu, kadanNa Puangta PUANG, manassa inang tae’ nala urrampananni tu anakna muane sia baine. Manassa kalena manna tu ma’din narampanan tete dio kamaloloanna.

²¹Apa inde sia tu kadanNa Puangta PUANG Nakua: Moi angKu patamai Yerusalem te a’pa ukungan masarrang, iamotu pa’dang, karorian, olo’-olo’ masuru na ra’ba biang la ussabu’i tolino sia olo’-olo’ lan mai,

²²inang la denpa torro lan tu ba’tu pira-pira to tilendok, tu la disolan sun, la pia muane la pia baine; manassa la tassu’ sae lako kalemi, ammi tiroi tu penggauranna sia kedona, ammi dipakatana diona kamandasan tu Kuparampo lako Yerusalem, iamotu mintu’ apa mangka Kuparampo lako.

²³Tonganna, iatu tau iato mai la umpakatanakomi, ke mitiroi tu penggauranna sia kedona. Sia la mitandai kumua tae’ Kupogau’ punala bangi tu mintu’ apa mangka Kupogau’, kadanNa Puangta PUANG.