Read Toraja-Sa'dan YEHEZKIEL 2 Bible Online

YEHEZKIEL 2 - Toraja-Sa'dan bible

YEHEZKIEL 2

¹Ma’kadami lako kaleku Nakua: E ma’rupa tau, millikko ammu bendan, belanna la Kupa’kadaiko.

²IatonNa pa’kadaimo’, tamami kaleku tu penaa, anna pabendanna’, sia kurangimo tu To umpa’kadaina’.

³Ma’kadami lako kaleku Nakua: E ma’rupa tau, Kusuako lako to Israel, lako tu mai bangsa pabali-bali, tu unneaNa’; iatu tau iato mai sia nene’ to dolona umboko’i dukaMo’ sae lako allo iate;

⁴moi na iatu anakna tau iato mai ma’lindo batu duka sia battuk tu penaanna. Kusuako lako tau iato mai, ammu pokadanni kumua: Inde sia tu kadanNa Puangta PUANG.

⁵Iatu tau iato mai ba’tu morai untananni talinga, ba’tu tae’i — belanna tau iato mai to pabali-bali — la naissan duka, kumua den misa’ nabi dio lu tau iato mai.

⁶Na iko, e ma’rupa tau, da mukataku’i tu tau iato mai sia da mukataku’i tu kadanna, moi natikuiko a’da’ sola duri sia moi ammu sisola te’tek buku; da mukataku’i tu kadanna sia da mukagiangi tu olona, belanna tau iato mai to pabali-bali.

⁷Apa la mupokada nasang lako tu kadangKu, ke la morai untananni talinga, ba’tu tae’i, belanna tau iato mai to pabali-bali.

⁸Na iko, e ma’rupa tau, perangii tu apa Kupokadangko; da mupabali-bali susite to pabali-bali; popengangai tu sadangmu, ammu kandei tu apa Kubenko.

⁹Attu iato kutiromi, manassa den misa’ lima untadoina’, sia manassa den sura’ tilulun dio lima iato.

¹⁰Naballarammo’ tu sura’ iato; tisura’mo patomali dio tingona sia dio boko’na; na iatu disura’ dio, iamotu ba’tu pira-pira bating, sarro sia pekaindo’.