Read Toraja-Sa'dan YEHEZKIEL 24 Bible Online

YEHEZKIEL 24 - Toraja-Sa'dan bible

YEHEZKIEL 24

¹Rampomi tu kadanNa PUANG lako kaleku tonna taun ma’pengkasera, bulan ma’pessangpulo, allo ma’pessangpulona bulan iato, Nakua:

²E ma’rupa tau, sura’i tu tanggala’na te allo iate, te allo ia bangsiamote: allo ia bangsiamote nanii datu Babel ullaoi Yerusalem.

³Uleleanni misa’ rapang-rapang lako te bangsa pabali-bali sia ma’kadako lako tau iato mai kumua: Inde sia tu kadanNa Puangta PUANG Nakua: Patonangi tu kurin, patonangi. Patamai uai.

⁴Patamai duku’ diira’-ira’, iamotu mintu’ pangira’ melo, tu sepakna sia buku lesona; ponnoi buku maelona,

⁵alai tu domba sola bembe’ tu maelona, popa’toppo’-toppo’i tu kayu diong. Pare’dei anna manasu duka tu mai buku.

⁶Iamoto, inde sia tu kadanNa Puangta PUANG Nakua: Upu’ allona tu kota umpentombang rara, iamotu kurin ta’garan, tang lossok-lossokannamo. Alai sisangira’-ira’i lan mai, apa tae’ nadipile-pilei.

⁷Belanna tonang lan tu rara dipatibollo; iatu rara nabolloan dao buntu batu rangke; tae’ nabolloan diongi padang kumua anna samboi barra’-barra’.

⁸Kumua anna pabu’tu kare’dekan ara’ sia nadipapakkanni tu rara iato, iamoto Kupalakoi tu rara mangka dipatibollo dao buntu batu rangke, anna tae’ nadisamboi.

⁹Iamoto, inde sia tu kadanNa Puangta PUANG Nakua: Upu’ allona tu kota umpentombang rara. Aku kalena la umpakapuai tu api dapo’.

¹⁰Tombonni kayu tama, padukkui tu api; pemanassungi tu duku’, pema’tii tu uaianna, anna mampu’ tu bukunna.

¹¹Patonang lo’bangi tu kurin dao to’ ruaya, anna malassu sia anna borrong tu tambagana, anna lessu’ tu apa le’ke’ lan sia anna tikalopak tu ta’ga’na.

¹²Apa tae’ gai’na tu tau nara’takki kurin, belanna makambanmo tu ta’ga’na, tae’mo natikalopak; buangi tama api tu ta’ga’na.

¹³Belanna kamaruttakan gau’ salamu, sia belanna la moraiNa’ umpemaseroiko, apa manokako dipemaseroi, iamoto inang tae’mo mula dipamasero dio mai kamaruttakammu sae lako Kupasau tu kare’dekan ara’Ku lako kalemu.

¹⁴Akumo, PUANG, tu mangka umpokadai tu iannato. La dadi tu apa iato sia la Kupogau’. Tae’ Kula untorroi tu pengkarangan iato sia tae’ Kula ungkatirinnai sia tae’ Kula ungkamasei tu tau iato. La napaolaiko salu tau sitinaya gau’mu sia kedomu, kadanNa Puangta PUANG.

¹⁵Rampomi tu kadanNa PUANG lako kaleku Nakua:

¹⁶E ma’rupa tau, la Kuala dio mai kalemu tu apa naporai matammu tete dio kamatean tang dikapang, apa tae’ ammu umbating sia tumangi’ sia umpato’do uai matammu.

¹⁷Pela’-pela’ko sumarro; da muma’pote dibolong; pamanda’ bangi tu passapummu, sia ma’sepatuko, da mutampun puduk daoanmu sia da mukandei tu roti nabangko tau.

¹⁸Iatonna melambi’ ma’kadana’ lako bangsa iato, nabongi dio mai matemi tu baineku. Masiang pole’ dio mai to, kupogau’mi susi tu dipa’parentan lako kaleku.

¹⁹Ma’kadami tu bangsa iato lako kaleku, nakua: Tae’raka mila umpokadangkan, apa battuananna mipogau’i te?

²⁰Ma’kadamo’ lako tau iato mai kukua: Rampomo tu kadanNa PUANG lako kaleku Nakua:

²¹Pokadanni to Israel: Inde sia tu kadanNa Puangta PUANG, Nakua: Manassa la Kuruttakki tu inan maindanKu, tu oto’ kamatotorammi, tu mipotete massattuan, tu apa naporai matammi sia nakamali’ penaammi; na iatu mintu’ anakmi muane sia anakmi baine tu mitampena la tibambang nakande pa’dang.

²²Sia la mipogau’ susitu mangkanna kupogau’; tae’ ammi la untampunni tu puduk daoammi, sia iatu roti nabangkomi tau, tae’ mila ungkandei,

²³sia la ma’passapukomi sia ma’sepatu. Sia tae’ mila umbating sia tumangi’, sangadinna la bonnongkomi natumang kakadakeammi sia pada la sumarrokomi lako solami.

²⁴Iatu Yehezkiel la susi misa’ rapang-rapang lako kalemi; susitu mintu’ apa napogau’, la susi duka mipogau’ to, ke saei tu apa iato, ammi tandai, kumua Akumo tu Puangta PUANG.

²⁵Na iko, e ma’rupa tau, manassa allo iato la Kunii unnalai tu oto’ kamatotoranna tau iato mai, tu kamala’biran naposende, tu apa naporai matanna sia nakamali’ penaanna, iamotu mintu anakna muane sia anakna baine,

²⁶allo iato la den misa’ tau mallai sae lako kalemu la umpokadangko tu apa iato.

²⁷Allo iato la tibungka’ tu pudukmu, ke rampomi tu tau mallai; la ma’kada-kadako sia tae’mo mula kappa. La susimokoto, dadi misa’ rapang-rapang lako tau iato mai; anna tandai kumua: Akumo tu PUANG.