Read Toraja-Sa'dan YEHEZKIEL 16 Bible Online

YEHEZKIEL 16 - Toraja-Sa'dan bible

YEHEZKIEL 16

¹Rampomi tu kadanNa PUANG lako kaleku Nakua:

²E ma’rupa tau, paissanni Yerusalem tu mintu’ penggauran megallianna,

³sia ma’kadako mukua: Inde sia tu kadanNa Puangta PUANG lako Yerusalem Nakua: Iatu munii bu’tu sia kadadiammu lu dio mai tondok to Kanaan, iatu ambe’mu to Amori na iatu indo’mu to Heti.

⁴Iatu kadadiammu susite: iatommu dadi tae’ nadira’ta’i tu lolomu sia tae’ mudidio’ la umpemaseroiko; tae’ duka mudisussui sia, tae’ mudiammu’i sampin.

⁵Tae’ misa’ tau mamase penaanna untiroko, anna pogau’i lako kalemu tu apa iato misa’, belanna ungkaturu-turuiko, sangadinna ditibeko dio lu padang, belanna tae’ bang tau umpokarianganni tu sunga’mu, tommu dadi.

⁶Attu iato lendu’Mo’ dio to’ muninna, angKu tiroko metteba’-teba’ dio to’ rara katibussanammu sia Kukuangko tommu sitombang rara: Tuoko; tonganna Kukuangko tommu sitombang rara: Tuoko.

⁷Kupamaloborangko susi riu dio lu padang, ammu lobo’ sakapua-puana sae lako dadi anak dara ballo; kapuamo tu susummu sia lobo’mo tu bulummu; apa ma’kambelangpoko sia ma’kale-kale.

⁸Attu iato lendu’Mo’ dio to’ muninna, angKu tiroko, tonganna matona’moko; Kuballa’mi tu biring bayu lamba’Ku dio kalemu, angKu samboi tu kama’kambelangammu, sia umpalaoNa’ sumpa ussibasseangko, kadanNa Puangta PUANG; nasusito dadimoko taungKu.

⁹Kudio’moko uai sia Kubasei tu raramu sia Kusussuiko minna’ busarungngu’.

¹⁰Sia Kupapakeiko tamangkale dibunga-bungai, Kulapikki kuli’ masuli’ tu lette’mu, sia Kulullungi lenang melo tu ulummu sia Kupaluangi sa’be.

¹¹Sia Kubeloiko belo sanda rupanna, sia Kupaluangi komba tu limammu sia manikata tu barokomu.

¹²Sia Kupalakoi baba’ tu illongmu, sia Kutoke’i anting-anting tu talingammu sia Kupasongko’iko makota ballo.

¹³Sia dibeloiko bulaan sia salaka sia iatu tamangkalemu lenang melo sia sa’be sia sampin dibunga-bungai. Iatu kandemu ta’pung mani’sa’, tani’ enoan sia minna’, ammu maballo tongan, muurunganni dadi datu baine.

¹⁴Susimoto ammu kalelean dio lu mintu’ bangsa tete dio kamaballoammu, belanna tae’mo sayuanna diona tu belo, mangka Kubeloangko, kadanNa Puangta PUANG.

¹⁵Apa sande’ lakomoko kamaballoammu sia ma’gau’ salamoko, belanna madongnga’ko tete dio sanga tarompo’mu sia umparri-parri gau’ salamu sola mintu’ to lendu’: anna laoiko.

¹⁶Mualai tu tamangkalemu, mupa’beloanni inan madao, dinii memala’, anna ma’ba’na sura’na, anna inde to dao munii ma’gau’ sala; tae’ bangpa nadipogau’ tu susinna to, sia tae’ bangpa nadadi len.

¹⁷Sia muala duka tu belo bulaan sia salaka, tu Kukamaseangko, ammu garaganni kalemu rapang-rapang muane dipodeata, tu musigau’ salan.

¹⁸Sia muala tu tamangkale dibunga-bungaiammu, ammu paluangi, sia mupadio to’ tingayona tu minna’Ku sia dupaKu.

¹⁹Sia iatu kande tu Kukamaseangko, iamotu ta’pung mani’sa’, minna’ sia tani’ enoan, tu Kupakandeangko, mupadiomo butung to bau busarungngu’. Ondongpi saemo lako ma’kalolokanna, kadanNa Puangta PUANG,

²⁰ammu alai tu mai anakmu muane sia baine, tu mangka mupadadianNa’, ammu pemalaranni lako, la napokande. Tae’paraka nasundun tu gau’ salamu,

²¹ammu rere’ dukai tu mai anakKu muane sia muben rapang-rapang dipodeata iato la ditunuanni.

²²Lan mintu’ penggauran megalliammu sia gau’ salamu, tae’ mukilalai tu allo kalollerammu, tommu ma’kambelang, tang ma’tamangkale, sia metteba’-teba’ko dio to’ raramu.

