Read Toraja-Sa'dan YEHEZKIEL 15 Bible Online

YEHEZKIEL 15 - Toraja-Sa'dan bible

YEHEZKIEL 15

¹Rampomi tu kadanNa PUANG lako kaleku Nakua:

²E ma’rupa tau, apara napolosong tu kayu garonto’ anggoro’ na iatu mintu’ kayu mentangke dio lu mintu’ kayu lan lu pangala’?

³Ma’dinraka diala tu kayunna la digaraga parea, ba’tu ma’dinraka la dipotangki’, dinii ussedan apa-apa.

⁴Tiromi, dipakandei api; pu’pu’mo tu tampakna patomali napurai api, sia iatu tangngana mampu’mo, ma’dinparaka digaragai parea?

⁵Moi iatonna kalebupa, tae’ apa ma’din digaragai, ondong pole’pi, ke mangkami nakande api sia mampu’; ma’dinparaka digaragai misa’ parea?

⁶Iamoto, inde sia tu kadanNa Puangta PUANG, kumua: Susi Aku mangka umpakandei api tu kayu garonto’ anggoro’ tu dio lu mintu’ kayu pangala’, la susi dukaNa’ to ussorongi tu to lan Yerusalem.

⁷La Kupatampa’i lindoKu tu tau iato mai la unnukungi; moi anna tassu’ lan mai to’ api misa’, manassa la nakandeo api misa’. Ammi tandai, kumua Akumo tu PUANG, ke Kupatampa’i lindoKu tu tau iato mai la unnukungi.

⁸Na iatu tondok iato la Kupopempadang lo’bang, belanna membalimo tang maruru’ tu tau iato mai, kadanNa Puangta PUANG.