Read Toraja-Sa'dan YEHEZKIEL 19 Bible Online

YEHEZKIEL 19 - Toraja-Sa'dan bible

YEHEZKIEL 19

¹Na iatu iko, tannunko bating lako mintu’ datu to Israel,

²sia ma’kadako kumua: Tae’raka nasusi singa inanna tu indo’mu dio lu mintu’ singa laki! Mamma’ dio lu singa mangura, tu umpelobo’i anakna.

³Iatu mintu’ anakna misa’ tu napelobo’i anna dadi singa mangura, tu melada’ usse’bu kandena, moi tau nakande duka.

⁴Narangimi mintu’ bangsa tu kareba diona kalena, didammakmi lan kalo’tokna, sia nakale’ke’i, narendenni, lako tondok Mesir.

⁵Iatonna tiromi singa inanna, kumua ka’tumo rannunna, sia pa’demo sanderanna, naalami tu anak senga’na misa’, naangka’i dadi misa’ singa mangura.

⁶Barani male sirau padanna singa, a’ganna singa mangura, tu melada’ usse’bu kandena, moi tau nakande duka.

⁷Nagau’ sala tu baine balunna sia nasanggang tu kotana; tiramban tu mintu’ lino napobua’ burrung kapuanna.

⁸Apa tibalikmo tu mintu’ bangsa unneai, dio mai mintu tondok tiku lao; natananni porro’, anna didammak lan kalo’tokna.

⁹Anna patamai tau kurungan, anna dipungo dikale’ke’i, anna dibaa lako datu Babel, nadipatama misa’ benteng matoto’, kumua damo nadirangi tu burrungna dao lu mintu’ buntu Israel.

¹⁰Iatu indo’mu, lan tu attu munii menta’bi butungi to misa’ garonto’ anggoro’, tu ditanan dio randan uai, tu membua sia mentangke-tangke, belanna buda tongan uai.

¹¹Iatu mai tangkena matoto’: sae lako dadi tekken kadatuan. Misa’i tu tangkena tuo tarangso langngan dao lu mintu’ takke’-takke’ makampu, sia paan diona kakalandoanna langngan, sia diona kamakampuanna takke’-takke’na.

¹²Apa diona kasengkean anna dilampi’i tu garonto’ anggoro’ iato, nasongka rokko padang. Mintu’ buanna napamarangke angin dio mai rampe matallo; rondonmi anna marangke. Iatu tangke matoto’na nakande api.

¹³Totemo ditananmo dio lu padang pangallaran, dio lu misa’ padang marangke sia ba’ta’.

¹⁴Sunmi tu api lan mai tangkena, tu ungkande takke’-takke’na sia buanna, tae’mo tangke matoto’na dio, tae’mo tekken la sikambi’ kadatuan! Iamote tu misa’ rintin, tu dipobatingmo.