Read Toraja-Sa'dan YEHEZKIEL 23 Bible Online

YEHEZKIEL 23 - Toraja-Sa'dan bible

YEHEZKIEL 23

¹Rampomi tu kadanNa PUANG lako kaleku Nakua:

²E ma’rupa tau, den da’dua baine, sangindo’i.

³Tau iato mai ma’gau’ sala dio Mesir; iatonna mangurapa ma’gau’ sala; dio dinii ungkaka’i tu susunna sia ussapu-sapui tu susunna, tonna anak darapa.

⁴Iatu sanganna kakanna Ohola na Oholiba tu adinna. Iatu tau iato sola duai anungKu dua sia ma’dadian muane sia baine. Iatu battuananna sanganna, Ohola, iamotu Samaria na Oholiba, iamotu Yerusalem.

⁵Iatu Ohola ma’gau’ sala, tongKu sisolapa; sia ungkamali’ mintu’ sangmatuanna, to Asyur, iamotu to mase’ponna datu,

⁶tu ma’tamangkale lango-lango, to maraa, to maraa lompo, iamotu pia lolle’ ballo, sia pakkanarang nasang.

⁷Ma’gau’ salamo sola tau iato mai, iamotu mintu’ anak to Asyur, to la’bi’; sola mintu’ to nakamali’, sia umpamaruttak kalena, belanna umpenombai rapang-rapang dipodeatanna.

⁸Sia tae’ natore tu pa’gau salana, tonna dio lu Mesir, belanna iatu tau iato mai nasangamparan, tonna mangura, sia ussapu-sapui tu susunna tonna anak darapa sia umpaliu gau’ salana lako tau iato mai.

⁹Iamoto Kusorongi tama limanna mintu’ sangmatuanna, tama limanna anak to Asyur, tu nakamali’.

¹⁰Nakambelangi tau iato mai, narampai tu mai anakna muane sia baine, napatei pa’dang. Susimoto dinii umpoparumbasanni dio lu mintu’ baine, belanna diparampoimo ukungan.

¹¹Iatonna tiromi Oholiba, adinna, tu iannato, losong polemi dukku tu kamamaliranna kalena na kakanna sia losong pole tu gau’ salana anna mintu’ gau’ salana kakanna.

¹²Ungkamali’mo to Asyur, iamotu to maraa, to maraa lompo, to mase’ponna datu, tu ma’tamangkale mellong, pakkanarang, iamotu pia lolle’ balo nasang.

¹³Sia Kutiro kumua naruttakki tu kalena; umpamisa’ lalan sola duai.

¹⁴Ondong polepa napogau’ tu gau’ kadake mandu tongan; belanna natiro tu passura’na muane dio rinding tembo’, iamotu patta to Kasdim, tu disura’ mararang,

¹⁵ma’tambeke’ sia ma’tali bate’, mendoke’ tu tampakna patomali; mintu’i susi bang to lalong, susito dio mai Babel to Kasdim, iamotu tondok kadadianna.

¹⁶Natiro manna anna kamali’mi, namesua lako tau iato mai dio tondok Kasdim.

¹⁷Saemi tu to Babel, ussisangmatuanni; naruttakkimi gau’ salana; iatonna mangkamo naruttakki tau iato mai, magi’gi’mi lako tau iato mai.

¹⁸Napakaanan bang tu gau’ salana; napapayan bang tu kasirisanna. Kuurungan magi’gi’mo untiroi, susi kamagi’girangKu lako kakanna.

¹⁹Apa sanarangngan-rangnganninnaora tu gau’ salana ungkilalai tonna mangurapa, tonna ma’gau sala dio Mesir.

²⁰Sia ungkamali’ sangmatuanna, tu maduang susi keledai laki sia malassu tu kamoraianna susi darang laki.

²¹Manassa, undaka’ko lalan la umpogau’omi tu gau’ sala tu mupogau’ tommu mangurapa, tonna sae tu to Mesir ungkaka’ barangkangmu sia ussapu-sapu susu anak darammu.

²²Iamoto, o Oholiba, inde sia tu kadanNa Puangta PUANG kumua: Manassa Kupatiakka’ penaanna tu mintu’ sangmatuammu la unneako, tu mukagi’gi’mo; la Kupake’de’ tiku lao sae ullaoiko,

²³iamotu to Babel sia mintu’ to Kasdim, Pekod, Soa na Koa, sibaa mintu’ to Asyur; mintu’ tau iato pia lolle’ ballo, to maraa, to maraa lompo, to lalong sia to la’bi’, pakkanarang nasang.

²⁴Tau iato mai ma’kareta sia ma’lentenan la ullaoiko sangsiturusan buda bangsa, la ma’pakolong sia ma’balulang sia ma’songko’ basi sae ullaoiko tiku lao. La Kueloran tu tau iato mai ma’paolai salu, anna paolaiko salu situru’ atoranna.

²⁵La Kuparampoiko kamangimburuangKu, anna pakitaiko kare’dekan ara’na sia kamasa’garan; la nata’takki tu illongmu sia talingammu; na iatu kamu tu torronapa la tibambang nakande pa’dang. La narampa tu anakmu muane sia anakmu baine na iatu kamu tu torronapa la nakande api.