²³Sia iatommu mangka umpogau’i tu mintu’ kakadakeammu, — upu’ allomu, upu’ allomu! kadanNa Puangta PUANG —

²⁴mupabendan duka tu misa’ tangdo’ sia palangka dio lu mintu’ tana lapang.

²⁵Dio lu mintu’ kasitammuan lalan munii umpate’dek palangka, ammu bala’-bala’ kamaballoammu, sia tang masiri’ko umpopa’elo’na kalemu lako mintu’ to lendu’ sia makambanmo gau’ sala mupogau’.

²⁶Sia sigau’ sala dukako to Mesir tu musikandappiran, tu bualang ma’gau’ kadake; makambanmo gau’ sala mupogau’, tu mupobannang umpa’dikki penaangKu.

²⁷Apa manassa Kue’te’mo tu limangKu unneako, Kupasosso’mo tu taa dipamanassangko sia Kusorongko lako pa’poraianna to ungkabiri’ko, iamotu anak dara to Filistin, tu masiri’ diona kedo mesirisammu.

²⁸Ondongpi sigau’ salako to Asyur, belanna tang namosoko; manassa sigau’ salako tau iato mai, na moi susito, inang tang namosoko.

²⁹Susi dukato mupamakamban tu gau’ salamu sola to Kasdim, iamotu tondok pa’balilian, apa moi nasusito tae’ duka namosoko.

³⁰Masarru’ kamoraiammu, kadanNa Puangta PUANG, ammu pogau’ nasangi te iannate, iamotu penggauranna misa’ baine bualang matampo.

³¹Umpabendanmoko tangdo’mu dio lu mintu’ kasitammuan lalan sia umpate’dekmoko palangkamu dio lu mintu’ tana lapang. Moi susito, tae’ nasusi baine bualang tu penggaurammu, belanna tae’ mudaka’ tambomu.

³²A’a baine masarri’ pasandak salu lako rampanan kapa’, tu ma’pangngan buni sola to senga’, moi kemuane!

³³Mintu’ ia baine bualang diben pamengan, apa iko umpa’bengan tambo lako mintu’ muane ungkamoraiko, munaranan tu tau iato mai la sae umpellambi’iko dio mai mintu’ inan, ammu ma’gau’ sala sola.

³⁴Susimoto tu gau’ salamu sibalikan gau’na baine senga’; belanna tae’ namuane undi unnula’ko, sangadinna iko kalena untamboi, tae’ naiko naben tambomu. Susimoto tu iko sibalikan tu baine senga’.

³⁵Iamoto, e bualang, tananni talinga tu kadanNa PUANG.

³⁶Inde sia tu kadanNa Puangta PUANG, Nakua: Tu belanna laomo tu siri’mu sia dikambelangimo tu kasirisammu napobua’ gau’ salamu sola muane ungkamoraiko sia sola mintu’ rapang-rapang dipodeata megalliammu, sia belanna rarana anakmu muane tu mangka mupemalaran lako —

³⁷iamoto, manassa la Kupasipulung tu mintu’ muane ungkamoraiko, tu musede anna poraiko, la mintu’ tu muporainna, la mintu’ tu musayunna: la Kupasipulung dio mai mintu’ inan unneako sia la Kukambelangiko dio tingayona tu tau iato mai, anna tiroi tu kasirisammu.

³⁸La Kuukungko susitu apa naparampo tau lako baine pasandak salu lako rampanan kapa’ sia umpatibollo rara; sia la Kupadadiko misa’ to narampoi to’doan rara napobua’ kare’dekan ara’ sia narampoi kamangimburuan.

³⁹La Kusorongko tama limanna tau iato mai, anna rondonni tu tangdo’mu sia naro’pok-ro’pok tu palangkamu sia anna kalosso’i tu tamangkalemu, naalaiko tu belomu, anna tampeko napopa’kambelang, tang ma’tamangkale.

⁴⁰Napalaoiko tau sangtuntunan, tu la untumbuiko batu sia ussilantukkiko nalontok-lontok pa’dang,

⁴¹sia la naballa tu banuammu sia la naparampoiko ukungan dio pentirona buda baine, sia tae’ dukamo ammu la umpa’bengan tambo.

⁴²Belanna tete dio apa iato iatu kare’dekan ara’Ku tu urrampoiko la Kuparandan sia iatu kamangimburuangKu la toyang dio mai kalemu; mangkato Kumane rapa’ sia tae’mo nala torro tu kasengkeangKu.

⁴³Belanna tae’ mukilalai tu allo kalollerammu, sangadinna mupare’dek tu ara’Ku, iamoto la Kupasule langngan ulummu tu gau’mu, kadanNa Puangta PUANG. Belanna tae’moraka mutompoi pole’i gau’ sala mesirisammu tu mintu’ penggauran megalliammu?