²⁶La nalossokki tu mai tamangkalemu sia naalai tu mai belomu.

²⁷Attu iato la Kuputtai tu pa’gau’ salamu sia passulo-bongimmu, tu mutuang dio mai tondok Mesir, muurunganni tang mentiromo lako sia tang ungkilalaimo Mesir.

²⁸Belanna inde sia tu kadanNa Puangta PUANG, Nakua: Tonganna la Kusorongko tama kuasanna to mukabiri’, tama kuasanna to mukagi’gi.

²⁹La napakitaiko kamagallianna sia la narampa tu mintu’ apa-apammu sia la natampeko ma’kambelang sia tang ma’tamangkale, la dikambelangi tu kasirisammu, tu ma’gau’ sala bang, iamotu gau’ salamu sia passulobongimmu.

³⁰La naparampoiko tau tu iannato, belanna unturu’ pasandak salu lako rampanan kapa’ sola tu mai bangsa iato, belanna urruttakkiko kalemu umpenombai rapang-rapang dipodeatanna.

³¹Unnolamoko lalan gau’na sangbainemu; iamoto Kutadoangko tu irussanna.

³²Inde sia tu kadanNa Puangta PUANG Nakua: La muiru’ tu apa lan irusanna sangbainemu, iamotu irusan maliku sia kalua’; la napakitaiko tau sia natelle-telle; buke tu irusan iato.

³³La bukeko kamalangoan sia kamaparrisan; iatu irusanna sangbainemu Samaria, iamo irusan nanii apa megiangan sia mepatiramban.

³⁴La muiru’ sia la muparitikki sia la mutesse tu bibangna sia la muballak tu ara’mu, — belanna mangka Kupokada tu iannato, kadanNa Puangta PUANG.

³⁵Inde sia tu kadanNa Puangta PUANG: Belanna tae’mo mukilalaiNa’ sia mutananniMo’ boko’, iamoto la mupassan tu pakkanna gau’ salamu sia passulobongimmu.

³⁶Sia ma’kada tu PUANG lako kaleku Nakua: E ma’rupa tau, la mupaolairaka salu tu Ohola sia Oholiba? Pokadanni tu penggauran megallianna,

³⁷belanna pasandak salu lako rampanan kapa’ sia le’ke’ rara dio limanna; pasandak salu lako rampanan kapa’ sola rapang-rapang dipodeatanna sia nabuangmo tu anakna muane tama api, tu napadadianNa’, napakandean rapang-rapang dipodeatanna.

³⁸Ondongpi napogau’ lako Kaleku te sala iate; naruttakki tu inan maindanKu to attu iato sia napamatuna tu allo katorroangKu.

³⁹Iatonna mangkamo urreresanni rapang-rapang dipodeatanna tu anakna muane, ia bangsiamoto allo iato nasae tama inan maindanKu, naurunganni umpamatunai; susimoto tu napogau’ lan banuangKu.

⁴⁰Ondongpi iatu tau iato mai umpesuan muane sae dio mai padang mambela; mane disua tu pesua lako tau iato mai, nata’pa saemo; belanna tau iato mai mumendio’ sia ullotongiko bulu matammu sia umbeloiko kalemu.

⁴¹Sia unno’ko’ko dio inan mamma’ ballo, sia sakka’mo tu meda dio tingayo inan mamma’ iato, tu munii umpatorro dupaKu sia minna’Ku dao.

⁴²Mongngo’mi tu to buda tae’ bangmo apa nakilalai, sia pa’malangoan, tu sae dio mai padang pangallaran sirau tau punala bang. Napaluangi komba tu limanna sia napasongko’i makota.

⁴³Ma’tangnga’-tangnga’Na’ Kukua: Iatu baine tang tibala taumo la pasandak saluparaka? La moraiparaka tau unggau’ salai?

⁴⁴Saemi tu tau lako kalena, susito lao lako baine bualang; susimoto tu tau male lako Ohola sola Oholiba, tu baine biasa ma’gau’ sala sola duai.

⁴⁵Apa to malambu’ la umpaolai salunna situru’ salunna, tu dipapatuan baine pasandak salu, sia iatu mai baine umpatibollo rara, belanna pasandak salu sia le’ke’ tu rara dio limanna.

⁴⁶Belanna inde sia tu kadanNa Puangta PUANG Nakua: Pake’deranni misa’ kasirampunanna to buda ullaoi sia sorongi tama kadipakario-rioan sia kadirampan.

⁴⁷Na iate kasirampunanna to buda la untumbui batu sia la ullontok-lontokki pa’dang sia la umpatei tu anakna muane sia anakna baine sia la umballai api tu mai banuanna.

⁴⁸La Kuputtai tu gau’ sala lan tondok iate, anna mintu’ baine la umpalan penaai tu pa’pakilala, kumua da naturu’i tu gau’ salami.

⁴⁹Iatu gau’ salami la napakkan tau lako kalemi, sia la mipassan tu kasalammi umpenombai pa’deatammi. Ammi issanni, kumua Akumo tu Puangta PUANG.