⁴⁴Manassa mintu’ tu to umpalao parumbasan, la ma’parumbasan diona kalemu kumua: Umba nakua tu indo’, susi dukato tu anakna baine.

⁴⁵Ikomo tu anakna baine indo’mu, tu ungkasorromo muanena sia anakna muane, sia ikomo tu siulu’na tu mai sangbainemu, tu ungkasorromo muanena sia anakna muane. Iatu indo’mu to Heti sia iatu ambe’mu to Amori.

⁴⁶Iatu sangbaine kapuamu iamotu Samaria, tu sola anakna baine torro dio rampe rekkena muninna; na iatu sangbaine bitti’mu, tu torro dio rampe sau’na muninna, iamotu Sodom sola tu mai anakna baine.

⁴⁷Apa tae’ ammu turu’ mannai tu bate lalanna sia tae’ muturu’ mannai tu penggauran megallianna, sangadinna tae’ namasai ammu mandumo kadake lan mintu’ penggaurammu.

⁴⁸La lelukraka tuoKu, kadanNa Puangta PUANG, manassa iatu Sodom, sangbainemu, sola anakna baine, tae’ napogau’i tu apa mupogau’ sisola anakmu baine.

⁴⁹Inde sia tu kakadakeanna Sodom, sangbainemu, iamotu tuo sola anakna baine situang kamatampoan, kasebaran sia kamanamanan, anna masalio bang, apa tae’ anna tundui lenni tu mai to mandasa sia to mase-mase.

⁵⁰Tarru’ matampo tu tau iato mai, sia napogau’ tu apa megallian dio oloKu. Iamoto kuputtai tu tau iato mai, tongku tiromi.

⁵¹Iatu Samaria tae’pa nasesena kasalammu napogau’; mandu losong tu apa megallian mupogau’ anna iatu tau iato mai. Susimoto tu sangbainemu mupabutung to tae’ salana tete dio mintu’ apa megallian tu mangka mupogau’.

⁵²La mutanggung tu attangammu, e iko, tu umpatunduk to ma’paolai salu umpamaringan pangra’ta’ kara-karana sangbainemu; tete dio kasalammu tu napobannang umpogau’i tu apa megallian losong anna iatu napogau’na tau iato mai, iatu tau iato mai maringan salana na iko. Iamoto sipatuko masiri’ sia untanggung kalenai tu attangammu, belanna mupabutung to tae’ salana tu sangbainemu.

⁵³Sia la Kupopembali tu dalle’na, iamotu dalle’na Sodom sola anakna baine sia dalle’na Samaria sola anakna baine; susi dukato tu dalle’mu la Kupopembali,

⁵⁴ammu tanggung kalenai tu attanganmu sia umpassan siri’mu diona tu mintu’ apa mangka mupogau’, tu munii umpaden pa’pakatana lako tau iato mai.

⁵⁵Na iatu sangbainemu Sodom sola tu mai anakna baine la sule tama dandanna, sia iatu Samaria sola tu mai anakna baine la sule tama dandanna; na iko sola tu mai anakmu baine la sule dukako tama dandanmu.

⁵⁶Susitu sanganna Sodom, sangbainemu, tae’ bangmo nasa’bu’i randan pudukmu, tonna attu kamatampoammu,

⁵⁷tonna tae’pa nadipasombo tu kakadakeammu, susi duka totemo attunnamo, munii attangan lako mintu’ anak dara Aram sia mintu’ sanglembangna sia lako anak dara to Filistin, tu naala la’de’na ussayuko tiku lao.

⁵⁸Mintu’ tu penggauran mesirisammu sia apa megalliammu tu mutanggung kalena, kadanNa PUANG.

⁵⁹Belanna inde sia tu kadanNa Puangta PUANG: La Kupogau’, susitu mangka mupogau’ lako Kaleku, tu mangka untapa’ sumpa, belanna mupoka tu basse.

⁶⁰Apa moi nasusito Kukilalai tu basseta, lan attu mangurammu, sia la untananKi’ misa’ basse matontongan sola.

⁶¹Attu iato la mukilalai tu mintu’ gau’mu sia la masiri’ko ke mutarimai tu sangbainemu, tu kapuanna sia bitti’na, sia Kubenko la dadi anakmu baine, moi tae’ natete dio tu basse mangka tatanan.

⁶²Sia la Kutanan tu basseKu tasibassei, ammu tandai kumua Akumo tu PUANG,

⁶³ammu mengkilala sia masiri’ sia anna diona siri’mu ammu tang umbungka’ pudukmu — , ke Kupadenni tu pengkalossoran diona mintu’ apa mangka mupogau’, kadanNa Puangta PUANG.